ខេត្តក្រចេះ ៖ បុរសកំហូចម្នាក់ បានបបួលមិត្តភក្តិជិតស្និទ្ធ (ក្លើ) របស់ខ្លួនម្នាក់ផឹកស៊ី និងបានព្យាយាមបង្អកស្រាក្លើរហូតដល់ស្រវឹង ជោកជាំក្រោកមិនរួច ក៏បែកគំនិតជិះម៉ូតូទៅចាប់រំលោភប្រពន្ធក្លើរហូតបានសម្រេចមួយភ្លែត២ដង លុះស្ត្រីរងគ្រោះទម្លាយរឿងប្រាប់ប្តី ក៏ឈានដល់ការដាក់ពាក្យបណ្តឹង ឱ្យសមត្ថកិច្ចចាប់អូសកជនល្មោភកាមរូបនោះ យកមកចាត់ការតាមច្បាប់។
ករណីរំលោភសេពសន្ថវៈខាងលើនេះ បានកើតឡើងកាលពីយប់ថ្ងៃទី០៥ ខែកញ្ញា ឆ្នាំ២០១៨ នៅចំណុចឃុំស្នួល ស្រុកស្នួល។ លុះស្ត្រីរងគ្រោះដាក់ពាក្យបណ្តឹង ក៏ត្រូវសមត្ថកិច្ចចុះឃាត់ខ្លួនជនសង្ស័យបាន កាលពីព្រឹកថ្ងៃទី០៧ ខែកញ្ញា ឆ្នាំ២០១៨ នៅចំណុចភូមិឃុំកើតហេតុខាងលើ។
ជនសង្ស័យខាងលើ ឈ្មោះស ឌី អាយុ៣៨ឆ្នាំ មុខរបរកសិករ មានលំនៅក្នុងឃុំស្នួល ស្រុកស្នួល។ ចំណែកស្ត្រីរងគ្រោះ មានអាយុ៣៥ឆ្នាំ ត្រូវជាប្រពន្ធរបស់មិត្តភក្តិជិតស្និទ្ធ (ក្លើ) របស់ជនសង្ស័យខាងលើ និងមានលំនៅក្នុងភូមិឃុំកើតហេតុខាងលើជាមួយគ្នា។
តាមសម្តីស្ត្រីរងគ្រោះ បានរៀបរាប់ប្រាប់ថា នៅមុនពេលកើតហេតុ កាលពីយប់ថ្ងៃទី០៥ ខែកញ្ញា ឆ្នាំ២០១៨ ជនសង្ស័យបានបបួលប្តីរបស់នាង ដែលត្រូវជាមិត្តភក្តិជិតស្និទ្ធនឹងគ្នា ផឹកស៊ីនៅផ្ទះរបស់ខ្លួន (ជនសង្ស័យ)។ បន្ទាប់មក ជនសង្ស័យក៏បានព្យាយាមបង្អកស្រាប្តីរបស់នាង រហូតដល់ស្រវឹងជោកជាំ ក្រោកលែងរួច។ លុះមកដល់វេលាម៉ោង៩យប់ថ្ងៃដដែល ជនសង្ស័យក៏បានជិះម៉ូតូ មកផ្ទះរបស់នាង និងបានមកប្រាប់នាងឱ្យទៅយកប្តីដែលផឹកស្រវឹងដេកងើបមិនរួចនៅផ្ទះរបស់គេ។
ស្ត្រីរងគ្រោះបន្តថា ភ្លាមនោះ ជនសង្ស័យក៏បានហៅឱ្យនាងឡើងជិះម៉ូតូជាមួយគេទៅ ចាំគេដឹកទៅយកប្តី ចំណែកនាងហេតុតែទុកចិត្តក្លើប្តីពេក ក៏ព្រមឡើងម៉ូតូទៅជាមួយជនសង្ស័យរូបនេះទាំងយប់ ស្រាប់តែពេលដឹកនាងដល់ពាក់កណ្តាលផ្លូវដែលជាកន្លែងស្ងាត់ ជនសង្ស័យក៏បានឈប់ម៉ូតូ រួចចាប់អូសនាងចុះពីលើម៉ូតូ និងបានគំរាមសម្លាប់នាងចោល ប្រសិនបើនាងហ៊ានស្រែក បន្ទាប់មក ជនសង្ស័យក៏បានចាប់នាង រំលោភរហូតដល់បានសម្រេចតែម្តង ចំណែកនាងក៏មិនហ៊ានស្រែកដែរ ព្រោះខ្លាចជនសង្ស័យសម្លាប់បំបិតមាត់ ហើយបើទោះជាស្រែកក៏គ្មានអ្នកលឺដែរ ព្រោះតំបន់នោះដាច់ស្រយាលពីភូមិ គ្មានមនុស្សនៅទេ។
ស្ត្រីរងគ្រោះ បានបញ្ជាក់ថា ក្រោយពីចាប់នាងរំលោភបានសម្រេចមួយលើកហើយ ជនសង្ស័យក៏បានដឹកនាងបំណងត្រឡប់ទៅផ្ទះនាងវិញ ស្រាប់តែទៅជិតដល់ផ្ទះរបស់នាងទៅហើយ ជនសង្ស័យមិនទាន់ស្កប់ស្កល់តណ្ហា ក៏ឈប់ម៉ូតូចាប់ខ្ទប់មាត់រំលោភនាងរហូតដល់បានសម្រេចមួយលើកទៀត សរុបទៅ តែមួយភ្លែតសោះ ជនសង្ស័យចាប់នាងរំលោភរហូតបានសម្រេចដល់ទៅ២ដង។
ស្ត្រីរងគ្រោះ បានបញ្ជាក់បន្ថែមថា ក្រោយពីត្រូវជនសង្ស័យចាប់រំលោភរួចហើយ នាងមិនទាន់ហ៊ានប្រាប់ប្តីភ្លាមៗទេ រហូតមកដល់ ព្រឹកថ្ងៃទី០៧ ខែកញ្ញា ឆ្នាំ២០១៨ ទើបនាងដាច់ចិត្តរៀបរាប់ប្រាប់ថាប្តី និងត្រូវប្តីនាំនាងទៅដាក់ពាក្យបណ្តឹងដើម្បីឱ្យសមត្ថកិច្ចជួយអន្តរាគមន៍តែម្តង។
នគរបាលស្រុកស្នួលបានឱ្យដឹងថា ក្រោយពីទទួលបានពាក្យបណ្តឹងពីស្ត្រីរងគ្រោះរួចមក សមត្ថកិច្ចបានចុះធ្វើការស្រាវជ្រាវ និងឃាត់ខ្លួនជនសង្ស័យភ្លាមៗ នាំយកមកសាកសួរ។
នៅចំពោះមុខសមត្ថកិច្ច ជនសង្ស័យឈ្មោះស ឌី បានឆ្លើយសារភាពថា ខ្លួនពិតជាបានប្រព្រឹត្តដូចអ្វីដែលស្ត្រីរងគ្រោះប្តឹងចោទប្រកាន់មែន ដោយដំបូងឡើងរូបគេបានផឹកស្រាជាមួយក្លើ ដែលជាប្តីស្ត្រីរងគ្រោះ លុះពេលក្លើនេះស្រវឹងក្រោកលែងរួច ខ្លួនក៏បែកគំនិត ជិះម៉ូតូទៅបញ្ឆោតប្រពន្ធក្លើថាមកយកប្តី រួចក៏ចាប់រំលោភតាមផ្លូវរហូតដល់បានសម្រេច២ដងតែម្តង៕