ខេត្តកំពង់ធំ ៖ ស្ត្រីវ័យចំណាស់ម្នាក់បានចុះងូតទឹកស្រះតែម្នាក់ឯង ស្រាប់តែអកុសល ទំនងជាងងឹតមុខ ឬកើខ្យល់គរ ក៏បណ្តាលឱ្យលង់ទឹក ស្លាប់យ៉ាងអាណេចអាធ័ម កាលពីវេលាម៉ោង១២ថ្ងៃត្រង់ ថ្ងៃទី០៨ ខែកញ្ញា ឆ្នាំ២០១៨ មានករណីមនុស្សលង់ទឹកស្លាប់ម្នាក់ នៅភូមិតាឌុក ឃុំបល្ល័ង្ក ស្រុកបារាយណ៍។
លោកយាយរងគ្រោះ ដែលលង់ទឹកស្លាប់ មានឈ្មោះចេត សេង អាយុ៦២ឆ្នាំ មានលំនៅក្នុងភូមិឃុំកើតហេតុខាងលើ។
តាមប្រភពពីក្រុមគ្រួសារលោកយាយរងគ្រោះខាងលើ បានរៀបរាប់ប្រាប់ថា លោកយាយរងគ្រោះ បានកើតមានជំងឺប្រចាំកាយជាយូរឆ្នាំមកហើយ។ នៅមុនពេលកើតហេតុ កាលពីវេលាម៉ោង១២ថ្ងៃត្រង់ ក្រោយពីហូបបាយថ្ងៃត្រង់រួច លោកយាយរងគ្រោះ បានដើរចេញពីផ្ទះ សំដៅទៅស្រះទឹកខាងលើ បំណងងូតទឹក។ លុះក្រោយពេលចុះងូតទឹក ទំនងជាអាការៈជំងឺលោកយាយធ្វើទុក្ខ ទើបធ្វើឱ្យលោកយាយងងឹតមុខ ដួលចូលទឹក បណ្តាលឱ្យលង់ស្លាប់តែម្តង ខណៈដែលគ្មានអ្នកប្រទះឃើញជួយសង្គ្រោះទាន់ពេលវេលា។
ប្រភពដដែលបន្តថា ក្រោយមកក៏មានអ្នកភូមិប្រទះឃើញ រត់មកប្រាប់ក្រុមគ្រួសារ នាំគ្នាចុះទៅជួយស្រង់លោកយាយចេញពីទឹក តែអកុសលលោកយាយរងគ្រោះបានឈ្លក់ទឹកស្លាប់បាត់ទៅហើយ ទើបនាំគ្នាសែងសាកសពត្រឡប់មកផ្ទះ រួចរាយការណ៍ប្រាប់សមត្ថកិច្ចឱ្យចុះ មកពិនិត្យតែម្តង។
ក្រោយកើតហេតុ សមត្ថកិច្ចជំនាញ បានចុះមកពិនិត្យ និងធ្វើកោសល្យវិច័យសព រួចបញ្ជាក់ថា លោកយាយរងគ្រោះពិតជាស្លាប់ ដោយ សារលង់ទឹកប្រាកដមែន៕