ខេត្តរតនគិរី ៖ អគ្គិភ័យមួយបានឆាបឆេះឡើងយ៉ាងសន្ធោសន្ធៅ និងបានលេបត្របាក់ផ្ទះមួយខ្នងទាំងស្រុង បង្កឱ្យមានការភ្ញាក់ផ្អើលឡើងកាលពីវេលាម៉ោង៨ព្រឹក ថ្ងៃទី០៨ ខែកញ្ញា ឆ្នាំ២០១៨ នៅចំណុចភូមិគ្លិ ឃុំស៊ើង ស្រុកបរកែវ។
ម្ចាស់ផ្ទះដែលរងការឆាបឆេះខាងលើនេះ មានឈ្មោះអ៊ុយ ភារ៉ា ភេទប្រុស អាយុ៣៣ឆ្នាំ មានលំនៅក្នុងភូមិឃុំកើតហេតុខាងលើ។ ចំណែកផ្ទះដែលត្រូវភ្លើងឆេះគ្មានសល់ មានទំហំ៧ម៉ែត្រ គុណនឹង៨ម៉ែត្រ សង់ពីឈើប្រក់ស័ង្កសី។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ នៅសុខៗក៏ស្រាប់តែគេឃើញមានផ្សែងហុយខ្មួលខ្មាញ់ចេញពីផ្ទះខាងលើ ហើយភ្លាមនោះ ម្ចាស់ផ្ទះ ក៏បានរត់ចេញមកខាងក្រៅស្រែកឆោឡោ ហៅអ្នកជិតខាងឱ្យជួយ ដោយស្រែកថាភ្លើងឆេះផ្ទះហើយៗ ធ្វើឱ្យប្រជាពលរដ្ឋជិតខាង មានការភ្ញាក់ផ្អើល នាំគ្នាជួយដងទឹកទៅជះពន្លត់តាមលទ្ធភាព ប៉ុន្តែមិនអាចសង្គ្រោះបានឡើយ ដោយសារតែភ្លើងបាន ចាប់ផ្តើមឆេះឡើងយ៉ាងសន្ធោសន្ធៅ ទីបំផុតលំនៅដ្ឋានមួយខ្នងខាងលើ ក៏ត្រូវភ្លើងលេបត្របាក់គ្មានសល់តែម្តង។
ប្រភពដដែលបន្តថា នៅក្នុងហេតុការណ៍នោះ ប្រជាពលរដ្ឋក៏បានរាយការណ៍សុំអន្តរាគមន៍ពីសមត្ថកិច្ច បញ្ជូនរថយន្តពន្លត់អគ្គិភ័យមកជួយបាញ់ទឹកពន្លត់ដែរ តែដោយសារចំងាយផ្លូវឆ្ងាយ ហេតុនេះទម្រាំឡានទឹកមកដល់ ផ្ទះខាងលើត្រូវភ្លើងឆេះអស់ទៅហើយ។
តាមការអះអាងរបស់ម្ចាស់ផ្ទះរងគ្រោះ បានឱ្យដឹងថា អគ្គិភ័យខាងលើនេះ បានបង្កឱ្យលំនៅដ្ឋានរបស់គាត់១ខ្នង ត្រូវខូចខាតទាំងស្រុង និងឆេះលុយខ្មែរចំនួន២លានរៀល អង្ករ១បាវ អត្តសញ្ញាណប័ណ្ណសញ្ជាតិខ្មែរចំនួន២សន្លឹក សៀវភៅគ្រួសារចំនួន១ក្បាល ភួយ មុង និងសម្ភារៈ ក្នុងផ្ទះមួយចំនួនទៀត៕