ខេត្តក្រចេះ ៖ នារីវ័យក្មេងរូបស្រស់២នាក់ បានកើតមានទំនាស់ពាក្យសម្តីនឹងគ្នា រហូតកើតជាអំពើហិង្សា វាយតប់ខ្វាចគ្នាទៅវិញទៅមក បណ្តាលឱ្យភាគីម្ខាងរងរបួសស្នាមនៅលើផ្ទៃមុខ ចំណែកភាគីម្ខាងទៀត ត្រូវបានសមត្ថកិច្ចចាប់ឃាត់ខ្លួន បង្កឱ្យមានការភ្ញាក់ផ្អើលឡើងកាលពី យប់ថ្ងៃទី០៩ ខែកញ្ញា ឆ្នាំ២០១៨ នៅចំណុចមុខផ្ទះជួលផ្សារការបី ភូមិគ្រញូងសែនជ័យជើង ឃុំគ្រញូងសែនជ័យ ស្រុកស្នួល។
នារីរងគ្រោះ ដែលត្រូវគូទំនាសខ្វាចរយះមុខ មានឈ្មោះហ្គេច ទ្បាង អាយុ២២ឆ្នាំ រស់នៅក្នុងភូមិគ្រញូងសែនជ័យជើង ឃុំគ្រញូង សែនជ័យ ស្រុកស្នួល។ ចំណែកនារីសង្ស័យឈ្មោះម៉ី ចំរើន ហៅស្រីកា អាយុ១៧ឆ្នាំ រស់នៅភូមិឃុំជាមួយគ្នា។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ កាលពីយប់ថ្ងៃទី០៩ ខែកញ្ញា ឆ្នាំ២០១៨ គេឃើញនារីទាំង២នាក់ខាងលើ បានកើតមានទំនាស់ពាក្យសម្តីនឹងគ្នា ប៉ុន្តែមិនដឹងផ្តើមចេញពីមូលហេតុអ្វីឱ្យពិតប្រាកដនោះឡើយ។ លុះក្រោយពីទាស់សម្តីគ្នាមួយប៉្រាវរួចមក ស្រាប់តែឈានដល់អំពើហិង្សាប្រតាយប្រតប់គ្នា រហូតធ្វើឱ្យភាគីនារីរងគ្រោះឈ្មោះហ្គេច ឡាង ទទួលរងរបួសលើពេញផ្ទៃមុខ (ស្នាមខ្វាច នឹងក្រចក) តែម្តង។
ក្រោយកើតហេតុ មកដល់វេលាព្រឹកថ្ងៃទី១០ ខែកញ្ញា ឆ្នាំ២០១៨ ទើបភាគីជនរងគ្រោះ បានមកដាក់ពាក្យបណ្តឹងនៅប៉ុស្តិ៍នគរបាល រដ្ឋបាល គ្រញូងសែនជ័យ ដើម្បីឱ្យជួយអន្តរាគមន៍។
បន្ទាប់ពីទទួលបានពាក្យបណ្តឹងពីភាគីរងគ្រោះរួចមក សមត្ថកិច្ចក៏បានធ្វើការកោះហៅភាគីទាំងសងខាង មកធ្វើការសាកសួរ ដើម្បីបន្តតាមនីតិវិធី៕