ខេត្តកំពង់ស្ពឺ ៖ បុរសជាកម្មករផ្សារដែកម្នាក់ បានឡើងទៅផ្សារដំបូលផ្ទះឱ្យគេ លុះពេលលើកដែកឡើងមកលើទាក់នឹងខ្សែបញ្ជូនអគ្គិសនីដែលមានតង់ស្យុងខ្ពស់ ក៏ធ្វើឱ្យឆ្លងចរន្តឆក់ស្លាប់យ៉ាងអាណោចអាធ័ម បង្កឱ្យមានការភ្ញាក់ផ្អើលឡើង កាលពីវេលាម៉ោង២និង៣០នាទី រសៀល ថ្ងៃទី១០ ខែកញ្ញា ឆ្នាំ២០១៨ នៅចំណុចភូមិក្រាំងស្វាយ ឃុំរលាំងគ្រើល ស្រុកសំរោងទង។
បុរសរងគ្រោះដែលត្រូវចរន្តអគ្គិសនីឆក់ស្លាប់ មានឈ្មោះសយ ពៅ អាយុ៤៩ឆ្នាំ មុខរបរជាងផ្សារដេក មានលំនៅក្នុងភូមិព្រៃសាលា ឃុំរលាំងគ្រើល ស្រុកសំរោងទង។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ ជនរងគ្រោះ រួមនឹងមេជាង បាននាំគ្នាចេញទៅផ្សារដំបូលផ្ទះឱ្យម្ចាស់ផ្ទះម្នាក់ឈ្មោះចាន់ ចំរើន អាយុ៤៨ឆ្នាំ នៅចំណុចភូមិឃុំកើតហេតុខាងលើ។ លុះទៅដល់ជនរងគ្រោះ ក៏បានឡើងទៅលើដំបូលដើម្បីផ្សារដែក និងត្រូវមេជាងហុចដែកឱ្យ ដើម្បីលើកឡើងទៅផ្សារ ស្រាប់តែអកុសល ជនរងគ្រោះលើកដែកឡើងលើ ដោយខ្វះការប្រុងប្រយ័ត្ន មិនឃើញខ្សែភ្លើងនៅក្បែរនោះ ក៏ធ្វើឱ្យដែកបានទៅទាក់ជាមួយនឹងខ្សែបញ្ជូនអគ្គិសនីដែលមានតង់ស្យុងខ្ពស់ ទើបបណ្តាលឱ្យឆក់ជនរងគ្រោះស្លាប់ ភ្លាមៗនៅនឹងកន្លែងកើទហេតុតែម្តង។
ក្រោយកើតហេតុ ជនរងគ្រោះត្រូវបានគេរៀបចំដឹកបញ្ជូនទៅកាន់មន្ទីរពេទ្យ ដើម្បីសង្គ្រោះជីវិតដែរ តែអកុសលជនរងគ្រោះ បានដាច់ខ្យល់ស្លាប់បាត់ទៅហើយ៕