ខេត្តកំពង់ចាម ៖ បុរសម្នាក់អុំទូកទៅ ច្រូតស្មៅគោបានស្លាប់ដោយលង់ទឹក នៅចំណុចទួលត្រដក់ពង ស្ថិតក្នុងភូមិកំពង់ស្តីក្នុង ឃុំកំពង់រាប ស្រុកកោះសូទិន កាលទីថ្ងៃទី១១ ខែកញ្ញា ឆ្នាំ២០១៨ ម៉ោងប្រហែល៣រសៀលបង្កឱ្យមានការភ្ញាក់ផ្អើលឡើង។
ប្រភពព័ត៌មានពីសមត្ថកិច្ចស្រុកកោះសូទិន ឱ្យដឹងថា ជនរងគ្រោះឈ្មោះភឿង ផា ភេទប្រុស អាយុ៤៩ឆ្នាំ ជនជាតិខ្មែរ នៅភូមិកំពង់ស្តីលើ ឃុំកំពង់រាប ស្រុកកោះសូទិន ខេត្តកំពង់ចាម។
មុនជួបមរណភាពនេះជនរងគ្រោះ បានអុំទូកទៅច្រូតស្មៅគោនៅចំណុចខាងលើ ក៏ធ្លាក់ទឹកស្លាប់ទៅ សង្ស័យខ្យល់គរ លុះក្រុមគ្រួសាររកសពឃើញក៏រាយការទៅប៉ូលិសឱ្យចុះពិនិត្យ។
ក្រោយពីទទួលបានព័ត៌មានភ្លាមកម្លាំង ជំនាញអធិការដ្ឋាននគរបាលស្រុកកោះសូទិន សហការជាមួយកម្លាំងប៉ុស្តិ៍នគរបាលរដ្ឋបាល កំពង់រាប ចុះដល់កន្លែងកើតហេតុ បង្កើតគណៈកម្មធិការត្រួតពិនិត្យសព ដោយមានការចូលរួមពីគ្រូពេទ្យ មេភូមិ ក្រុមប្រឹក្សាឃុំ។
បន្ទាប់ពីធ្វើកោសល្យវិច្ច័យរួច គ្រូពេទ្យជំនាញបានអះអាងថា សពពិតជាខ្យល់គរធ្លាក់ទឹកស្លាប់មែន ដោយរកមិនឃើញស្លាក់ស្នាម អ្វីពាក់ព័ន្ធដល់ឃាត់កម្មនោះទេ យោងតាមការបំភ្លឺរបស់គ្រួសារសព និងសាក្សីទៅជាមួយឱ្យដឹងថា ជនរងគ្រោះឈ្មោះភឿង ផា ស្លាប់ដោយលង់ទឹកពិតប្រាកដមែន ពុំមានពាក់ព័ន្ធបទល្មើសព្រហ្មទណ្ឌឡើយ។ បន្ទាប់ពីធ្វើកោសល្យវិច័យ ចប់សព្វគ្រប់សមត្ថកិច្ចក៏បានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី៕