ខេត្តកោះកុង ៖ បុរសចំណាស់ម្នាក់ បានអង្គុយព័ទ្ធវង់ជល់កែវជាមួយមិត្តភក្តិឡើងស្រវឹងធ្លាក់ភ្នែក ទើបដើរត្រឡប់មកផ្ទះវិញ តែអកុសលមកដល់ពាក់កណ្តាលផ្លូវ ស្រាប់តែរអិលជើងធ្លាក់ទឹក បណ្តាលឱ្យលងស្លាប់យ៉ាង អាណោចអាធ័ម បង្កឱ្យមានការភ្ញាក់ផ្អើលនៅវេលាម៉ោង ៤និង១៥នាទីល្ងាច នៅចំណុចកំពង់ទូក (ខ្មែរលើ) ស្ថិតក្នុងភូមិដីទំនាប ឃុំត្រពាំងរូង ស្រុកកោះកុង។
ជនរងគ្រោះដែលស្រវឹងស្រាដើរធ្លាក់ទឹក លង់ស្លាប់នេះ ឈ្មោះមោក លិៈ ភេទប្រុស អាយុ៥៥ឆ្នាំ មានលំនៅភូមិ-ឃុំកើតហេតុខាងលើ។
តាមប្រភពពីកន្លែងកើតហេតុ បានឱ្យដឹងថា ជនរងគ្រោះចូលចិត្តផឹកស្រាណាស់ ឃើញតែផឹកស៊ី ស្រវឹងធ្លាក់ភ្នែកស្ទើររាល់ថ្ងៃ។ តែយ៉ាងណា ជនរងគ្រោះនៅតែមានសមត្ថភាពធ្វើការរកប្រាក់ដូចជាមនុស្សដទៃទៀតដែរ ហើយក៏មិនធ្លាប់ជួបគ្រោះកំណាចណាមួយដែរ។ លុះពេលមានអ្នកភូមិដើរឆ្លងកាត់នៅទីនោះ ស្រាប់តែប្រទះឃើញជនរងគ្រោះលង់ទឹកស្លាប់បាត់ទៅហើយ ក៏បង្កឱ្យមានការភ្ញាក់ផ្អើល និងរាយការណ៍ប្រាប់សមត្ថកិច្ចចុះអន្តរាគមន៍តែម្តង។
ក្រោយពីទទួលបានដំណឹងនេះ កម្លាំងប៉ុស្តិ៍នគរបាលរដ្ឋបាលត្រពាំងរូង និងកម្លាំងជំនាញព្រហ្មទណ្ឌនៃអធិការដ្ឋាននគរបាលស្រុក បានសហការជាមួយអាជ្ញាធរមូលដ្ឋាន និងក្រុមគ្រូពេទ្យប្រចាំមណ្ឌលសុខភាពត្រពាំងរូង ចុះទៅធ្វើកោសល្យវិច័យសពជនរងគ្រោះ។ ក្រោយពិនិត្យរួចឃើញថា ជនរងគ្រោះខាងលើពិតជាបានស្លាប់ដោយសារស្រវឹងស្រាធ្លាក់ទឹកស្លាប់ពិតប្រាកដមែន មិនមានជាប់ពាក់ព័ន្ធករណីអ្វីផ្សេងឡើយ៕