យ៉ែម ស្រីពេជ្រ ដែលជាមិត្តភក្តិដ៏ជិតដិតបំផុតរបស់នាងរចនា នោះ ទីបំផុតបានធ្វើឱ្យរចនា ឈឺចាប់យំបង្ហូរទឹកភ្នែកតែម្នាក់ឯង ព្រោះតែត្រូវនាងស្រីពេជ្រ ឆក់យកប្តីរបស់នាងទៅបាត់ ដោយគ្មានគិតគូរថា ជាប្តីរបស់មិត្តភក្តិឡើយ។
យ៉ែម ស្រីពេជ្រ បានឱ្យដឹងថា “រឿងនាងដណ្តើមប្តីរបស់រចនា នោះ គឺជាការពិត តែនោះគ្រាន់តែនៅក្នុងសាច់រឿង “មិត្តប្ញស្យា” របស់ផលិតប៉ុស្តិ៍លេខ៥ ប៉ុណ្ណោះ តែធាតុពិតនៅក្រៅឆាកនាងមិនចូលចិត្តរបស់គេឡើយ។
ស្រីពេជ្រ រៀបរាប់ថា “នៅក្នុងរឿងនោះ នាងសម្តែងជាតួឈ្មោះបូរមី ជាមិត្តភក្តិរបស់រចនា សម្តែងជាតួឈ្មោះសូនីតា ហើយនាងជាតួច្រណែនឈ្នានីស មិត្តភក្តិគិតតែពីផលប្រយោជន៍ផ្ទាល់ខ្លួន មិនខ្វល់ពីអ្នកដទៃមានទុក្ខឡើយ ចូលចិត្តភាពហ៊ឺហាស្រណុកស្រួល ទើបដណ្តើមប្តីមិត្តភក្តិ”។
តារាសម្តែងស្រអែមស្រស់រូបនេះ បានឱ្យដឹងទៀតថា “កុំថាឡើយសម្តែងដណ្តើមប្តីមិត្តភក្តិ ទោះជាសម្តែងដេកដួលលើដីភក់ ក៏នាងមិនខ្លាចសម្តែងដែរ ព្រោះនោះគ្រាន់តែជាសិល្បៈប៉ុណ្ណោះ មិនមែនជាចរិតពិតរបស់នាងឡើយ”។
ដោយឡែក នាងរចនា វិញ បានឱ្យដឹងថា “ក្នុងរឿងនេះ នាងយំឡើងហើយភ្នែកអស់ទៅហើយ ព្រោះតែឈឺចាប់ត្រូវបាត់ប្តី ដោយសារតែមិត្តភក្តិ គឺនាងបូរមី ឆក់ប្តីទៅបាត់នោះ”។
រចនា បានឱ្យដឹងថា “មិត្តភក្តិក៏ដោយ សម័យនេះហើយ កុំទុកចិត្តខ្លាំងពេក ឱ្យតែប្រហែស គឺគេយកបាត់ហើយ។ ចំណែកប្រុសសង្ហា ដែលត្រូវស្រីៗច្បាំងគ្នាដណ្តើមបេះដូងលោកមុំ សុធារ៉ា សម្តែងជាតួឈ្មោះផាន់ សារ៉ា នោះ បានឱ្យដឹងដែរថា “ក្នុងរឿងនេះ លោកសម្តែងជាតួស្ថាបត្យករ មានជំនាញខាងសិល្បៈ ដែលមានឪពុកជាប្រធានក្រុមហ៊ុនមួយ។ ចំពោះភាពសាវា យកទាំងមិត្តភក្តិប្រពន្ធទៀតនោះ គឺមានតែក្នុងរឿងប៉ុណ្ណោះ តាមពិតនៅក្រៅឆាកវិញ លោកជាបុរសម្នាក់សុភាពខ្លាំងណាស់ មិនចេះកេងចំណេញលើស្រីៗឡើយ។
រឿង “មិត្តប្ញស្សា” បានធ្វើពិធីសែនក្រុងពលី កាលពីព្រឹកថ្ងៃទី០២ ខែតុលា ឆ្នាំ២០១៨ នៅ ស្ថានីយទូរទស្សន៍ប៉ុស្តិ៍លេខ៥ បរិវេណសណ្ឋាគារសូហ្វីតែល រាជធានីភ្នំពេញ ដោយមានតារាសម្តែង និងអ្នកសារព័ត៌មានជាច្រើនចូលរួមផងដែរ។
លោកស៊ិន សុផាត ប្រធានគណៈកម្មការត្រួតពិនិត្យកម្មវិធីរបស់ប៉ុស្តិ៍លេខ៥ បានឱ្យដឹងថា “រឿង “មិត្តប្ញស្យា” នេះ គឺជារឿងល្បីរបស់ថៃ ដែលប៉ុស្តិ៍លេខ៥ យកមកកែច្នៃឱ្យទៅជារឿងខ្មែរ ហើយរឿងនេះ គ្រោងថតពី៣ទៅ៤ខែកន្លះ និងមាន៣០ទៅ៣៥ភាគ”។
លោកសុផាត អះអាងទៀតថា “នេះជារឿង ភាគខ្មែរទី១៣ ហើយដែលប៉ុស្តិ៍លេខ៥ បានផលិត ហើយផ្ទៃរឿងទាំងមូល គឺចង់ឆ្លុះបញ្ចាំងអប់រំទៅលើការច្រណែនឈ្នានីសគ្នា ធ្វើឱ្យសង្គមអាប់ឱន គ្មានការរីកចម្រើននោះទេ។ រឿងនេះថតចប់ ទើបដាក់បញ្ចាំងនៅដើមឆ្នាំ២០១៩ ខាងមុខនេះ”។
ក្រៅពីនាងយ៉ែម ស្រីពេជ្រ, រចនា និងលោកមុំ សុទ្ធារ៉ា ជាតួឯកនោះ រឿង “មិត្តប្ញស្យា” ក៏មានការចូលរួមសម្តែងពីតារាល្បីៗជាច្រើនដួងទៀត មានដូចជា នាងម៉ានិកា, អាង សុនិតា, មូណា, នីតា វីរវង្ស, កុសីមា លីនដា, ងិន សុធារ៉ា, ព្រីម មន្ថា, សួង សោភា, ញឹម សុខា, លីលី, លោកសុធា ពិសិដ្ឋ, លឹម រដ្ឋា វ៉ាយុទ្ធ, លាង ឧត្តម និងសុវណ្ណ ជាដើម៕
