ភ្នំពេញ ៖ កាលពីវេលាម៉ោង៤ល្ងាច ថ្ងៃទី១៨ ខែតុលា ឆ្នាំ២០១៨ បុរសជាជាងជួសជុលរថយន្តប្រចាំក្រុមហ៊ុនម្នាក់ ឡើងទៅជួសជុលអំពូលភ្លើងហ្វាដែលបានដាច់ខូច ក៏ភ្លាត់ស្នៀតឆក់ធ្លាក់ស្លាប់ទៅវិញ ហេតុការណ៍នេះកើតឡើងក្នុងក្រុមហ៊ុនមួយកន្លែង អត់មានដាក់ស្លាកយីហោ ស្ថិតនៅតាមផ្លូវទំនប់កប់ស្រូវ ភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ។
ជនរងគ្រោះមានឈ្មោះ គួយ មនោ ភេទប្រុស អាយុ២២ឆ្នាំ មុខរបរជាងជួសជុលរថយន្ត ផ្នែកខាងប្រព័ន្ធភ្លើង នៅក្រុមហ៊ុនខាងលើ មានស្រុកកំណើតនៅផ្ទះលេខ៥៧ ភូមិអង្វះមួយរយ ឃុំអន្សោង ស្រុកកំពង់ត្របែក ខេត្តព្រៃវែង ។
តាមការឲ្យដឹងពីបុគ្គលិករួមការងារជាមួយជនរងគ្រោះ បានឲ្យដឹងថា មុនពេលកើតហេតុ ជនរងគ្រោះឃើញអំពូលភ្លើងហ្វានៅកន្លែងក្រុមហ៊ុនបានខូចដាច់រលត់ ពេលនោះជនរងគ្រោះបានដាក់ជណ្តើរឡើងមើលលើបង្គោល មានកម្ពស់ជាង៣ម៉ែត្រ បំណងជួសជុល ពេលនោះជនរងគ្រោះបានលូកដៃចំខ្សែភ្លើងដែលមានតំណ បណ្តាលឲ្យឆក់ធ្លាក់មកដី សន្លប់ស្តូកស្តឹង ទើបនាំគ្នាឆោឡោជួយដឹកជនរងគ្រោះទៅគ្លីនិក ឡាំ ប៊ុនថន ក្បែរផ្សារជម្ពូវ័ន។ ប៉ុន្តែគួរឲ្យសោកស្តាយ ជនរងគ្រោះបានស្លាប់តាមផ្លូវ មុនដល់គ្លីនិក ប៉ុន្តែមិនអស់ចិត្ត ក៏ដឹកទៅដល់គ្លីនិក ក្រុមគ្រូពេទ្យក៏បានប្រាប់ថា ជនរងគ្រោះបានស្លាប់បាត់បង់ជីវិតទៅហើយ ទើបនាំគ្នាដឹកសពយកមកកន្លែងក្រុមហ៊ុនវិញ រួចរាយការណ៍ប្រាប់សមត្ថកិច្ច ចុះទៅពិនិត្យមើល។
ក្រោយពីបានធ្វើកោសល្យវិច័យរួចរាល់ សមត្ថកិច្ចបានបញ្ជាក់ប្រាប់ថា ជនរងគ្រោះពិតជាបានស្លាប់ដោយសារភ្លើងឆក់ប្រាកដមែន ហើយក៏បានប្រគល់សាកពឥ្យក្រុមហ៊ុន និងក្រុមគ្រួសារ ចាត់ចែងធ្វើបុណ្យតាមប្រពៃណី៕