ដោយសារមាស សុខសោភា មិនស្អាត ទើបសាន ផានិត បដិសេធចាប់ដៃគូច្រៀងឆ្លងឆ្លើយ

មាស សុខសោភា ដែលត្រូវបានគេចាត់ទុកថា ជាកំពូលតារាចម្រៀងម្នាក់របស់ផលិតកម្មថោន នាពេលបច្ចុប្បន្ននោះ តាមពិត នាងក៏ធ្លាប់រងភាពអាម៉ាសដោយអតីតតាចម្រៀងល្បីឈ្មោះម្នាក់ បានប្រកែកយ៉ាងដាច់អហង្ការ មិនព្រមចាប់ដៃគូជាមួយនាងជាដាច់ខាត កាលពី១០ឆ្នាំមុន។

ប៉ុន្តែអ្វីដែលមានការប្រែប្រួល គឺនៅឆ្នាំ២០១៨នេះ តារាចម្រៀងដែលអាងខ្លួនល្បី មិនចង់ឱ្យមាស សុខសោភា តោងកាលីពរបស់ខ្លួននោះ បែរជាបង្ហាញវិប្បដិសារៈទៅវិញ ព្រោះតែខ្លួនមិននឹកស្មានថា សោភា ឡើងមកដល់ចំណុចនេះ។

តារាចម្រៀងដែលកាលពីឆ្នាំ២០០៨ បដិសេធច្រៀងឆ្លងឆ្លើយជាមួយមាស សុខសោភា នោះ គ្មានអ្នកណាក្រៅពីអ្នកចម្រៀងលេងស្ទីលប្រចាំត្រកូល គឺកោរត្រងោលនោះ គឺតារាចម្រៀងសាន ផានិត ឡើយ។

អតីតតារាចម្រៀងល្បីឈ្មោះរបស់ផលិតកម្មរស្មីស្ទឹងសង្កែ និង U2 លោកសាន ផានិត បានប្រាប់អ្នកកាសែតថា ខ្លួនត្រូវថៅកែផលិតកម្មតម្រូវឱ្យចាប់ដៃគូច្រៀងឆ្លងឆ្លើយជាមួយមាស សុខសោភា ដើម្បីឱ្យប្លែកភ្នែក តែកាលនោះ លោកបានគ្រវីក្បាល និងថា មិនព្រមច្រៀងជាមួយសោភា នោះទេ ហើយហេតុផលដែលលោកហ៊ានប្រឆាំងជាមួយលោកថៅកែបែបនេះ មិនមែនថា កាលនោះសំឡេងសោភា នៅស្ទើរ ឬមិនស៊ីគ្នាជាមួយសំឡេងលោកទេ តែមកពីកាលនោះ មាស សុខសោភា មិនសូវស្អាត។ ប៉ុន្តែពេលនេះ មាស សុខសោភា កាន់តែល្បី ហើយរូបសម្រស់ក៏មានការប្រែប្រួលក្លាយទៅជាស្រីស្អាតនៅថោន នោះ ទើបធ្វើឱ្យលោកដេកស្តាយក្រោយ មិនគួរណារូបគេប្រកែកមិនច្រៀងជាមួយមាស សុខសោភា នៅពេលនោះសោះ ព្រោះពេលនេះខ្លួនដែលធ្លាប់តែល្បីខ្លាំង មើលមិនសូវឃើញអ្នកមិនសូវល្បីនោះ បែរជាសោភា ឡើងដល់កំពូល តែសាន ផានិត ខ្លួនឯងបែរជាធ្លាក់កូដហៅសឹងតែមិនឮទៅវិញ។

តាមរយៈការអះអាងរបស់សាន ផានិត ប្រាប់អ្នកកាសែតនេះ ជាបទពិសោធន៍មួយ សម្រាប់តារាសិល្បករទាំងឡាយ មិនត្រូវមើលស្រាល និងរើសអើងចំពោះអ្នកមិនសូវល្បី ដោយអាងតែខ្លួនឯងល្បីនោះទេ ព្រោះសិល្បៈរលកក្រោយច្រានរលកមុន ដូចការអះអាង នាពេលកន្លងមករបស់លោកឡាយ សុខហុក ថៅកែផលិតកម្មដសាន់ដេ បានឱ្យដឹងថា ថ្ងៃណាមួយនឹងមានតារាល្បីរះមកដោយយើង ទាំងអស់គ្នាមិនបានដឹងជាមុនឡើយ…។

ដោយឡែក តារាចម្រៀងសាន់ដេ សុខ ពិសី វិញ ធ្លាប់ប្រាប់អ្នកយកព័ត៌មានយើងថា សម្រាប់ដៃគូច្រៀងឆ្លងឆ្លើយ នាងមិនដែលរើសអើង ឬប្រកាន់ថា អ្នកចាស់ឬថ្មីនោះទេ ឱ្យតែផលិតកម្មតម្រូវ គឺនាងអាចច្រៀងបានទាំងអស់។

បើទោះជាមាស សុខសោភា ធ្លាប់បាក់មុខ ដោយសារសាន ផានិត មិនព្រមចាប់ដៃច្រៀងជាមួយក្តី តែកាលពីឆ្នាំ២០១៦ មានព័ត៌មានថា កំពូលតារាចម្រៀងផលិតកម្មរស្មីហង្សមាស គឺលោកព្រាប សុវត្ថិ ចង់ចាប់ដៃច្រៀងឆ្លងឆ្លើយជាមួយសុខសោភា ដោយលោកស្ទើរតែក្លាយទៅជាតារាថោន ទៀតផង តែក្រោយមក ហង្សមាស សុំចរចាយកតារាសំខាន់របស់ខ្លួន ដែលល្បីជាង២០ឆ្នាំនេះមកវិញ។

តារាចម្រៀងផលិតកម្មថោន ម្នាក់ បានបង្ហើបឱ្យដឹងថា កុំអីមាស សុខសោភា ក្លាយទៅជា តារាចម្រៀងចាប់ដៃគូជាមួយព្រាប សុវត្ថិ ទៅហើយ មិនមែនជាមួយសាន ផានិត នោះទេ។

មាស សុខសោភា នៅតែឈរជើងបានជា អ្នកចម្រៀងស្រីនាំមុខគេនាពេលបច្ចុប្បន្ន ដែលតម្លៃប្រដមប្រសងជាមួយឱក សុគន្ធកញ្ញា និងពេជ្រ សោភា។ ប៉ុន្តែសោភា មានប្រៀងជាងតារាទាំង២នោះ ព្រោះនាងច្រៀង២ផលិតកម្មព្រមគ្នា គឺថោន និង Camtrax ។

យ៉ាងណា ចំណងស្នេហាមាស សុខសោភា និងអាណិកជនខ្មែរ នៅកាដាណា លោកអ៊ឹត រ៉ាដា ដែលរួមរស់ក្រោមដំបូលតែមួយ រយៈពេល១១ឆ្នាំ នៅតែគ្មានពន្លឺចូលរោងការឡើយ៕