ភ្នំពេញ ៖ ភរិយាសំណព្វចិត្តរបស់កំពូលតារាចម្រៀង លោកខេមរៈ សិរីមន្ត ថ្មីៗនេះ ទើបនឹងសម្រាលបានកូនស្រីទី៣ថែមម្នាក់ទៀត ជូនស្វាមីជាទីស្រលាញ់ ធ្វើឱ្យតារាចម្រៀងល្បីឈ្មោះរូបនេះ ពេញចិត្តយ៉ាងខ្លាំង រហូតញញឹមបិទមាត់មិនជិតឡើយ ហើយសូម្បីតែតារាចម្រៀងស្រីល្បីឈ្មោះ ឱក សុគន្ធកញ្ញា ក៏ឆ្លៀតពេលទៅសួរសុខទុក្ខ អបអរសាទរ និងលើកសរសើរថា មុខមាត់កូនស្រីរបស់លោកខេមរៈ សិរីមន្ត ពិតជាគួរឱ្យក្នាញ់ខ្លាំងណាស់។
តារាចម្រៀងឱក សុគន្ធកញ្ញា កាលពីថ្ងៃទី ២៩ ខែវិច្ឆិកា ឆ្នាំ២០១៨ បានបង្ហោះរូបភាពចំនួន៣សន្លឹក តាមទំព័រហ្វេសប៊ុករបស់នាងបង្ហាញពីមុខមាត់កូនស្រីរបស់តារាចម្រៀងខេមរៈ សិរីមន្ត ដែលទើបនឹងសម្រាលបាន ៣ថ្ងៃ ជាមួយសំណេរខ្លីថា “ថ្ងៃនេះ បានឆ្លៀតចូលលេងក្មួយស្រី (មន្តរាជិនី) មុខគួរឱ្យក្នាញ់ណាស់…”។
ជាការឆ្លើយតបទៅវិញភ្លាមៗ តារាចម្រៀងខេមរៈ សិរីមន្ត ក៏បានបង្ហោះសារមួយទៅកាន់ឱក សុគន្ធកញ្ញា ដែលមានខ្លឹមសារថា ”ក្មួយរាជិនី សូមអគុណម៉ាក់មីង ដែលបានមកលេងក្មួយ… love ម៉ាក់មីង so much…”។
ដោយឡែក កាលពីថ្ងៃទី២៨ ខែវិច្ឆិកា ឆ្នាំ ២០១៨ លោកខេមរៈ សិរីមន្ត បានបង្ហោះរូបថតចំនួន២សន្លឹក បង្ហាញពីការគ្រឺតក្នាញ់ចំពោះកូនស្រីពៅសំណព្វចិត្តរបស់ខ្លួន ជាមួយសំណេរបញ្ជាក់ពីទឹកចិត្តរបស់ខ្លួនជាស្វាមីជូនចំពោះភរិយាជាទីស្រលាញ់ថា “អរគុណអូន បងស្កប់ស្កល់ណាស់ នូវគ្រប់យ៉ាងដែលអូនផ្តល់ឱ្យបង ជាពិសេស កូនទាំងបីនាក់របស់យើង…”។
គួរបញ្ជាក់ថា លោកខេមរៈ សិរីមន្ត គឺជាតារាចម្រៀងប្រុសលំដាប់កំពូលមួយរូប ដែលទទួលបានការគាំទ្រពីទស្សនិកជន អស់រយៈពេលជាង១០ឆ្នាំមកហើយ ក្រោយពេលចូលប្រឡូកក្នុងវិស័យសិល្បៈ និងមានកេរ្តិ៍ឈ្មោះល្បីល្បាញនៅលើវិថីមួយនេះ ប៉ុន្តែលោកតែងព្យាយាមលាក់បាំងនូវរឿងរ៉ាវផ្ទាល់ខ្លួន ពិសេសចំណងស្នេហ៍ជាមួយភរិយាស្របច្បាប់របស់ខ្លួន។
រហូតមកដល់អំឡុងដើមឆ្នាំ២០១៨ ទើបតារាចម្រៀងខេមរៈ សិរីមន្ត បានដាច់ចិត្តលាតត្រដាងការពិត ដោយអះអាងថា លោកពិតជាមានប្រពន្ធ និងកូនរួចទៅហើយមែន។ លោកខេមរៈ សិរីមន្ត ថែមទាំងបានបញ្ជាក់ទៀតថា ក្រៅតែពីបានរៀបការដោយស្របច្បាប់ជាមួយភរិយា ដែលមានដើមកំណើតនៅខេត្តកំពង់ឆ្នាំង ហើយនោះ គឺលោកមានកូនប្រុសស្រី ចំនួន២នាក់ ជាចំណងដៃផងដែរ ហើយបូករួមទាំងកូនស្រីដែលទើបនឹងវះកាត់សម្រាលនៅមន្ទីរពេទ្យរ៉ូយ៉ាល់ភ្នំពេញ នេះម្នាក់ទៀត គឺសរុបទៅ លោកមានកូនចំនួន៣នាក់ (ប្រុស១ ស្រី២)។
កូនប្រុសស្រីទាំង៣នាក់ របស់តារាចម្រៀងខេមរៈ សិរីមន្ត រួមមាន កូនប្រុសច្បងឈ្មោះ ខេមរៈ មន្តស្នេហ៍ អាយុ៥ឆ្នាំ កូនស្រីទី២ ឈ្មោះ ខេមរៈ ស្ត្រី មានវ័យជាង២ឆ្នាំ រីឯកូនស្រីពៅ ដែលទើបនឹងសម្រាលនេះ មានឈ្មោះខេមរៈ មន្តរាជិនី៕