អតីត Frehie Girl លេខ១ កាលពីឆ្នាំ២០១៣ កញ្ញាស៊ីន យូប៊ីន ពិតជាមានរូបសម្រសិ់នចាញ់តារាបរទេសឡើយ តាមរយៈការបង្ហាញខ្លួនក្នុងកម្មវិធីសម្ពោធ Global House កាលពីព្រឹកថ្ងៃទី០១ ខែធ្នូ។ ទាំងភ្ញៀវជាតិ និងអន្តរជាតិ សុទ្ធតែចោលភ្នែកក្រឡេកមើលយូប៊ីន ដោយមិនដាក់ភ្នែកក្នុងឈុតប្រពៃណីសំពត់ ឆែកនៅក្បាលជង្គង់បញ្ចោញសាច់សខ្ចីនោះ ហើយគ្រប់គ្នានិយាយថា ពិតជាស្អាតគួរឱ្យក្នាញ់មែន។
ប៉ុន្តែអ្វីដែលគួរឱ្យចាប់អារម្មណ៍នោះ គឺស្រីស្រស់សាច់សខ្ចី ស៊ីន យូប៊ីន បង្ហាញភាពស្និទ្ធស្នាលកាន់តែខ្លាំងជាមួយប្រុសសង្ហាខាត់ វ៉ៃហាំង ដែលសកម្មភាពពួកគេហាក់ដូចជាគូស្នេហ៍អ៊ីចឹង។ ប្រុសៗមិនតិចទេដែលច្រណែនវ៉ៃហាំង ដែលស្អិតល្មួតជាមួយយូប៊ីន ដូចសង្សារនេះ ខណៈដែលកន្លងមក មានការសង្ស័យថា ពួកគេរាប់អានគ្នាលើសពីមិត្តភក្តិធម្មតា បើទោះជាទាំងសងខាងធ្លាប់ប្រកែក ដោយអះអាងថា ពួកគេគ្មានអ្វីក្រៅពីមិត្តរួមអាជីពក៏ដោយ។
ប្រភពបានឱ្យដឹងថា យូប៊ីន ទុកចិត្តនិងស្និទ្ធស្នាលតែជាមួយលោកវ៉ៃហាំង ប៉ុណ្ណោះ នៅក្នុងសិល្បៈ ថែមទាំងទៅណាក៏២នាក់ដែរ ទើបធ្វើឱ្យមិត្តភក្តិរួមអាជីពបានជំរុញឱ្យពួកគេស្រលាញ់គ្នាធ្វើជាសង្សារទៅតែទាំងយូប៊ីន និងវ៉ៃហាំង នៅតែអះអាងថា មិនអាចដដែល។
សំណួររបស់មហាជនបានលើកឡើងថា តើស្រីស្អាតស៊ីន យូប៊ីន និងប្រុសសង្ហាខាត់ វ៉ៃហាំង ដែលស្អិតល្មួតគ្នាគ្រប់ពេលបែបនេះ អះអាងថា រាប់អានគ្នាធម្មតាអ្នកណាគេជឿខ្លះទៅ?
ស៊ីន យូប៊ីន ធ្លាប់អះអាងថា នាងរាប់អានគ្នាជាមួយខាត់ វៃហាំង ដោយសារតែបានស្គាល់គ្នាជាយូរមកហើយ តាមរយៈការសម្តែងរឿងជាមួយគ្នាជាច្រើនរឿង ដូចជារឿង “ខ្នោះបេះដូង” របស់ CTN ជាដើម ដែលទស្សនិកជនបានសរសើរថា នាងនិងវ៉ៃហាំង ពិតជាដៃគូសម្តែងដ៏ស័ក្តិសម។
យូប៊ីន ថែមទាំងសរសើរថា វ៉ៃហាំង ជាមនុស្សល្អមិនចេះយកចំណេញលើនាងជាដៃគូឡើយ ហេតុនេះហើយ ទើបនាងទៅណាក៏មិនអាចខ្វះដៃគូម្នាក់នេះបានឡើយ។
ស៊ីន យូប៊ីន ស្ថិតក្នុងចំណោមតារាស្រីវ័យក្មេង ដែលមានរូបសម្រស់ស្អាតលេចធ្លោម្នាក់ ហើយត្រេមុខនាងដូចតារាថៃ។
ស្រីស្អាតយូប៊ីន ក្រៅពីមានទេពកោសល្យសម្តែងបានល្អ នាងក៏អាចធ្វើពិធីការិនីបាន ដោយតារាសាច់ម៉ដ្ឋខៃនេះ ថែមទាំងមិនចាញ់ជីមមី ឡើយ ព្រោះយូប៊ីន ដែលមានឈ្មោះដើមថា “ស្រីដែន” នោះ ក៏អាចនិយាយបានដល់ទៅ៤ភាសាផ្សេងគ្នាដោយចេះ ដោយត្រឹមតែការអានសៀវភៅប៉ុណ្ណោះ។ ភាសាដែលយូប៊ីន អាចនិយាយបានជាផ្លូវការតាមរយៈការធ្វើបិធីការិនី (MC) តាមកម្មវិធីផ្សេងៗគ្នានោះ មានដូចជា ខ្មែរ, ថៃ ឡាវ និងវៀតណាម។ ប៉ុន្តែយ៉ាងណា យូប៊ីន នៅតែអះអាងថា អាជីពសម្តែងជាជំហ៊ានទី១របស់នាងហើយ ការងារ MC នៅតែជាជម្រើសទី២ដដែល ព្រោះថា គេស្គាល់នាងកន្លងមកតាមរយៈសម្តែងច្រើនជាងស្គាល់តាមការធ្វើពិធីការិនី។
បើទោះជាស៊ីន យូប៊ីន កាន់តែធ្វើឱ្យគេសង្ស័យថា នាងមានស្នេហាលួចលាក់ជាមួយលោកខាត់ វ៉ៃហាំង ព្រោះទៅណាក៏ដូចលលកញីឈ្មោលបែបនេះ ក៏ដោយតែតាមព័ត៌មានថា តារាសាច់សខ្ចីល្វក់ដូចបណ្តូលចេកនេះ ត្រូវបានកូនប្រុសលោកឧកញ៉ាមហាសេដ្ឋីម្នាក់ ដែលរកស៊ីធំផ្នែកសណ្ឋាគារ និងលក់សាំងនោះ តាមស្នេហ៍យ៉ាងប្រកិតបំផុត។
អ្នកសិល្បៈជាច្រើននិយាយថា វ៉ៃហាំង អាចប្រឈមការខូចចិត្តប្រសិន បើពន្យាពេលសារភាពស្នេហ៍ស្រីស្អាតយូប៊ីន តទៅទៀត ព្រោះយូប៊ីន មានជម្រើសស្នេហ៍ច្រើនណាស់ពិសេស គឺពិបាកគេចអន្ទាក់ស្នេហ៍កូនលោកឧកញ៉ានោះតែម្តង៕