ខេត្តព្រះសីហនុ៖ ហេតុការណ៍នេះកើតឡើងកាលពីវេលាម៉ោង៧និង១០នាទីយប់ ថ្ងៃទី០៩ ខែធ្នូ ឆ្នាំ២០១៨ នៅចំណុចក្នុងផ្ទះរបស់ជនរងគ្រោះ ស្ថិតក្នុងភូមិថ្មី ឃុំកំពង់សីលា ស្រុកកំពង់សីលា។
បុរសរងគ្រោះដែលត្រូវចរន្តអគ្គិសនីឆ្លងតាមមេក្រូហ្វូនឆក់ស្លាប់ មានឈ្មោះស៊ុម សុភា អាយុ៣២ឆ្នាំ មុខរបរកសិករ មានលំនៅក្នុងភូមិ ឃុំកើតហេតុខាងលើ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ ជនរងគ្រោះបានរៀបចំចាក់ខារ៉ាអូខេនៅក្នុងផ្ទះរបស់ខ្លួន ដើម្បីច្រៀងលេងកម្សាន្តតែម្នាក់ឯង ដោយបានតរាយខ្សែមេក្រូហ្វូន មកដល់លើគ្រែ អង្គុយច្រៀងលេង។ លុះបន្តិចក្រោយមក ខណៈដែលជនរងគ្រោះ កំពុងច្រៀងលេងយ៉ាងសប្បាយ ក៏ស្រាប់តែមេក្រូហ្វូន បានឆ្លងចរន្តអគ្គិសនី បណ្តាលឱ្យឆក់ជនរងគ្រោះធ្លាក់ពីលើគ្រែ ដោយដៃឱបក្បាលមេក្រូហ្វូន ជាប់នឹងដើមទ្រូង (ត្រង់បេះដូង) បណ្តាលឱ្យស្លាប់យ៉ាងអាណោចអាធ័មតែម្តង។
ក្រោយកើតហេតុ ដោយឮតែសំឡេងភ្លេង តែបាត់សំឡេងជនរងគ្រោះយូរពេក ទើបក្រុមគ្រួសារ បានចូលមកមើលក៏ប្រទះឃើញជនរងគ្រោះដេកដួលលើដីក្បែរគ្រែ ទើបដឹងថា ជនរងគ្រោះត្រូវខ្សែភ្លើងឆក់ ក៏ប្រញាប់ដឹកបញ្ជូនមកដល់មណ្ឌលសុខភាពតក្កវិទកំពង់សីលា ដើម្បីសង្គ្រោះដែរ តែពេលដឹកទៅដល់គ្រូពេទ្យពិនិត្យរួច ក៏ប្រាប់ថា ជនរងគ្រោះបានដាច់ខ្យល់ស្លាប់បាត់ទៅហើយ ទើបដឹកសពត្រឡប់មកផ្ទះវិញ រាយការណ៍ប្រាប់សមត្ថកិច្ច ឱ្យចុះមកពិនិត្យតែម្តង៕