Dj Mike ដែលជាតារាសម្ដែងពិធីករ និងមានជំនាញ Dj យ៉ាងស្ទាត់នោះ បានយកជនជាតិថៃ ដែលមានជំនាញរាំ និងល្បីតាមបណ្ដាញសង្គម Sitang Buathong ហៅយាយគ្រវីសក់ មកភ្នំពេញ នៅថ្ងៃទី២១ ខែធ្នូ ឆ្នាំ២០១៨ ដើម្បីចូលរួមសម្ពោធក្លឹប Voulez Vous នៅខាងក្រោយវិទ្យាល័យព្រះស៊ីសុវត្ថិដែលក្លឹបនោះក៏មានភាគហ៊ុនរបស់លោក Mike ផងដែរ។
តាមព័ត៌មានបានឲ្យដឹងថា នេះគឺជាលើកទី១ហើយ ដែលយាយគ្រវីសក់ មកកម្ពុជា ហើយលើកនេះ ក្រៅពីសម្ដែងនៅក្លឹបនោះ អ្នកស្រី Sitang Buathongក៏មានដំណើរកម្សាន្ដទៅខេត្តសៀមរាប ដើម្បីទស្សនាប្រាសាទអង្គរវត្ត និងប្រាសាទមួយចំនួនទៀត។
ក្នុងជំនួបតាមទូរស័ព្ទ Dj Mike បានឲ្យដឹងថា លោកបានទាក់ទងទៅលោកយាយគ្រវីសក់ ដោយសារពេលនេះ គាត់កំពុងមានភាពលេចធ្លោខ្លាំង គេស្គាល់ច្រើន ហើយ Sitang Buathong នឹងមកកម្ពុជា រយៈពេល៣ថ្ងៃ។
លោក Mike ប្រាប់ថា ”ដោយសារខ្ញុំចេះភាសាថៃ ដែរ អ៊ីចឹងមិនមានការពិបាកខ្លាំងទេ ក្នុងការទាក់ទងគាត់មកសម្ពោធក្លឹបនោះ គាត់នឹងមកដល់កម្ពុជា នៅថ្ងៃទី២១ ខែធ្នូ ហើយសម្ដែងរាំនៅក្លឹបខ្ញុំ ចាប់ពីម៉ោង៩យប់តទៅ។ នេះជាលើកដំបូងហើយសម្រាប់គាត់មកកម្ពុជា ហេតុនេះហើយ ខ្ញុំនឹងនាំគាត់ទៅទស្សនាប្រាសាទអង្គរវត្ត នៅខេត្តសៀមរាប ហើយគាត់ក៏មានកម្មវិធីសម្ដែងនៅទីនោះដែរ។ ខ្ញុំសង្ឃឹមថា នឹងមានយុវវ័យជាច្រើនមកទស្សនាការរាំរបស់គាត់នៅក្លឹបរបស់ខ្ញុំ តែមិនមែនថា គេស្រលាញ់គាត់ទាំងអស់នោះទេ ព្រោះមានអ្នកមានអ្នកខ្លះស្រលាញ់ចូលចិត្ត អ្នកខ្លះក៏មិនចូលចិត្តគាត់ដែរ”។
តាមព័ត៌មានបានឲ្យដឹងថា ក្នុងការសម្ដែងរាំសម្ពោធក្លឹបរបស់ Dj Mike នោះ យាយគ្រវីសក់ Sitang Buathong ស៊ីថ្លៃខ្ពស់រហូតដល់៥ពាន់ដុល្លារ គឺមិនចាញ់តារាចម្រៀងល្បីៗរបស់ថៃ ឡើយ។
Dj Mike បន្ថែមថា ”រឿងតម្លៃខ្លួនហ្នឹង ខ្ញុំសូមមិននិយាយទេបង ព្រោះគាត់ក៏មិនចង់ឲ្យនិយាយដែរ។ ខ្ញុំអាចនិយាយបានថា គាត់ពិតជាមានតម្លៃខ្លួនខ្ពស់មែន។ ក្រៅពីយាយគ្រវីសក់ នៅថ្ងៃនោះ ក៏មានការសម្ដែងរបស់រ៉ូលីន ផងដែរ”៕
