ភ្នំពេញ៖ ហេតុការណ៍នេះកើតឡើងកាលពីវេលាម៉ោង៤និង៤០នាទីរសៀល ថ្ងៃទី១៨ ខែធ្នូ ឆ្នាំ២០១៨ នៅចំណុចសណ្ឋាគារមួយកន្លែង ស្ថិតនៅអគារលេខ ២.៤.៦.៨.១០ ផ្លូវលេខ១៣៦ ភូមិ៤ ក្រុមទី៤៤ សង្កាត់ផ្សារកណ្តាលទី១ ខណ្ឌដូនពេញ។
សពជនរងគ្រោះ មានឈ្មោះ JAMIESON ROBERT SEAN ភេទប្រុស អាយុ៤០ឆ្នាំ ជាជនជាតិអាមេរិក មុខរបរទេសចរណ៍ ស្នាក់នៅសណ្ឋាគារ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ ដោយសារមិនឃើញជនរងគ្រោះ ចេញពីបន្ទប់ ទើបគោះទ្វារហៅ តែមិនឃើញបើក ទើបចាក់សោចូលទៅមើល ស្រាប់តែប្រទះឃើញជនរងគ្រោះដេកស្លាប់យ៉ាងអាណោចអាធ័ម ក៏កើតមានការផ្អើលឆោឡោ រាយការណ៍ប្រាប់សមត្ថកិច្ចឱ្យចុះមកជួយអន្តរាគមន៍តែម្តង។
យោងតាមការពិនិត្យរបស់កម្លាំងការិយាល័យជំនាញបច្ចេកទេស បានបញ្ជាក់ថា សពជនរងគ្រោះស្លាប់ដោយគាំងបេះដូង បណ្តាលមកពីការប្រើប្រាស់សារធាតុញៀន (ប្រភេទម៉ុកហ្វីន)។
នៅក្នុងបន្ទប់ជនរងគ្រោះ សមត្ថកិច្ចបានរកឃើញលិខិតឆ្លងដែនលេខ៥៦៣០០៦២០៦ Laptop Toshiba ១គ្រឿង កាតATM ចំនួន២សន្លឹក អត្តសញ្ញាណប័ណ្ណ១សន្លឹក កាបូបលុយចំនួន១ វ៉ាលីសដាក់ខោអាវចំនួន១៕