នី រតនា នឹងដឹកដៃសុវណ្ណភក្ដិណា ចូលរោងការនៅដើមឆ្នាំ២០១៩នេះហើយ។ តារាចម្រៀងផលិតកម្មរស្មីហង្សមាស នី រតនា បានដឹកដៃអនាគតភរិយាទៅថតរូប Pre –Wedding នៅតាមប្រាសាទជាច្រើនប្លង់ ដើម្បីចាក់បញ្ចាំងឲ្យភ្ញៀវទាំងឡាយ ដែលចូលរួមមង្គលការរបស់គេបានទស្សនានៅថ្ងៃជប់លៀងធំ។
តាមរយៈឈុតប្រពៃណីជាច្រើនម៉ូដរវាងនី រតនា និងសុវណ្ណ ភក្តិណា នោះ ក្រុមអ្នកគាំទ្រតារាចម្រៀងរតនា បានសរសើរថា អ្នកចម្រៀងរូបនេះពូកែរកប្រពន្ធដែលមើលទៅស័ក្តិសមគ្នាខ្លាំងណាស់ ហើយមើលទៅពួកគេស្រលាញ់គ្នាចាក់ទឹកមិនលេចឡើយ។
តាមរយៈការដឹកដៃម្ចាស់ចិត្តក្រាបផ្ទឹមនៅពេលនេះ នី រតនា ដែលទើបល្បីបានបន្ដិច ក៏រកប្រពន្ធភ្លាមនេះ ត្រូវបានមហាជនលើកឡើងថា ម្ចាស់ពាន Cambodian Idol រដូវកាលទី១នេះ ក្លាហានហ៊ានជាងតារាចម្រៀងខេមរៈ សិរីមន្ដ ដែលពេលនេះមានកូន៣នាក់ទៅហើយ តែសិរីមន្ដ នៅតែមិនទាន់ដឹកដៃភរិយារៀបការជាចំហរឡើយ ថ្វីត្បិតតែសិរីមន្ដ បានអះអាងបានរៀបការតាំងពីឆ្នាំ២០០៩ក្ដី តែរហូតមកដល់ពេលនេះ គ្មានរូបថតអាពាហ៍ពិពាហ៍មួយសន្លឹក ត្រូវបានបញ្ចេញនោះទេ។
នី រតនា បានភ្ជាប់ពាក្យកាលពីថ្ងៃទី២៧ ខែមេសា ជាមួយសុវណ្ណ ភក្ដិណា កូនម្ចាស់វិទ្យុ និងហាងមង្គលសុវណ្ណា ដោយមានព័ត៌មានថា អ្នកចម្រៀងផលិតកម្មរស្មីហង្សមាស រូបនេះ ហ៊ានឲ្យថ្លៃទឹកដោះកូនក្រមុំជាង១ម៉ឺនដុល្លារទៀតផង។ ការត្រៀមក្រាបផ្ទឹមរបស់រតនា នៅពេលនេះ ចំពេលដែលកេរ្ដិ៍ឈ្មោះតារាចម្រៀងរូបនេះ កាន់តែស្ងប់ស្ងាត់ ដែលអាចប្រឈមការធ្លាក់កូដ ក្រោយពេលការប្រពន្ធនេះហើយ។ ប៉ុន្ដែរតនា បានប្រាប់អ្នកយកព័ត៌មានយើងនៅទូរទស្សន៍អាស៊ីអាគ្នេយ៍ ថា រូបគេមិនខ្លាចរៀបការ ហើយលែងមានអ្នកគាំទ្រនោះទេ ព្រោះថា ពេលនេះដល់វ័យត្រូវរៀបការ និងបង្ហាញការស្រលាញ់ចំពោះភរិយា ហើយបើការហើយ លែងមានគេគាំទ្រ ក៏មិនដឹងជាធ្វើម៉េចដែរ តែរូបគេនឹងនៅតែបន្ដអាជីពសិល្បៈដូចមុនដដែល៕
