ខេត្តតាកែវ ៖ ករណីអំពើហិង្សាក្នុងគ្រួសារ ប្តីវ៉ៃប្រពន្ធជាំពេញខ្លួននេះ បានកើតមានការភ្ញាក់ផ្អើលឡើង កាលពីវេលាម៉ោង១ និង៣៥នាទី ថ្ងៃទី២០ ខែធ្នូ ឆ្នាំ២០១៨ នៅចំណុចភូមិកំពង់ ឃុំព្រះបាទជាន់ជុំ ស្រុកគីរីវង់។
ជនសង្ស័យដែលប្រើអំពើហិង្សាវ៉ៃប្រពន្ធឱ្យរងរបួសធ្ងន់នោះ មានឈ្មោះម៉ម ពុធ អាយុ៤៤ឆ្នាំ មុខរបរមិនពិតប្រាកដ។ ចំណែកស្ត្រីរងគ្រោះជាប្រពន្ធ មានឈ្មោះម៉េង គឹមហេង អាយុ៤១ឆ្នាំ។ ប្តីប្រពន្ធខាងលើ មានលំនៅក្នុងភូមិឃុំកើតហេតុខាងលើ។
តាមសម្តីរបស់ស្ត្រីរងគ្រោះជាប្រពន្ធ បានរៀបរាប់ប្រាប់ថា ប្តីរបស់គាត់ គឺជាមនុស្សប្រមឹក និងមានចរិតឆេវឆាវខ្លាំងណាស់ ឱ្យតែផឹកស៊ីស្រវឹង តែងរករឿងឈ្លោះប្រកែកជាមួយប្រពន្ធកូនជានិច្ច និងធ្លាប់ប្រើហិង្សា វាយតប់នាងបណ្តាលឱ្យរងរបួសជាច្រើនលើកច្រើនសារមកហើយ តែនាងមិនធ្លាប់ប្តឹងផ្តល់អ្វីនោះទេ។
ស្ត្រីរងគ្រោះជាប្រពន្ធ បន្តថា លុះមកដល់ថ្ងៃកើតហេតុ ប្តីរបស់គាត់ មិនដឹងជាផឹកស្រាវឹងមកពីណាទេ បានមកសុំលុយពីគាត់ចំនួន៤ម៉ឺនរៀល តែគាត់បានប្រាប់ប្តីវិញថា គ្មានលុយទេ ស្រាប់តែប្តីបានលួចយកទូរស័ព្ទរបស់គាត់ទៅលក់ លុះគាត់ដឹង សួរនាំ ក៏កើតជាជម្លោះតឹងសរសៃកដាក់គ្នា ហើយស្រាប់តែប្តីកំណាចបានស្ទុះមកវាយតប់លើគាត់បណ្តាលឱ្យរងរបួសជាំសុសពេញខ្លួនតែម្តង។
ក្រោយកើតហេតុ ដោយសារតែទ្រាំនឹងទង្វើឃោរឃៅរបស់ប្តីតទៅទៀតលែងបាន ទើបស្ត្រីជាប្រពន្ធសម្រេចចិត្ត ដាក់ពាក់បណ្តឹងឱ្យសមត្ថកិច្ចជួយអន្តរាគមន៍ ចាប់ឃាត់ខ្លួនប្តីកំណាចយកទៅចាត់ការតាមច្បាប់៕
