ភ្នំពេញ៖ ហេតុការណ៍បង្កឱ្យមានការភ្ញាក់ផ្អើលឡើង កាលពីវេលាម៉ោង១២រំលងអធ្រាត្រ ឈានចូលថ្ងៃទី២១ ខែធ្នូ ឆ្នាំ២០១៨ នៅត្រង់ចំណុចផ្ទះលេខ១៨៣ ផ្លូវលំ ភូមិរោងចក្រ សង្កាត់គោកឃ្លាង ខណ្ឌសែនសុខ។
បុរសរងគ្រោះខាងលើ មានឈ្មោះកៃ ប៉ាន់ អាយុ៥០ឆ្នាំ មុខរបរជាអ្នកលក់លៀសហាល ស្នាក់នៅកន្លែងកើតហេតុ និងមានស្រុកកំណើត នៅភូមិក្រាំងល្វា ឃុំតាម៉ងជ្រុំ ស្រុកសាមគ្គីមានជ័យ ខេត្តកំពង់ឆ្នាំង មានប្រពន្ធឈ្មោះហ៊ុន ជេស អាយុ៤៩ឆ្នាំ ជាអ្នកលក់លៀសហាល និងមានស្រុកកំណើតនៅភូមិពិល ឃុំមានជ័យ ស្រុករំដួល ខេត្តស្វាយរៀង។
តាមសម្តីស្ត្រីជាប្រពន្ធបុរសរងគ្រោះខាងលើ បានរៀបប្រាប់ថា កាលពី២ទៅ៣ថ្ងៃមុនពេលកើតហេតុ ប្តីរបស់គាត់ (ជនរងគ្រោះ) បានទៅជួយធ្វើស្រែម្តាយក្មេក (ម្តាយបង្កើតរបស់គាត់ជាប្រពន្ធ) នៅខេត្តស្វាយរៀង។ រហូតដល់ថ្ងៃទី២០ ខែធ្នូ ឆ្នាំ២០១៨ ប្តីរបស់គាត់ ក៏បានទាក់ទងមកប្រាប់ថា មិនសូវខ្លួនទេ ដេកអត់លក់២-៣យប់ហើយ មកយកគាត់ត្រឡប់ទៅផ្ទះវិញផង។ ឮបែបនេះ គាត់ក៏បានជិះរថយន្តឈ្នួល ទៅយកប្តីវិលត្រឡប់មកវិញដើម្បីទៅពេទ្យ។ លុះដល់វេលាម៉ោង៦ល្ងាចថ្ងៃដដែល ប្តីរបស់គាត់ចេះតែត្អូញថា ហត់អស់កម្លាំងញ័រដៃញ័រជើង បន្ទាប់មកគាត់ជាប្រពន្ធ ក៏បានដាំបបរសឱ្យបុរសរងគ្រោះជាប្តីហូប។ ពេលហូបបបររួចហើយ គាត់ក៏ដេញប្តីឱ្យទៅសម្ងំដេកទៅ តែប្តីមិនព្រមទៅដេកទេ ដោយប្រាប់ថា ចង់នៅអង្គុយលេងសិន។ រហូតដល់វេលាម៉ោង៩យប់ថ្ងៃដដែល ដោយអស់កម្លាំងពេក ប្តីគាត់ក៏ទារហូបភេសជ្ជៈប៉ូវកម្លាំង ក្រែងលោអាចមានកម្លាំងបន្តិច។
បន្ទាប់មកគាត់ជាប្រពន្ធក៏ទៅទិញភេសជ្ជៈប៉ូវកម្លាំង១កំប៉ុងឱ្យប្តីផឹក លុះមួយសន្ទុះក្រោយមក ប្តីគាត់បានទារហូប១កំប៉ុងទៀត ដោយនិយាយថា “មុនស្លាប់ផឹកឱ្យឆ្អែតសិន ព្រោះមានគេមកយកខ្ញុំទៅ់ហើយ ខ្ញុំមិននៅទេ”។ ប៉ុន្តែពេលនោះ គាត់ជាប្រពន្ធមិនព្រមឱ្យហូបនោះទេ ព្រោះដឹងថា ប្តីគាត់ហាក់មានសភាពខ្សោយខ្លាំងពេក ខ្លាចមានបញ្ហា។ បន្ទាប់មក គាត់ក៏ដេញបុរសជាប្តីឱ្យទៅសម្ងំដេក តែប្តីនៅតែនិយាយប្លែកៗខុសពីធម្មតា មួយសន្ទុះក្រោយមកប្តីគាត់ក៏ព្រមចូលទៅសំងំដេកនៅក្នុងផ្ទះបាត់ទៅ។
ស្ត្រីជាប្រពន្ធជនរងគ្រោះ បន្តថា លុះមកដល់វេលាម៉ោង១២រំលងអធ្រាត្រ ឈានចូលថ្ងៃទី២១ ខែធ្នូ ឆ្នាំ២០១៨ គាត់ក៏បានចូលទៅ មើលប្តី ដែលដេកនៅខាងក្នុងផ្ទះ ស្រាប់តែចូលទៅដល់ ក៏ឃើញប្តីដេកបាត់មាត់បាត់ កន្ត្រាក់ដៃជើង។ ភ្លាមៗនោះគាត់ ក៏ស្រែកឆោឡោ ឱ្យគេឯងជួយ ហើយក៏មានប្រជាពលរដ្ឋមកជួយមើល និងបានជួយហៅម៉ូតូកង់បីមកដឹកប្តីទៅមន្ទីរពេទ្យ ជាអកុសលបុរសរងគ្រោះ ដែលជាប្តីបានដាច់ខ្យល់ស្លាប់បាត់ទៅហើយ៕