កូនតិរច្ឆាន​ ផឹកស្រាស្រវឹង ទាញញញួរវាយក្បាលឪពុក ធ្លាយខួរស្លាប់

ខេត្ដបាត់ដំបង៖ កូនចិត្តតិរច្ឆានម្នាក់ បន្ទាប់ពីផឹកស្រាស្រវឹង ខឹងឪពុកស្ដីបន្ទោសរឿងសុំលុយយកទៅទិញស្រាផឹកស្ទើររាល់ថ្ងៃ បានទាញយកញញួរមកសំពងក្បាលឪពុករហូតដល់ស្លាប់ក្នុងថ្លុុកឈាម ។ ហេតុការណ៍ខាងលើនេះបានកើតឡើង កាលពីរសៀលថ្ងៃទី៣០ ខែសីហា ឆ្នាំ២០១៦ នៅចំណុចភូមិអន្លង់តាមុី ឃុំឈើទាល ស្រុកបាណន់ ខេត្តបាត់ដំបង ។

សមត្ថកិច្ចមូលដ្ឋានបានឲ្យដឹងថា ជនដៃដល់ឈ្មោះ ស៊ើត ស៊ីន អាយុ35ឆ្នាំ រស់នៅក្រុម5 ភូមិអន្លង់តាម៉ី ឃុំឈើទាល ស្រុកបាណន់ ខេត្តបាត់ដំបង។ ជននេះបានប្រើប្រាស់ ញញួរវាយទៅលើ ឪពុកបង្កើតរបស់ខ្លួន ឈ្មោះ ដែង ស៊ើត អាយុ  75ឆ្នាំ រស់នៅកន្លែងកើតហេតុ បណ្តាលឲ្យស្លាប់។

បើតាមសមត្ថកិច្ច មូលហេតុដោយជននេះ ជាមនុស្សស្រវឹងខួប ស្ទើរគ្មានស្មារតីជាមនុស្ស  ហើយតែងរករឿងឪពុករាល់ថ្ងៃ ដើម្បីបានលុយទិញស្រាផឹក ដែលគ្រួសារគាត់គឺមានតែពីរនាក់ឪពុក និងកូនប៉ុណ្ណោះ។

ក្រោយកើតហេតុកម្លាំងជំនាញ នៃអធិការដ្ឋាននគរបាលស្រុកបាណន់បានចុះទៅដល់កន្លែងកើតហេតុ និងបានធ្វើការឃាត់ខ្លួនជនសង្ស័យដើម្បីរៀបចំសំណុំរឿងបញ្ជូនទៅតុលាការ ចាត់ការតាមផ្លូវច្បាប់ ៕