ខេត្តកោះកុង ៖ ករណីហិង្សាព្រួតកាប់បុរសម្នាក់រយះក្បាលនេះ បានកើតឡើងកាលពីវេលាម៉ោង១១ និង៣៥នាទីយប់ ថ្ងៃទី០៨ ខែមេសា ឆ្នាំ២០១៨ នៅចំណុចក្បាលស្ពាន ជាប់កន្លែងបាល់ទះមនោរម្យ ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ។ លុះមកដល់វេលាម៉ោង៩និង២០នាទីព្រឹក ថ្ងៃទី១០ ខែមករា ឆ្នាំ២០១៩ ទើបសមត្ថកិច្ចស្រាវជ្រាវ ឃាត់ខ្លួនជនសង្ស័យបានម្នាក់។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះធឿន បញ្ញា ហៅរិន អាយុ១៩ឆ្នាំ។
សមត្ថកិច្ចមូលដ្ឋាន បានបញ្ជាក់ឱ្យដឹងថា ជនសង្ស័យខាងលើនេះ ត្រូវបានសមត្ថកិច្ចចាប់ឃាត់ខ្លួន តាមដីការបង្គាប់ឱ្យចាប់ខ្លួនលេខ៨៣ តព របស់សាលាដំបូងខេត្តកោះកុង ដែលបង្គាប់ឱ្យចាប់ខ្លួនមុខសញ្ញា ឈ្មោះធឿន បញ្ញា ហៅរិន ពីបទហិង្សាដោយចេតនាមានស្ថានទម្ងន់ទោស ប្រព្រឹត្តទៅនៅចំណុចភូមិ១ សង្កាត់ស្មាច់មានជ័យ ក្រុងខេមរភូមិន្ទ កាលពីថ្ងៃទី០៨ ខែមេសា ឆ្នាំ២០១៨។
ក្រោយឃាត់ខ្លួនបាន ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនទៅកាន់ សាលាដំបូងខេត្ត ដើម្បីចាត់ការបន្តតាមនីតិវិធី។
គួររំលឹកថា កាលពីវេលាម៉ោង១១និង៣៥នាទីយប់ ថ្ងៃទី០៨ ខែមេសា ឆ្នាំ២០១៨ កន្លងទៅ មានករណីអំពើហិង្សាដោយចេតនាមួយ បានកើតឡើងនៅចំណុចក្បាលស្ពាន ជាប់កន្លែងបាល់ទះមនោរម្យ ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ដោយប្តីប្រពន្ធ២នាក់ បានជិះម៉ូតូដឹកគ្នាចូលទៅរាំធុងបាស់នៅក្នុងវត្ត លុះពេលកំពុងរាំលេងសប្បាយ ស្រាប់តែមានក្មេងស្ទាវមួយក្រុម បានចូលមករាំក្បែរ រួចក៏ព្យាយាមរាំកៀងស្ត្រីជាប្រពន្ធ ទើបធ្វើឱ្យបុរសជាប្តីខឹង ក៏សម្លឹងមុខក្រុមក្មេងស្ទាវនោះ រួចក៏ឈប់រាំនាំប្រពន្ធត្រឡប់ទៅផ្ទះវិញ ស្រាប់តែត្រូវក្រុមក្មេងស្ទាវ ជិះម៉ូតូ តាមស្ទាក់កាប់ប្រហារបុរសជាប្តី១ដាវសាំម៉ូរ៉ៃ បណ្តាលឱ្យរយះដល់លលាដ៍ក្បាលរងរបួសធ្ងន់៕