ខេត្តស្ទឹងត្រែង៖ បុរសម្នាក់ បានចូលទៅអារឈើ១ដើមធំនៅក្នុងព្រៃ ស្រាប់តែអារខុសបច្ចេកទេស បណ្តាលឱ្យរលំសង្កត់បាក់ភ្លៅ និងបែកខ្ទេចប្រដាប់ភេទ ស្លាប់យ៉ាងអាណោចអាធ័ម កាលពីវេលាម៉ោង១០ព្រឹក ថ្ងៃទី១០ ខែមករា ឆ្នាំ២០១៨ នៅចំណុចជាំស្ពង ស្ថិតក្នុងភូមិសំអាង ស្រុកថាឡាបរិវ៉ាត់។
បុរសរងគ្រោះដែលអារឈើភ្លាត់ស្នៀត បណ្តាលឱ្យរលំសង្កត់បាក់ភ្លៅ និងបែកខ្ទេចប្រដាប់ភេទស្លាប់គួរឱ្យសង្វេគ មានឈ្មោះចាន់ មករា អាយុ៣២ឆ្នាំ មានលំនៅក្នុងភូមិអូរទឹកថ្លា ឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ សព្វថ្ងៃមកស្នាក់នៅភូមិសំអាង ឃុំសំអាង ស្រុកថាឡាបរិវ៉ាត់ ដើម្បីរកស៊ីអារឈើ។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ ជនរងគ្រោះបានចូលទៅកាត់ឈើ១ដើមនៅទីតាំងកើតហេតុខាងលើ លុះពេលអារឈើនោះ មិនដឹងជាខុសបច្ចេកទេសយ៉ាងម៉េច ស្រាប់តែឈើបានបាក់សង្កត់លើជនរងគ្រោះ បណ្តាលឱ្យបាក់ភ្លៅ និងបែកប្រដាប់ភេទខ្ទេច ស្លាប់នៅនឹងកន្លែងយ៉ាងរន្ធត់។
ក្រោយកើតហេតុ កម្លាំងជំនាញ សហការជាមួយប៉ុស្តិ៍ និងអាជ្ញាធរភូមិឃុំ ចុះទៅពិនិត្យសព និងសួរបំភ្លឺពីសក្សីឃើញថា សពត្រូវបានស្លាប់ ដោយសារឈើសង្កត់បាក់ភ្លៅ និងបែកពង បណ្តាលឱ្យស្លាប់ ទើបពិនិត្យរួចក៏ប្រគល់ឱ្យគ្រួសារយកទៅធ្វើបុណ្យតាមប្រៃណី៕
