ម្ចាស់ពាន The Voice Cambodia រដូវកាលទី១ ប៊ុត សីហា បានក្លាយទៅជាតារាចម្រៀងនៅពេលរាត្រីរបស់ហាង “ពិភពរាត្រី” ក្បែរស្ថានទូតចិន បន្ទាប់ពីអតីតតាចម្រៀងផលិតកម្មរស្មីហង្សមាស រូបនេះ មានទំនាស់យ៉ាងចម្រូងចម្រាស ជាមួយម្ចាស់ផលិតកម្មមរតក មេឌា កាលពីពេលថ្មីៗនេះ។
រូបភាពប៊ុត សីហា ត្រូវបានគេដាក់តាំងនៅពីមុខហាងផឹកស៊ីនោះ ដើម្បីជាការទាក់ទាញអតិថិជនជាមួយតារាចម្រៀងប្រចាំហាងផ្សេងទៀត ដូចជា លោកអេន ឌី , វង្ស តារារតនា ,ទីទី ,ម៉ៅ ស៊ីណាត ជាដើម។
បុគ្គលិកបម្រើការនៅហាងផឹកស៊ីនោះ បានបង្ហើបឲ្យដឹងថា ប៊ុត សីហា ទោះជាមានរឿងអាស្រូវ ពាក់ព័ន្ធគ្រឿងញៀនផ្អើលពេញផ្ទៃប្រទេសមែន តែភ្ញៀវនៅតែចង់ឃើញសីហា ច្រៀងនិងគាំទ្រតារាចម្រៀងរូបនេះ ពិសេស គឺបទ ”គ្មានអ្នកណាកែចិត្តបង” ពេញនិយមខ្លាំង។
ប៊ុត សីហា ត្រូវបានផលិតកម្មរស្មីហង្សមាស ដេញចេញពីផលិតកម្ម ក្រោយពេលដែលម្ចាស់ពាន The Voice Cambodia រដូវកាលទី១ កាលពីឆ្នាំ២០១៥នេះ មានពាក់ព័ន្ធកាសេពគ្រឿងញៀន។ ក្រោយអស់សុពលភាពជាអ្នកចម្រៀងហង្សមាស សីហា បានប្រាប់ ”នគរធំ” ថា រូបគេនឹងទៅចូលផលិតកម្មថោន ព្រោះមានខ្សែនៅទីនោះ តែរហូតមកដល់ពេលនេះ សីហា មិនទាន់ចេញបទចម្រៀងនៅថោន ទេ តែបែរជាលេចមុខច្រៀងនៅហាងផឹកស៊ីទៅវិញ។
តាមព័ត៌មានថា ផលិតកម្មធំៗមានថោន និងសាន់ដេ ពិតជាពេញចិត្តប៊ុតសីហា នឹងចង់ផ្ដល់ឱកាសឲ្យអតីតតារាហង្សមាស ស្ដារមុខឡើងវិញមែន បើសិនជាតារារូបនេះកែចរិត លែងសេពគ្រឿងញៀនទៀត។ ប៉ុន្ដែសីហា បានធ្វើឲ្យផលិតកម្មទាំងឡាយដែលចង់ជួយស្ដារមុខខកចិត្តព្រោះតែមានដំណឹងថា កាលពីខែមុន សមត្ថកិច្ចស្ទើរតែចាប់រូបគេបានទៅហើយ នៅផ្ទះសំណាក់មួយ នៅខណ្ឌពោធិ៍សែនជ័យ តែសំណាងល្អ តារាចម្រៀងរូបនេះគេចផុតបន្ដិច។
ប្រភពបានឲ្យដឹងថា តាំងពីផ្ទុះរឿងអាស្រូវសេពគ្រឿងញៀនមក ភរិយាប៊ុត សីហា អ្នកនាងឃុន ស្រីនាង ពិបាកចិត្តជាខ្លាំង ព្រោះប្រាក់ចំណូលប្ដីធ្លាក់ចុះ ហើយសីហា បាត់បង់ការចេញមុខតាមឆាកតន្រ្ដីធំៗទាំងស្រុង គឺច្រៀងតែតាមអកកេស និងហាងផឹកស៊ីប៉ុណ្ណោះ៕