ខេត្តបន្ទាយមានជ័យ៖ ករណីកូនប្រុសដេញកាប់ម្តាយបង្កើតខ្លួនឯងនេះ បានកើតមានការភ្ញាក់ផ្អើលឡើង កាលពីវេលាម៉ោង៤និង៤០នាទីទៀបភ្លឺ ថ្ងៃទី២១ ខែមករា ឆ្នាំ២០១៩ នៅចំណុចភូមិទំនប់ជ្រៃ សង្កាត់ទឹកថ្លា ក្រុងសិរីសោភ័ណ។
ជនសង្ស័យដែលទាញពូថៅដេញកាប់ម្តាយ និងត្រូវសមត្ថកិច្ចចាប់វ៉ៃខ្នោះ មានឈ្មោះផាន់ លឹម អាយុ២២ឆ្នាំ មានលំនៅក្នុងភូមិឃុំ កើតហេតុខាងលើ។
តាមសម្តីស្ត្រីជាម្តាយបង្កើតរបស់ជនសង្ស័យខាងលើ បានរៀបរាប់ប្រាប់ថា នៅយប់ថ្ងៃទី២០ ខែមករា ឆ្នាំ២០១៩ កូនប្រុសកំណាចនេះ បានចេញទៅដើរលេងបាត់១យប់ មិនត្រឡប់មកផ្ទះវិញសោះ រហូតមកដល់វេលាម៉ោង៤ និង៤០នាទីទៀបភ្លឺ ថ្ងៃទី២១ ខែមករា ឆ្នាំ២០១៩ ទើបលេចមុខចូលផ្ទះវិញ រួចក៏បង្ករឿង ទាញពូថៅដេញកាប់គាត់ជាម្តាយ ធ្វើឱ្យគាត់ភ័យស្លន់ស្លោ រត់គេចចេញពីផ្ទះបាត់ ស្រាប់តែកូនប្រុសនេះ បានទាញពូថៅ និងដុំថ្មកាប់ វាយបំផ្លាញទ្រព្យរបស់ក្នុងផ្ទះ បណ្តាលឱ្យខូចខាតខ្ទេចអស់។
ដោយសារតែទ្រាំនឹងទង្វើកោងកាចរបស់កូនប្រុសតទៅទៀតលែងបាន ទើបស្ត្រីជាម្តាយ បានសម្រេចប្តឹងសមត្ថកិច្ចឱ្យចុះមកជួយ អន្តរាគមន៍ ចាប់ខ្លួនជនសង្ស័យនាំយកទៅចាត់ការតាមច្បាប់។
ក្រោយទទួលព័ត៌មានជំនាញប្រឆាំងគ្រឿងញៀនក្រុង បានដឹកនាំកម្លាំងប៉ុស្តិ៍ទឹកថ្លា ឆ្លងតាមការធ្វើតេស្តរកសារធាតុញៀន បានបញ្ជាក់ថា វិជ្ជមាន និងដកហូតវត្ថុតាង ពូថៅ០១ និងដុំថ្ម ២ដុំ។
ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនទៅចាត់ការបន្តតាមនីតិវិធី៕