Vj ណាណា ដែលមានឈ្មោះដើមថា នាង សុវ៉ាតនា ជាពិធីការិនីតាមបណ្ដាកម្មវិធីធំៗ ជំនាញនិយាយភាសាខ្មែរនិងអង់គ្លេស ដោយមានតម្លៃខ្លួន១ម៉ោង ដល់ទៅ៥០០ដុល្លារនោះ បានសម្រេចចិត្តចូលរោងការតាមប្រពៃណីខ្មែរត្រឹមត្រូវហើយ នៅថ្ងៃទី២៤ ខែមករា ឆ្នាំ២០១៩ នេះ ជាមួយបុរសម្នាក់ ឈ្មោះ ”ហាក់ បញ្ញារ័ត្ន” ជានិស្សិតទើបបញ្ចប់ការសិក្សាមកពីបរទេស ដែលកម្មវិធីនេះរៀបចំនៅផ្ទះរបស់វីជេ ណាណា ស្ថិតក្នុងបុរីប៉េង ហួត បឹងស្នោរ និងបន្ដទៅធ្វើពិធីជប់លៀងនៅអាគារ L មជ្ឈមណ្ឌលកោះពេជ្រ។
តាមព័ត៌មានបានឲ្យដឹងថា វីជេ ណាណា បានស្រលាញ់គ្នាជាមួយលោក ”បញ្ញា“ ជាង១០ឆ្នាំមកហើយ ទើបសម្រេចចិត្តដឹកដៃគ្នាក្រាបផ្ទឹមនៅពេលនេះ ខណៈដែលឪពុកម្ដាយស្វាមីរបស់នាង ជាអ្នកជំនួញធំ រកស៊ីបោះដុំមុខទំនិញនៅផ្សារអូរឫស្សី រាជធានីភ្នំពេញ។
អ្វីដែលគួរឲ្យចាប់អារម្មណ៍នោះ មង្គលការរបស់វីជេ ណាណា បានភ្ជាប់ធៀបការនូវសារមិនឲ្យពិសារគ្រឿងស្រវឹងទៀតផង។
Vj ណាណា មានស្រុកកំណើតនៅខេត្តកំពង់ចាម បានតស៊ូការលំបាកជាច្រើន និងពីមុនធ្លាប់ជួលផ្ទះគេនៅម្ដុំវិទ្យាល័យសន្ធរមុខ ទៀតផង។ ប៉ុន្ដែមុនដឹកដៃគ្នាគូស្នេហ៍ចូលរោងការនេះ វីជេ ណាណា បានទិញផ្ទះវីឡាទ្រនំស្នេហ៍ តម្លៃជាង៣០ម៉ឺនដុល្លារ នៅបុរីប៉េង ហួត (បឹងស្នោរ) ហើយក្រោយរៀបការរួច ពួកគេមានគម្រោងទៅក្រេបចន្ទទឹកឃ្មុំនៅបរទេស និងមានគម្រោងយកកូនភ្លាមៗផងដែរ។
វីជេ ណាណា ស្ថិតក្នុងចំណោមពិធីការិនីដែលត្រូវប៉ាន់ធ្វើជាពិធីការិនីតាមបណ្ដាកម្មវិធីធំៗ មានដូចជា អ្នកនាងខៀវ សានសាណា និងកញ្ញាជីមមី ជាដើម ដែលក្នុង១ខែៗ ពួកគេអាចរកប្រាក់ចំណូលបានរាប់ពាន់ដុល្លារ ព្រោះការអត្ថាធិប្បាយជាភាសាអង់គ្លេស ១ម៉ោង ស៊ីថ្លៃដល់ទៅ៥០០ដុល្លារឯណ្ណោះ៕
