Dj Mike បានក្លាយទៅជាសេដ្ឋីហើយ ក្រោយជួបយាយគ្រវីសក់ (Sitang Buathong)។ នេះជាការលើកឡើងរបស់ ឌីជេ មួយចំនួន ដែលរួមអាជីពជាមួយលោកម៉ៃ។ ការលើកឡើងបែបនេះ ក៏នាំឱ្យមានការសង្ស័យដែរថា Dj Mike ច្បាស់ជាមានការជួយឧបត្ថម្ភពីយាយគ្រវីសក់ហើយ ទើបគ្រាន់តែជួបភ្លាម ក្លាយទៅជាអ្នកមានភ្លែតបែបនេះ។
យ៉ាងណា ក្នុងជំនួបតាមទូស័ព្ទ Dj Mike និយាយថា ឥឡូវពិតជាបានធ្វើសេដ្ឋីដូចគេនិយាយមែន គឺមានទាំងស្រីស្នំអមទាំងសងខាងទៀតផង។ ប៉ុន្តែលោកម៉ៃ ថា ការក្លាយទៅជាអ្នកមានលំដាប់សេដ្ឋីនៅពេលនេះ គឺមានតែក្នុងរឿងប៉ុណ្ណោះ ព្រោះថ្មីៗនេះ លោកទើបបានថតភាពយន្តមួយឱ្យផលិតកម្មក្លាស៊ិក គឺរឿង “មាដាមអាប” ដែលក្នុងភាពយន្តនេះ អ្នកដឹកនាំសម្តែងតម្រូវឱ្យលោកលេងជាតួ “សេដ្ឋី”។ រឿងនេះលោកពេញចិត្តសម្តែងខ្លាំងណាស់ ព្រោះជាតួអ្នកមាន ហើយមានអ្នកបម្រើ ស្រីស្នំអមសងខាងទៀតផង។ តែនៅក្រៅឆាកវិញ ជីវិតរបស់លោក មិនដូចក្នុងរឿងភាពយន្តនោះឡើយ។
Dj Mike បានឱ្យដឹងថា “ក្រៅពីរឿង “មាដាមអាប” នេះ លោកកំពុងត្រូវបានបណ្តា ផលិតកម្មផ្សេងៗទៀតទាក់ទងឱ្យសម្តែងរឿងថ្មី ប៉ុន្តែនៅចរចាតម្លៃគ្នា ហេតុនេះហើយ ទើបមានគេនិយាយថា លោកប៉ះយាយគ្រវីសក់ រាសីឡើងនោះ គឺមិនខុសឡើយ។
គួររំលឹកថា Dj Mike បាននាំយាយគ្រវីសក់ (Sitang Buathong) មករាំសម្ពោធក្លឹប VoulezVous កាលពីថ្ងៃទី២១ ខែធ្នូ ឆ្នាំ២០១៨ និងបន្តទៅរាំអុកឡុកពេញផ្សារ Palm Container Night Market ខេត្តសៀមរាប ផងដែរ។
Dj Mike បានឱ្យដឹងថា “លោកនៅតែមានទំនាក់ទំនងល្អជាមួយយាយគ្រវីសក់រហូតមក ព្រោះថា លោកអាចនិយាយភាសាថៃបាន ទើបងាយស្រួលទាក់ទង និងរាប់អានគ្នាដូចមិត្តភក្តិ៕
