ភ្នំពេញ៖ ជនបរទេសម្នាក់ទើបចុះពីព្រលានយន្តហោះអន្តរជាតិភ្នំពេញ ចូលស្នាក់នៅផ្ទះសំណាក់បានជាង១ម៉ោង បាត់លុយអស់៥០០ដុល្លារ និង១លានរ៉ូពី បង្កឲ្យមានការភ្ញាក់ផ្អើលកាលពីវេលាម៉ោង៧និង២០នាទីយប់ ថ្ងៃទី៦ ខែតុលា ឆ្នាំ២០១៧ នៅផ្ទះសំណាក់យីហោ ហង្សពេជ្រ ជាន់ទី២ បន្ទប់លេខ២០៦ នៅទល់មុខព្រលានយន្តហោះអន្តរជាតិភ្នំពេញ ដែលស្ថិតនៅតាមបណ្តោយផ្លូវបេតុង ភូមិក្បាលដំរីសង្កាត់កាកាប ខណ្ឌពោធិ៍សែនជ័យ។
ជនរងគ្រោះឈ្មោះ ហ្វូហ្វាណាលី (FOFANAALI) ភេទប្រុស អាយុ៤៩ឆ្នាំ ជាជនជាតិអាព្រិចមុខរបរលក់ទិញសំលៀកបំពាក់ កាបូបដែលបាត់បង់មានទឹកប្រាក់ចំនួន៥០០ដុល្លារនឹងលុយរ៉ូពី ចំនួន១លាន ។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុគាត់មកទេសចរណ៍នៅប្រទេសកម្ពុជា ខណៈពេលចុះពីព្រលានយន្តហោះបានជិះរថយន្តតាក់ស៊ីដើររកផ្ទះសំណាក់ ដើម្បីសម្រាក ក៏បានទៅកក់បន្ទប់មួយដែលនៅឆ្ងាយពីព្រលានយន្តហោះ រួចហើយគាត់បានជិះរកមើលម្តងទៀត ដើម្បីរកផ្ទះសំណាក់ដែលនៅជិតព្រលានយន្តហោះ ក៏បានប្រទះឃើញនៅមុខព្រលានយន្តហោះមានផ្ទះសំណាក់មួយ យីហោ ហង្សពេជ្រ ក៏បានចូលទៅសួរនាំនិយាយថ្លៃ ហើយសម្រាកនៅផ្ទះសំណាក់ខាងលើតែម្តង។
ប្រភពបានបន្តទៀតថា លុះបានចូលសម្រាកបន្ទប់លេខ២០៦ ជាន់ទី២ បានជាង១ម៉ោងហើយបន្ទប់នោះអត់មាន Wifif ទើបរូបគាត់ត្រូវការប្រើដើម្បីទាក់ទងទៅមិត្តរួមការងារ ក៏ចាក់សោបន្ទប់ បានទុកកាបូបលុយនៅក្នុងទូចាក់សោត្រឹមត្រូវ ហើយចុះមកខាងក្រោម ប្រើសេវាWifi មិនបាន១០នាទីផង បានឡើងមកវិញ ចាក់សោចូលក្នុងបន្ទប់ ស្រាប់តែបាត់កាបូបលុយ មិនដឹងនរណាយក ហើយបានសួរនាំទៅម្ចាស់ផ្ទះសំណាក់ តែពួកគាត់ឆ្លើយថា មិនដឹងឡើយ ហើយនៅជាប់នឹងខ្លួនមានលុយតែជាង២ម៉ឺនរៀលតែប៉ុណ្ណោះ។
បន្ទាប់មកជនរងគ្រោះបានជិះរ៉ឺម៉កម៉ូតូទៅប្តឹងសមត្ថកិច្ចប៉ុស្តិ៍នគរបាលរដ្ឋកាកាប ដើម្បីមកជួយអន្តរាគមន៍ភ្លាមៗផងដែរ ។ លុះពេលសមត្ថកិច្ចបានមកដល់បានសួរនាំទៅម្ចាស់ផ្ទះសំណាក់ឆ្លើយថា ពួកគាត់មិនដឹងឡើយ បន្ទាប់មកសមត្ថកិច្ចសុំឆែកកាមេរ៉ាសុវត្ថិភាពដោយខាងម្ចាស់ផ្ទះសំណាក់បានឆ្លើយថា គាត់ភ្លេចលេខសម្ងាត់កាមេរ៉ាសុវត្ថិភាពហើយ ចាំថ្ងៃព្រឹកស្អែក ថ្ងៃទី០៧ ខែតុលា ចាំហៅជាងមកមើល ព្រោះជាងរវល់ ។
ជនរងគ្រោះនិងសមត្ថបានបន្តទៀតថា បើចាំថ្ងៃស្អែក កាមេរ៉ាសុវត្ថិភាពបើកមិនចេញ ឫមិនដំណើការនៅពេលម៉ោងកើតហេតុ ម្ចាស់ផ្ទះគិតយ៉ាងណា ? ចំណែកនារីជាម្ចាស់ផ្ទះខាងលើគាត់បាននិយាយថា គាត់នឹងធានានឹងសងទៅលើជនរងគ្រោះវិញ។
ក្រោយពេលកើតហេតុសមត្ថកិច្ចបាននាំជនរងគ្រោះទៅប៉ុសិ៍្តនគរបាលរដ្ឋបាលកាកាប ដើម្បីទៅដាក់ពាក់បណ្តឹង រងចាំថ្ងៃស្អែក ថ្ងៃទី០៧ ខែតុលា ចាំដោះស្រាយដោះស្រាយបន្តទៀត៕