ភ្នំពេញ ៖ យុវជន២នាក់ចង់សប្បាយនាំគ្នាចូលក្លឹប ចេញពីក្លឹបវិញ ត្រូវជនសង្ស័យប្រដាប់អាវុធមួយក្រុម ដេញកាប់ប្លន់យកម៉ូតូម៉ាក MSX បានសម្រេច បង្កឲ្យមានការភ្ញាក់ផ្អើលកាលពីវេលាម៉ោង២និង២០នាទីរំលងអាធ្រាត្រ ឈានចូលថ្ងៃទី២៣ ខែវិច្ឆិកា ឆ្នាំ២០១៧ នៅចំណុចពន្លឺ វ៉ាពេជ្រ ទទួលផ្ញើរថយន្តនិងម៉ូតូ ២៤ម៉ោង តាមបណ្តោយផ្លូវ២០១១ ជិតថ្នល់រថភ្លើង ភូមិតាងួន១ សង្កាត់កាកាប ខណ្ឌពោធិ៍សែនជ័យ។
ជនរងគ្រោះជាម្ចាស់ម៉ូតូ ឈ្មោះ ប៊ីន ម៉ានី ហៅអាខ្មៅ អាយុ១៩ឆ្នាំ មុខរបរកម្មករសំណង់ ស្នាក់នៅការដ្ឋានសំណង់ ស្ថិតនៅភូមិដំណាក់ សង្កាត់គោគឃ្លាង ខណ្ឌសែនសុខ មានស្រុកណើតនៅភូមិគគីរសោម ឃុំគគីរសោម ស្រុកកំពោតទូក ខេត្តស្វាយរៀង ។ ជនរងគ្រោះដែលជិះពីក្រោយ ឈ្មោះ រឿន រ៉ាត់ ភេទប្រុស អាយុ១៨ឆ្នាំ មុខរបរកម្មករសំណង់ ស្នាក់នៅជាមួយគ្នា មានស្រុកកំណើតនៅស្រុកព្រះស្តេច ខេត្តព្រៃវែង ម៉ូតូដែលជនសង្ស័យវាយកាប់ប្លន់ ម៉ាកMSX ពណ៌លឿង អ៊ុតពណ៌ខ្មៅ ពាក់ស្លាកលេខភ្នំពេញ 1FO-7142 ។
ជនរងគ្រោះបានឲ្យដឹងថា មុនពេលកើតហេតុ រូបគាត់និងមិត្តភក្តិរូមការងារម្នាក់ បាននាំគ្នាទៅលេងក្លឹបអាវ៉ាឡូញ នៅសង្កាត់ទឹកថ្លា ខណ្ឌសែនសុខ ។ បន្ទាប់ពីផឹកស៊ីរាំលេងសប្បាយហើយដល់ម៉ោងកើតហេតុ បាននាំគ្នាត្រឡប់ទៅការដ្ឋានសំណង់វិញ ខណៈពេលជិះម៉ូតូមកដល់ចំណុចកើតហេតុនៅចំណុចក្លឹប រីលេក្ស តាមផ្លូវ២០១១ ស្រាប់តែមានជនសង្ស័យមានគ្នា៦នាក់ ជិះម៉ូតូ ៣គ្រឿង ម៉ាកស្មាសវី មួយគ្រឿង និងម៉ាកហុងដាឌ្រីម ២គ្រឿង ប្រដាប់ដោយដាវមួយដើម និងកាំបិតបុ័ងតោមួយ បានជិះដេញពួកគាត់ លុះដេញមកដល់ចំណុចកើតហេតុខាងលើ ជនសង្ស័យបានបានទាញកាំបិតបុ័ងតោកាប់ទៅលើជនរងគ្រោះជិះពីក្រោយ ចំនួន២កាំបិត ចំដៃខាងឆ្វេង និងចំចង្កេះផ្នែកខាងឆ្វេង ដែលបណ្តាលឲ្យរងរបួសធ្ងន់រយះដៃខាងឆ្វេង ហើយជនសង្ស័យជិះម៉ូតូមួយគ្រឿងទៀត បានទាញដាវកាប់ទៅលើជនរងគ្រោះអ្នកបើកម៉ូតូ តែជនរងគ្រោះឃើញទាន់បានផ្តួលម៉ូតូរត់គេចខ្លួន ក៏ត្រូវជនសង្ស័យលើកម៉ូតូជិះគេចខ្លួនបាត់ដោយសុវត្ថិភាព។
ក្រោយពេលកើតហេតុជនរងគ្រោះរងរបួសធ្ងន់ជិះក្រោយ ត្រូវបានបងប្អូនដឹកតាមម៉ូតូយកទៅសង្គ្រោះភ្លាមៗ ចំណែកជនរងគ្រោះម្ចាស់ម៉ូតូវិញ បានទៅមកដាក់ពាក្យបណ្តឹងនៅប៉ុសិ៍្ត នគរបាលសង្កាត់កាកាប ដើម្បីឲ្យសមត្ថកិច្ចជួយស្រាវជ្រាវរកមុខសញ្ញាខាងលើយកមកផ្តន្ទាទោសតាមច្បាប់៕