ភ្នំពេញ ៖ ក្មេងទំនើងចំនួនបីនាក់ ត្រូវបានសមត្ថកិច្ចប៉ុស្តិ៍នគរបាលទំនប់ទឹក ឃាត់ខ្លួនយកទៅសាកសួរ បន្ទាប់ពីក្រុមក្មេងទាំងនោះបានជិះម៉ូតូប្រដាប់ដោយដុំឥដ្ឋ និងខ្សែក្រវ៉ាត ដេញវាយគ្នាពាសពេញផ្លូវ ហេតុការណ៍ឃាត់ខ្លួននេះបានធ្វើឡើងនៅវេលាម៉ោង១និង៤០នាទីរំលងអាធ្រាត្រ ឈានចូលថ្ងៃទី២៥ ខែធ្នូ ឆ្នាំ២០១៧ ទុលមុខផ្លូវច្រកចូលផ្សារទំនើបសុវណ្ណា ផ្លូវ២៧១ សង្កាត់ទំនប់ទឹក ខណ្ឌចំការមន ។
ក្រុមក្មេងទំនើងទាំងនោះ ទី១.មានឈ្មោះ កុល សល់ ហៅអាយ៉ា ភេទប្រុស អាយុ១៧ឆ្នាំ មុខរបរលក់សណ្តែកដី ស្នាក់នៅសង្កាត់ច្បារអំពៅ២, ទី២.មានឈ្មោះ តាំង ឆៃ ភេទប្រុស អាយុ១៧ឆ្នាំ ស្នាក់នៅភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ, និងទី៣.មានឈ្មោះ គន់ ប្រាថ្នា ភេទប្រុស អាយុ១៧ឆ្នាំ មុខរបរមិនពិតប្រាកដ ដកហូតបានម៉ូតូម៉ាកស៊ុយសុគីឡែត ពណ៌ខ្មៅលាយក្រហម ពាក់ស្លាកលេខភ្នំពេញ 1CP-2912 មួយគ្រឿង ខ្សែក្រវ៉ាត់មួយ និងដុំឥដ្ឋចំនួន៣ដុំ។
បើតាមសម្តីសមត្ថកិច្ចប៉ុស្តិ៍នគបាលទំនប់ បានឲ្យដឹងថា មុនឈានទៅដល់ការឃាត់ខ្លួនក្រុមក្មេងទំនើងទាំងបីនាក់នេះបាន គឺកម្លាំងសមត្ថកិច្ចបានធ្វើការល្បាតក្នុងមូលដ្ឋាន ដើម្បីទប់ស្កាត់បទល្មើសផ្សេង ខណៈមកដល់ចំណុចផ្លូវ២៧១ មុខមន្ទីរពេទ្យមិត្តភាពខ្មែរ-សូវៀត ស្រាប់តែប្រទះឃើញក្រុមក្មេងទំនើងជិត១០នាក់ ជិះម៉ូតូ៤ទៅ៥គ្រឿង ធ្វើសកម្មភាពដេញវាយគ្នាប្រសេចប្រសាចពាសពេញពេញផ្លូវ ហើយម្នាក់ៗប្រដាប់ដោយដុំថ្មនិងខ្សែក្រវ៉ាត់។ ឃើញស្ថានភាពបែបនេះ កម្លាំងសមត្ថកិច្ចរបស់ពួកគាត់ បានធ្វើការដេញឃាត់ក្មេងក្មេងទំនើងបានចំនួនបីនាក់ នៅមុខផ្សារទំនើបសុវណ្ណា ព្រមទាំងដកហូត វត្ថុតាងមានដូចជាដុំឥដ្ឋ និងខ្សែក្រវ៉ាត់ យកទៅធ្វើការសាកសួរនៅប៉ុស្តិ៍នគបាលទំនប់ទឹក។
នៅចំពោះមុខសមត្ថកិច្ច ក្រុមក្មេងទំនើងទាំងនោះបានសារភាពថា ពួកគេជាជនរងគ្រោះទេ ហើយពួកគេទើបចេញពីក្លឹប គោលបំណងត្រឡប់ទៅផ្ទះវិញ លុះជិះដល់ពាក់កណ្តាលផ្លូវ ក៍ស្រាប់តែមានបក្ខពួកមួយក្រុមទៀត មកដេញវាយពួកគេ ពេលនោះដែរពួកគេបានដកខ្សែក្រវ៉ាត់ដើម្បីទុកការពារខ្លួន និងដេញវាយគេវិញ ក៍ត្រូវសមត្ថកិច្ចឃាត់ខ្លួនបានតែម្តង។
ក្រោយពេលកើតហេតុ បន្ទាប់ពីសាកសួរហើយ ឃើញហេតុការណ៍នេះមិនកើតហេតុក្នុងទឹកដីប៉ុស្តិ៍ទំនប់ទឹក ខណ្ឌចំការមន នោះទេ គឺកើតហេតុនៅក្នុងទឹកដីសង្កាត់ស្ទឹងមានជ័យ២ ខណ្ឌមានជ័យ ទើប ប្រគល់ក្មេងទំនើងទាំង៣នាក់នេះឲ្យទៅខាងប៉ុស្តិ៍នគបាលស្ទឹងមានជ័យ២ ដើម្បីចាត់ការបន្ត ៕