ខេត្តព្រៃវែង ៖ នារីម្នាក់បានទម្លាយពីប្រវត្តិស្នេហ៍របស់ខ្លួនដែលមុនក្លាយជាគូស្នេហ៍រហូតឈាមដល់ការភ្ជាប់ពាក្យ ក្លាយជាគូដណ្តឹងនៅពេលនេះ ភាគីប្រុសជាគូដណ្តឹងដែលជាសិស្សច្បងក្នុងវិទ្យាល័យជាមួយគ្នានោះ បានតាមញ៉ែនាងរហូតដល់៨ឆ្នាំ ហើយឈ្លោះគ្នាដល់៣០០០ដង តែទីបំផុតកំណើតស្នេហ៍ក្នុងវិទ្យាល័យ បានធ្វើឲ្យពួកគេយល់ចិត្តគ្នារហូតឈានដល់ការភ្ជាប់ពាក្យ និងត្រៀមរៀបការនៅពេលខាងមុខ។
នារីដែលទម្លាយប្រវត្តិស្នេហ៍ក្នុងវ័យសិក្សានៅវិទ្យាល័យនោះ មានឈ្មោះសុន ស្រីពេជ្រ អាយុជាង២០ឆ្នាំ មុខរបរជាគ្រូបង្រៀននៅវិទ្យាល័យ ហ៊ុន សែន កំពង់ពពិល មានលំនៅក្នុងឃុំកំពង់ពពិល ស្រុកពារាំង ខេត្តព្រៃវែង។ ចំណែកបុរសជាគូស្នេហ៍ មានឈ្មោះពេជ្រ សាន់ អាយុជាង២០ឆ្នាំ ជាគ្រូបង្រៀននៅវិទ្យាល័យខាងលើជាមួយគ្នា និងរស់នៅក្នុងស្រុកខាងលើជាមួយគ្នា។
នារីខាងលើបានឲ្យដឹងថា នាងនិងបុរសជាគូដណ្តឹងស្គាល់គ្នាជិត៨ឆ្នាំ តាំងពីរៀននៅវិទ្យាល័យ ហើយធ្លាប់ឈ្លោះគ្នាជិត៣០០០ដង តែពួកនាងនៅតែមានចិត្តស្រឡាញ់គ្នាមិនប្រួលប្រែ រហូតឈានដល់ការភ្ជាប់ពាក្យនៅថ្ងៃទី០៩ ខែកុម្ភៈ ឆ្នាំ២០២០។
អ្នកគ្រូសុន ស្រីពេជ្រ បានបង្ហោះភាពជាមួយគូដណ្តឹងជាច្រើនសន្លឹកក្នុងគណនីហ្វេសប៊ុក របស់ខ្លួនជាមួយសំណេរលែបខាយចំពោះបុរសជាគូដណ្តឹងថា “ថាមិនចង់ Post ទេ តែចង់និយាយដើមសិស្សច្បងមួយចុះ។ ខ្លួនរៀនថ្នាក់ទី12D ទេតែមកញ៉ែសិស្សប្អូនថ្នាក់ទី10E” ។
ស្គាល់ដំបូង យកលេសមកសុំខ្ចីសៀវភៅអីណា បើតាមចាំ មកសុំខ្ចីសៀវភៅភាសាខ្មែរ ថ្នាក់ទី10 ពេលនោះចេះតែឆ្ងល់ក្នុងចិត្តថា រៀនដល់ទី12ហើយ ហេតុអ្វីមកខ្ចីសៀវភៅថ្នាក់ទី10ទៅវិញ? តែក៏មិនសួរអីដែរ តាមពិតមានលេសអ៊ីចឹងសោះ។
សិស្សច្បងក្បាលខូច យកលេសតាមញ៉ែសិស្សប្អូន ខ្ជិលនិយាយដើមគាត់ច្រើន ខ្លាចគាត់ខឹង បើចង់ដឹងទៀត Comments សួរបានចា៎!”។
អ្នកគ្រូដដែលបានសរសេរបន្តថា “អរគុណបងដែលតែងតែតាមលួងស្រីឆ្នាស និងក្បាលខូចម្នាក់នេះ រហូតដល់អស់រយ:ពេលជិត 8ឆ្នាំកន្លងមកនេះ Pich Sann កុំមាត់ប្រាប់ប៉ាខ្ញុំណា៎ គាត់ដឹងគាត់វ៉ៃ គាត់ឲ្យទៅរៀនលួចមានស្នេហា។ សិស្សទាំងអស់មើលបាន តែកុំយកគំរូតាមណា៎ មានស្នេហាក្នុងវ័យសិក្សាមិនល្អទេណា៎… វិទ្យាល័យហុ៑ន សែន កំពង់ពពិល វិទ្យាល័យផ្តើមស្នេហ៍…”។
ដោយឡែក កាលពីថ្ងៃទី០៩ ខែកុម្ភៈ ឆ្នាំ២០២០ ដែលជាថ្ងៃភ្ជាប់ពាក្យរបស់ខ្លួនជាមួយអតីតសិស្សច្បងនោះ អ្នកគ្រូខាងលើបានបង្ហោះរូបភាពបំពាក់ចិញ្ចៀនជាមួយសំណេរថា “ជួបគ្នាព្រឹកនេះណាចា៎ ០៩/ កុម្ភៈ/ 2020 ពេលវេលាបណ្តាលឲ្យពួកយើងបានជួបគ្នា ហើយក៏បន្តរហូតដល់មានថ្ងៃនេះ។ ស្គាល់គ្នាជិត8ឆ្នាំ ឈ្លោះគ្នាជិត3000ដង តែពួកយើងនៅតែមានថ្ងៃនេះ។ វិទ្យាល័យផ្តើមស្នេហ៍”៕