ភ្នំពេញ៖ឱក សុគន្ធកញ្ញា ឈជាតំណែងតារាចម្រៀងស្រីនាំមុខគេរបស់ហង្សមាសជាង១០ឆ្នាំមកហើយដែលគ្មានតារាស្រីរួមទ្រនុំណានៅលើនាងបានបើទោះជាពេជ្រ សោភា នៅតែរឹងមាំ ខណៈដែលសួស វីសា មានសម្ថភាពមិនចាញ់នាងក្ដី។យ៉ាងណាក្រោយសុគន្ធកញ្ញា មានសា្វមីនិងកូន១គេសង្កេតឃើញថាបទចម្រៀងរបស់នាងមានការប្រែប្រួល មិនមែនច្រៀងបទអីក៍ផ្ទុះដូចមុនឡើយ ទើបធ្វើឲ្យមានភាពស្រពិចស្រពិលថាតើនៅឆ្នាំ២០២១-២០២២ នេះសុគន្ធកញ្ញា មានសង្ឃឹមប៉ុន្មាន%ទៅដែលអាចថានាងនៅតែលេខ១នៅផលិតកម្មរបស់បងថ្លៃរបស់នាងទៀត?ការលើកឡើងបែបនេះដោយសារតែបច្ចុប្បន្នមជ្ឈដ្ឋានមហាជនមើលឃើញថាសម្រាប់តារាចម្រៀងស្រីនៅហង្សមាសគឺមានតែនាងរ៉េត ស៊ូហ្សាណា ម្នាក់ប៉ុណ្ណោះដែលស្ទុះឡើងក្រៅពីនេះហាក់នៅទ្រឹងទាំងអស់និងពិបាកទប់ទប់ជាមួយអ្នកចម្រៀងGalaxy នាងតន់ ច័ន្ទសីម៉ា ដែលកំពុងតែបោះពួយទៅមុខយ៉ាងលឿនស្លេវនោះ។ចំពោះឱក សុគន្ធកញ្ញា វិញថ្មីៗនេះនាងបានចេញ២បទជាប់គ្នាគឺបទ”រស់ជាខ្លួនឯង”និង”Bad boy អែបកៀន” ប៉ុន្ដែការគាំទ្រមធ្យម មិនផ្ទុះខ្លាំងដូចមុននោះទេ ហើយអ្វីដែលគូរជាទីបារម្ភថាសុគន្ធកញ្ញា នឹងពិបាកប្រជែងទីផ្សារចម្រៀងឲ្យខ្លាំងដូចមុនបាននោះគឺពេលនេះគីឡូរបស់នាងមិនទាន់ស្រកចុះនោះទេ ពោលគឺនៅតែមិនអាចយករាងស្វែលមកវិញបានដដែលរហូតមានអ្នកខ្លះថានាងបែកសាច់ក្រោយមានប្ដីនិងកូន១នេះទៀតផង។
ទោះជាឱក សុគន្ធកញ្ញា មិនទាន់ឡើងខ្លាំងដូចកាលនៅក្រមុំវិញមែន ប៉ុន្ដែលោកមិញ សុធីវណ្ណ ធ្លាប់ប្រាប់ថាការមានស្វាមីនិងកូនមិនប៉ៈពាល់ដល់ប្រជាប្រិយភាពតារានោះទេព្រោះធម្មជាតិបង្កើតមនុស្សមកឲ្យមានគូ មិនអាចរស់នៅម្នាក់ឯងជារៀងរហូតបានឡើយ។លោកសុធីវណ្ណ ថែមទាំងអះអាងថាចំពោះរឿងសុគន្ធកញ្ញា រាងស្ងប់ស្ងាត់ជាងមុននេះគឺមកពីមិនទាន់ដល់ពេលដែលហង្សមាសលើកឡើងវិញ ហើយលោកសូមឲ្យFan របស់សុគន្ធកញ្ញា ជឿរចុះថា១០០%ដាច់ខាតហង្សមាសនឹងមិនបណ្ដោយឲ្យសុគន្ធកញ្ញា ធ្លាក់ចុះនោះទេ។
អំឡុងពេលដែលឱក សុគន្ធកញ្ញា នៅតែមិនទាន់អាចធ្វើព្យុះភ្លៀងទីផ្សារចម្រៀងដូចមុននេះ ប្អូនថ្លៃថៅកែហង្សមាសរូបនេះនឹងត្រៀមវាយលុក២ច្រកទៀតនោះគឺមានព័តមានថានាងនឹងដឹកដៃលោកខេមរៈ សិរីមន្ដ ថតភាពយន្ដជាលើកទី១ឲ្យហង្សមាសបន្ទាប់ពីនាងបានខកខានការសម្ដែងភាពយន្ដរឿង”ខ្ញុំមានញ្ញាណលើស”ជំនួសដោយសុខ ស្រីនាង កាលពីឆ្នាំ២០២០។រឿងមួយទៀតដែលស្វាមីសុគន្ធកញ្ញា បានត្រៀមខ្លួនរួចជាស្រេចឲ្យសុគន្ធកញ្ញា លេចធ្លោឡើងវិញនោះគឺតាមរយៈការចេញមុខធ្វើជាគ្រូបង្វឹក និងគណៈកម្មាការពីបណ្ដារកម្មវិធីដល់ទៅ៤ព្រមគ្នានៅរដូវកាលថ្មីក្នុងពេលឆាប់ៗនេះគឺThe Voice Cambodia ,The Voice Kids Cambodia ,Cambodian Idol និងX Factor Cambodia ហើយពេលសុគន្ធកញ្ញា លេចមុខពីកម្មវិធីខាងលើនោះទោះជានាងគ្មានបទចម្រៀងល្បីៗទៀតក៍អាចទប់លំនឹងបានខ្លះជាមិនខាន។
អ្នករៀបចំប្រគុំតន្រ្ដីម្នាក់បានលើកឡើងថានៅពេលនេះមិនមែនតែឱក សុគន្ធកញ្ញា ម្នាក់ទេ ដែលមិនសូវលេចធ្លោ ប៉ុន្ដែមាស សុខសោភា ,ពេជ្រ សោភា ,សួស វីសា ,សុគន្ធ និសា និងសុខ ពិសី ជាដើមក៍មានវាសនាស្រដៀងគ្នាដែរ ព្រោះថាកូវីដបានយាយីឲ្យConcerts ធំៗនៅតាមបណ្ដារខេត្តលុបចោល២ឆ្នាំជាប់គ្នាអីចឹងធ្វើឲ្យតារាល្បីៗមានបទចម្រៀងហើយត្រូវបង្ខំចិត្តផ្អឹបទុកមួយអន្លើសិន ព្រោះបទចម្រៀងខ្លះបែបសប្បាយៗរឹតតែមិនហ៊ានចេញទៅទៀត ខ្លាចខុសពេលវេលាដោយសារតែពលរដ្ឋកំពុងតែមានទុក្ខរឿងកូវីដ ហេតុនេះហើយបានជាពួកគេលែងសូវល្បីដូចមុន។អ្នកដឹកនាំការប្រគុំតន្រ្ដីធំៗរូបនោះបន្ថែមថាចាប់ពីឆ្នាំ២០២២ទៅកូវីដ ធូរស្បើយហេតុនេះតារាល្បីៗក៍ចាប់ផ្ដើមចេញបទចម្រៀងប្រជែងទីផ្សារចម្រៀងឡើងវិញដែរ ហើយត្រូវការរងចាំរហូតដល់ខែ១២ខែធ្នូឆ្នាំ២០២២ ទើបអាចវាយតម្លៃបានហើយថាតារាណាឡើងខ្លាំង តារាណាចុះខ្សោយ?
ថ្វីត្បិតតែឱក សុគន្ធកញ្ញា មិនសូវខ្លាំងដូចមុនមែន តែតារាកូន១រូបនេះធ្វើឲ្យមិត្តរួមអាជីពពិបាកធ្វើដូចនាងបានព្រោះពេលនេះនាងជាតារាម្នាក់ដែលជោគជ័យទាំងស្នេហានិងអាជីពចម្រៀងព្រមគ្នាតែម្ដង ហើយតាំងពីរៀបការប្ដីនិងមានកូន១ជីវិតនាងពោពេញទៅដោយសុភមង្គល ស្របពេលដែលស្វាមីនាងលោកសុខលី ដែលធ្លាប់តែលេចឭថាមានសង្សារជាតារាច្រើនដួងកាលនៅលីវនោះពេលនេះលោកស្រលាញ់តែសុគន្ធកញ្ញា ម្នាក់គត់និងហៅនាងថាជា”ឧត្តមភរិយាៗ”ទៀតផងទើបធ្វើឲ្យសុគន្ធកញ្ញា មានក្ដីសុខបំផុតក្នុងជីវិត៕
