ភ្នំពេញ៖អតីតពិធីការិនីCtn អ្នកនាងផូ មុនីពៅ បានមកលេងម្ដាយនៅទីក្រុងភ្នំពេញកាលពីថ្ងៃទី១២ខែមីនា ដែលការមកលើកនេះមានរយៈពេល២សប្ដាហ៍ទើបនាងត្រូវត្រឡប់ទៅប្រទេសអូស្រា្ដលីវិញ បន្ទាប់ពីអាកខានមកស្រុករយៈពេលជាង៣ឆ្នាំមកហើយពោលគឺតាំងពីផ្ទុះកូវីដម្លេះ។ប៉ុន្ដែតំណើររបស់អ្នកនាងមុនីពៅ ជើងនេះមិនមានការរួមពីស្វាមីនាងលោកEric Boissoneau និងកូនបុ្រសនាងឈ្មោះAlexis Boissoneau ដែលមានឈ្មោះខ្មែរហៅថាវរម័ន្ដ បុរ័ស សូណូ អាយុ៤ឆ្នាំមកជាមួយឡើយ។
ក្នុងជំនួបផ្ទាល់កាលពីថ្ងៃទី១៦ខែមីនា អ្នកនាងផូ មុនីពៅ បានឲ្យដឹងថាការមកស្រុកកំណើតលើកនេះដើម្បីជួបម្ដាយដែលពេលនេះគាត់មានអាយុច្រើននិងមានសុខភាពមិនសូវល្អផងព្រោះខានមកយូហើយដោយសារតែកូវីដ ផ្ទុះពេកនេះហើយតាមគម្រោងនាងត្រូវមកតាំងពីខែមករាឆ្នាំ២០២២ ម្លេះតែបានលើកពេលរងចាំកូវីដថមថយ បន្ដិច ហេតុនេះហើយមានការនឹករលឹកក្រុមគ្រួសារខ្លាំងណាស់។អ្នកនាងមុនីពៅ បានឲ្យដឹងទៀតថាចំពោះមូលហេតុដែលស្វាមីនិងកូនប្រុសមិនបានមកជាមួយដោយសារតែនាងមិនចង់ឲ្យកូនមកព្រោះកូននៅក្មេងពិបាកក្នុងការធ្វើតេស្ដកូវីដ(រុកច្រមុះ)អីចឹងហើយឲ្យកូននៅអូស្រា្ដលីហើយស្វាមីនាងជាអ្នកមើលថែរ។អ្នកនាងមុនីពៅ បន្ថែមទៀតថាទោះជាពេលនេះនាងបានទៅរស់នៅស្រុកគេជាង១០ឆ្នាំក្ដី តែការនឹករលឹកដល់ស្រុកខ្មែរគឺគ្រប់ពេលវេលាទាំងអស់ ហើយនាងនៅតែមានទំនាក់ទំនងជាមួយមិត្តភក្ដិអ្នកសិល្បៈដែលជិតដិតតាមបណ្ដាញសង្គមជាប្រចាំ គ្រាន់តែមិនបានទៅជួបជុំគ្នាព្រោះតែខ្លាចរឿងកូវីដនេះ។អតីតពិធីការិនីរូបនេះបានឲ្យដែរថាក្រោយរៀបការរួចស្វាមីនាងដែលជាមន្រ្ដីបម្រើការនៅស្ថានទូតបារាំងបានចេញធ្វើការទៅប្រទេសចិន,បារាំង និងបច្ចុប្បន្នលោកធ្វើការនៅអូស្រា្ដលីរយៈពេល៣ឆ្នាំកន្លះហើយដែលនៅសល់កន្លះឆ្នាំទៀតទើបចប់អាណត្តិតែមិនទាន់ដឹងថាទៅបម្រើការនៅប្រទេសណាជាបន្ដនោះទេ ខណៈដែលចិត្តនាងវិញចង់ឲ្យប្ដីមកធ្វើការនៅជិតៗខ្មែរដូចជាថៃ ,វៀតណាម ឬឡាវ ជាដើមងាយស្រួលនាងអាចចេញចូលមកជួបម្ដាយ តែស្វាមីនាងមិនអាចមកធ្វើការនៅខ្មែរម្ដងទៀតទេ ព្រោះលោកធ្លាប់ធ្វើការនៅទីនេះរយៈពេល៤ឆ្នាំតាំងពីមុនរៀបការជាមួយនាងម្លេះ ហើយខាងស្ថានទូតគេមិនតម្រូវឲ្យអ្នកធ្លាប់ធ្វើការនៅទីណាម្ដងហើយទៅប្រទេសនោះម្ដងទៀតនោះទេ។
ឆ្លើយតបសំណួរថាតើអ្នកនាងផូ មុនីពៅ គិតថាថ្ងៃអនាគតចង់ទៅរស់នៅទីក្រុង Bordeaux ប្រទេសបារាំងជាមួយក្រុមគ្រួសារស្វាមីជារៀង រហូតឬចង់មកខ្មែរវិញនោះ អ្នក នាងពៅ អះអាងថានៅពេលស្វាមីនាងចូលនិវត្តន៍(retire)នោះនាងគិតថាចង់នៅខ្មែរនៅ រដូវដែលប្រទេសបារាំងកំពុងត្រជាក់(winter)រយៈពេល៦ខែ និងចង់ទៅបារាំង៦ខែ ពេល នៅខ្មែរជារដូវក្ដៅ(summer) តែនេះគ្រាន់តែជាគម្រោងជីវិត សម្រាប់ផែនការណ៍ រយៈពេល ច្រើនឆ្នាំទៀតនាពេលខាងមុខប៉ុណ្ណោះ។អ្នកនាងក៍បានបង្ហើបថាពេលមករស់នៅខ្មែរនាងក៍សម្លឹងឃើញមុខរបរផ្ទាល់ខ្លួនផងដែរ តែមិនមែនទាក់ទងខាងCosmetics គឺអាចរកស៊ីផ្សេង ព្រោះថាបច្ចបុប្បន្ននាងក៍មានភាគហ៊ុនខ្លះជាមួយបងប្រុស ទាក់ទង ការរកស៊ីផ្នែក ហ្គារ៉ាស ឡានផងដែរ។
គូរបញ្ជាក់ថាផូ មុនីពៅ បានរៀបការជាមួយបុរសរូបសង្ហារជាជាតិបារាំងលោកEric Boissoneau កាលពីថ្ងៃទី១៩កុម្ភៈឆ្នាំ២០១១ ហើយពេលនេះពួកគេទទួលបានចំណងដៃកូនប្រុសម្នាក់ និងរស់នៅទីក្រុងម៉ែលប៊ន ប្រទេសអូស្រា្ដលី។អ្នកនាងមុនីពៅ និយាយថាការមានកូន១មិនទាន់គ្រប់គ្រាន់ទេ សម្រាប់សុភមង្គលក្នុងគ្រួសារនាង ហេតុនេះហើយនាងចង់បានកូន១ថែមទៀតជាកូនប្រុសក៍បានស្រីក៍បាន តែមិនទាន់មានដំណឹងល្អនោះទេ។អតីតតារាសម្ដែងនិងMC ធ្មេញចំពើសរូបនេះនិយាយបែបអឹមអៀនបន្ដិចថាមុនរៀបការប្ដីនាងមិនដែលធ្លាប់គិតថាចង់បានស្វាមីជាជនជាតិបារាំងនោះទេ គឺជៀសតែម្ដងព្រោះនាងដឹងថាការរៀនភាសាបារាំងគឺពិបាកណាស់ហើយរៀន១០ឆ្នាំមិនទាន់ស្ទាត់ផង ព្រោះនាងមានឪពុកជាគ្រូបង្រៀនភាសារបារាំងនៅក្រសួងអប់រំ។
នាងធ្លាប់មានគម្រោងចង់រស់នៅស្រុកខ្មែរហើយបង្កើតមុខរបរអ្វី១ តែដូចពាក្យគេថាជៀសណាស់គង់តែជំពប់មិនខុសមែន។អ្នកនាងថាក្រោយដកខ្លួនពីសិល្បៈហើយមានស្វាមីនិងកូន១មកជីវិតនាងមានក្ដីសុខបំផុតគឺបានប្ដីជាសុភាពបុរស(gentlemen)ពិតៗដែលស្រលាញ់នាងនិងក្រុមគ្រួសារដោយស្មោះត្រង់ ពិសេសក្រុមគ្រួសារខាងស្វាមីនាងជាអ្នកស្រលាញ់ស្រុកខ្មែរ និងអង្គរវត្តគឺឲ្យតែមកលេងខ្មែរដឹងតែទៅអង្គរវត្តហើយ។អ្នកនាងមុនីពៅ ថានាងនឹងវិលត្រឡប់ទៅអូស្រា្ដលីវិញនៅសប្ដាហ៍ក្រោយ(២៦មីនា)ហើយនាងបញ្ចេញទស្សនៈថាបន្ទាប់ពីឃ្លាតពីសិល្បៈជាង១ទសវត្សន៍មកនេះអ្នកនាងមើលឃើញតារាជំនាន់ក្រោយមានការរីកចម្រើនច្រើន ពិសេសគឺមានការប្រលងបង្ហាញសម្ថភាពពិតៗ ខុសពីមុនដែលអ្នកខ្លះចូលតាមគ្នាឬមានខ្សែរ ហើយអារម្មណ៍ពិតរបស់នាងនៅតែស្រលាញ់និងចង់ឃើញសិល្បៈខ្មែរមានការរីកចម្រើនថែមទៀត៕