ភ្នំពេញ៖ការចរចាររវាងហង្សមាស និងមាស សុខសោភា បានបរាជ័យចុងក្រោយនៅឆ្នាំ២០២០ ក្រោយផលិតកម្មធំ១នេះបានចាប់អារម្មណ៍លើតារាចម្រៀងសំនៀងផ្អែមអស់រយៈពេលជាង១០ឆ្នាំមកហើយ តែទីបំផុតសុខសោភា នៅតែមិនអាចក្លាយទៅជាសមាជិករបស់ហង្សមាសដដែល។តាមព័តមានថាថៅកែហង្សមាសបានត្រៀមរួចជាស្រេចសម្រាប់ទុកកៅអីឲ្យសុខសោភា ឡើងទៅអង្គុយធ្វើជាCoach ឬគណៈកម្មារការក្នុងកម្មវិធីប្រលងចម្រៀងលំដាប់អន្ដរជាតិពិសេសតំណែងដែលនៅទំនេររបស់ព្រាប សុវត្ថិ ទាំង៣ក្រោយលោកដើរចេញ មានដូចជា Cambodian Idol ,The Voice Kids Cambodia និងCambodian Idol Junior ។ប៉ុន្ដែក្រោយសុខសោភា ទៅចូលរាម ធ្វើឲ្យថៅកែហង្សមាសបង្វិលទិសដៅផ្ទេរទៅឲ្យតារាផ្សេងក្នុងនោះដូចជាកាលពីពេលថ្មីៗនេះនាងសុខ សីឡាលីន ឆក់ឱកាសបានធ្វើជាគណៈកម្មារការCambodian Idol ជាដើម។
អ្នកជំនាញធ្វើភ្លេង(Composer)ម្នាក់នៅហង្សមាសបានប្រាប់ដោយស្នើរសុំមិនឲ្យដាក់ឈ្មោះថាជាការពិត ប្រសិនបើមាស សុខសោភា មកហង្សមាសនាងពិតជាត្រូវបានថ្នាក់ដឹកនាំប្រគល់ឲ្យធ្វើជាគណៈកម្មារការ ឬគ្រូបង្វឹកពីបណ្ដារកម្មវិធីប្រលងចម្រៀងធំៗទាំងនោះមែន ព្រោះទាំងបទពិសោធន៍និងកេរ្ដិ៍ឈ្មោះរបស់សោភា គឺសាកសមបំផុតក្នុងការផ្ដល់ឬផ្ទេចំណេះដឹងឲ្យទៅយុវវ័យជំនាន់ក្រោយ។ប៉ុន្ដែនៅពេលគាត់(សោភា)មិនមកហង្សមាសក៍មានតារាផ្សេងៗទៀតអាចធ្វើបានដែរដូចជាពេជ្រ សោភា ,សុគន្ធ និសា និងសុខ សីឡាលីន និងតារាមួយចំនួនទៀត មិនមែនថាអាភា មិនម៉ោរស្ទះធ្វើមិនចេញនោះទេ។
យ៉ាងណាក្នុងជំនួបផ្ទាល់កន្លងមកមាស សុខសោភា ធ្លាប់ប្រាប់ថានាងមិនចាប់អារម្មណ៍និងការទៅហង្សមាសដើម្បីបានតំណែងធ្វើជាគ្រូបង្វឹក ឬគណៈកម្មារកម្មវិធីប្រលងចម្រៀងមួយណានោះទេ ព្រោះនាងយល់ថាគេបានដើរមុននាងទៅហើយ ដែលពេលនេះមិនមានចម្លែក ព្រោះក្លាយទៅជាធម្មតា។សោភា ថាហង្សមាសពិតជាធ្លាប់ទាក់ទងនាងមែន ហើយមិត្តភក្ដិនាងមួយចំនួនដែលច្រៀងនៅទីនោះក៍ចង់ឲ្យនាងទៅផលិតកម្មនេះដែរ តែចុងក្រោយនាងទៅរាម វិញគឺដើម្បីច្រៀងផងរកស៊ីផង។
ទោះជាមាស សុខសោភា ថាមិនដែលចង់បានតំណែងជាគ្រូបង្វឹក ឬគណៈកម្មារការប្រលងចម្រៀងនៅហង្សមាសក្ដី ប៉ុន្ដែអ្នកជំនាញសិល្បៈបានលើកឡើងថារឿងដែលសោភា ក្លាយទៅជាតារាហង្សមាសហាក់កាន់តែរួមតូចទៅៗហើយព្រោះថាតារារាម រូបនេះខ្លាចទៅដល់ថៅកែឲ្យនៅក្រោមឱក សុគន្ធកញ្ញា ដែលជាប្អូនថ្លៃម្ចាស់ផលិតកម្មហើយសោភា មិនចង់ធ្វើជាតួរង និងម្យាងទៀតពេលនេះព្រាប សុវត្ថិ ចេញពីហង្សមាសទៅហើយហេតុនេះឱកាសនៃការចាប់ដៃគូគ្នាក៍បាត់បង់ទៅហើយ ហេតុនេះសោភា អាចនឹងបន្ដនៅជាមួយរាម ជាច្រើនឆ្នាំទៀតព្រោះថាទោះជាពេលនេះនាងមិនទាន់មានបទចម្រៀងផ្ទុះខ្លាំងដូចមុនក្ដី តែនាងគឺជាតួឯក។
មាស សុខសោភា បានផាត់ចោលផលិតកម្ម៣ដើម្បីទៅជ្រកនៅរាម ក្នុងនោះគឺមានហង្សមាស,Galaxy និងថោន ដែលចង់ឲ្យនាងវិលវិញ។តែសោភា ប្រាប់ថាGalaxy មិនដែលទាក់ទងមកនាងម្ដងណាឡើយ គឺមានតែហង្សមាសដែលចង់បាននាងមែន ខណៈដែលថោន វិញនាងយល់ថាធ្លាប់ច្រៀងនៅទីនោះរយៈពេល៩ឆ្នាំគឺគ្រប់គ្រាន់ហើយនាងគ្មានបំណងវិលវិញនោះទេ។តែទំនាក់ទំនងរវាងនាងនិងថៅកែប្រុសស្រីថោន គឺនៅតែដដែល ហើយបើមានកម្មវិធីណាគាត់ហៅគឺនាងនឹងទៅចូលរួមដោយរីករាយ។
សូមបញ្ជាក់ថាមាស សុខសោភា បានផ្អឹបផលិតកម្មផ្ទាល់ខ្លួនCamtrax ដែលគ្រប់គ្រងដោយស្វាមីនាងលោកអ៊ឹត រ៉ាដា ដើម្បីពង្រឹងតែលើតែការចេញបទចម្រៀងនៅរាម តែមួយច្រកប៉ុណ្ណោះហើយនៅឆ្នាំ២០២២ នេះនាងបានតាំងចិត្តថានឹងបញ្ចេញស្ទីលនៃការច្រៀងសម្ដែងថ្មីបំផុតមិនធ្លាប់មានតាំងពីនាងចាប់អាជីពចម្រៀងគឺដើម្បីវាយលុកទីផ្សារជាថ្មី។តែការរៀបជើងព្រួលរបស់សោភា ហាក់ពិបាកព្រោះអ្នកជំនាញសិល្បៈបានលើកឡើងថាបទចម្រៀងដែលរាម ផលិតមិនមែនដើម្បីប្រជែងជាមួយហង្សមាស ឬGalaxy ឡើយ។ដោយឡែកសម្រាប់សោភា វិញគ្រាន់តែចូលរាម ជាង១ឆ្នាំនេះនាងបានវិវត្តន៍ខ្លួនទៅជាថៅកែស្រីមានហាង២ផ្ទាល់ខ្លួន តែសោភា ដែលមានវ័យចង់ជ្រេបន្ដិចនោះនាងកំពុងតែបារម្ភរឿងពិបាកយកកូន បន្ទាប់ពីបានទម្លាយរូបខួបអាពាហ៍ ពិពាហ៍ គម្រប់១២ឆ្នាំកាលពីថ្ងៃទី២៨ខែធ្នូឆ្នាំ២០២២ ៕
