ភ្នំពេញ ៖ នៅទីបំផុត កម្មវិធីប្រកួតកញ្ញាឯកចក្រវាលកម្ពុជា ឆ្នាំ២០២២ (Miss Universe Cambodia 2022) រដូវកាលទី៦ បានរកឃើញម្ចាស់មកុដពេជ្រ តម្លៃ ១៨ម៉ឺនដុល្លារហើយ បន្ទាប់ពីការប្រកួតវគ្គផ្តាច់ព្រ័ត្រ កាលពីរាត្រីថ្ងៃទី១៥ ខែមិថុនា ឆ្នាំ២០២២ ។
ជ័យលាភីកញ្ញាឯកចក្រវាល ឆ្នាំ២០២២ នេះ គឺកញ្ញា ហង្ស ម៉ានីតា អាយុ២៤ឆ្នាំ ពាក់ស្លាកលេខ MUC18 ជាកូនកាត់ខ្មែរ-បារាំង ដែលបានគ្រងមកុដពេជ្រ តម្លៃរហូតដល់ ១៨ម៉ឺនដុល្លារ គឺជាការច្នៃថ្មីប្លែកដ៏ទាក់ទាញ ឧបត្ថម្ភពីលោក ចិន សំណាង ជាម្ចាស់ហាងពេជ្រ CSNJ Samnang Jewelry ។
លោក ម៉ែន និមលរតន៍ អ្នកចាត់ការទូទៅកម្មវិធីកញ្ញាឯកចក្រវាលកម្ពុជា ឆ្នាំ២០២២ បានថ្លែងថា លោកពិតជាមានភាពសប្បាយរីករាយនៅពេលឃើញព្រឹត្តិការណ៍នេះ ពីមួយឆ្នាំទៅមួយឆ្នាំទទួលបានការគាំទ្រពីទស្សនិកជន និងមហាជនទូទៅ ជាពិសេសសម្រាប់ឆ្នាំទី៦ នេះ មានការជួយជ្រោមជ្រែងពីម្ចាស់ហាងពេជ្រខាងលើ សម្រាប់មកុដដ៏ស្រស់ស្អាត និងទាក់ទាញ ធ្វើឱ្យកម្មវិធីទាំងមូល កាន់តែទទួលការគាំទ្រពីទស្សនិកជន។
អ្នកចាត់ការទូទៅរូបនេះ បញ្ជាក់ថា កញ្ញា ហង្ស ម៉ានីតា ពិតជាស័ក្តិសមក្លាយជាជ័យលាភីកញ្ញាឯកចក្រវាល ឆ្នាំ២០២២ នេះ ។ លោករំពឹងថា ជ័យលាភី Miss Universe Cambodia 2022 ឆ្នាំនេះ នឹងធ្វើឱ្យកម្ពុជា កាន់តែលេចមុខលេចមាត់ច្រើនថែមទៀត លើឆាកអន្តរជាតិ ដែលកញ្ញា នឹងត្រូវចូលរួមប្រកួតថ្នាក់អន្តរជាតិ ក្នុងពេលដ៏ខ្លីខាងមុខ។
ជ័យលាភីកញ្ញាឯកចក្រវាល ឆ្នាំ២០២២ កញ្ញា ហង្ស ម៉ានីតា បានបង្ហាញពីភាពរីករាយជាខ្លាំងនៅពេលបានក្លាយជាជ័យលាភីកញ្ញាឯកចក្រវាល ឆ្នាំ២០២២ នេះ។ កញ្ញា ឲ្យដឹងទាំងរំភើបថា កញ្ញាមិននឹកស្មានដល់ទេថា ខ្លួនអាចឈានទៅគ្រងមកុដដ៏ស្រស់ស្អាត និងទាក់ទាញបែបនេះ ព្រោះតែបេក្ខភាពចូលរួមប្រកួត សុទ្ធសឹងតែជាអ្នកមានសមត្ថភាព ព្រមទាំងរូបស្រស់ស្អាតមួយបែបម្នាក់។
កញ្ញា ហង្ស ម៉ានីតា បន្តថា នេះមិនមែនជាលើកទី១ទេ ដែលនាងចូលរួមប្រកួតប្រជែងកញ្ញាឯកនៅក្នុងប្រទេសកម្ពុជា ដោយនាងធ្លាប់ចូលរួមប្រកួតប្រជែង ៣ទៅ៤ដងមកហើយ ទម្រាំបានជោគជ័យនៅពេលនេះ ។
សូមបញ្ជាក់ថា កញ្ញា ហង្ស ម៉ានីតា គឺជាកញ្ញាឯកចក្រវាឡកម្ពុជា ទី៦ ដែលនឹងតំណាងឱ្យកម្ពុជា ក្នុងការប្រកួតកញ្ញាឯកចក្រវាល (Miss Universe 2022) នាពេលខាងមុខនេះ ហើយកញ្ញា ក៏ជាកញ្ញាឯកចក្រវាឡកម្ពុជា ដំបូងគេបង្អស់ ដែលបានគ្រងមកុដពេជ្ររចនាថ្មី តម្លៃ ១៨ម៉ឺនដុល្លារ ពីហាងពេជ្រ CSNJ។
គួរបញ្ជាក់ដែរថា បេក្ខនារីដែលបានជាប់ជាជ័យលាភីកញ្ញាឯកចក្រវាលកម្ពុជា ឆ្នាំ២០២២ ៥រូបចុងក្រោយ (Top 5) ក្នុងឆ្នាំ២០២២ នេះ រួមមាន ៖ MUC18 ហង្ស ម៉ានីតា ជ័យលាភីកញ្ញាឯក ( Miss Universe Cambodia 2022), MUC09 ហេង សុទ្ធនិស្ស័យ ជ័យលាភីលេខ២ (1th Runner up Miss Universe Cambodia 2022), MUC04 ហេង ប៉ូនីកា ជ័យលាភីលេខ៣ (2th Runner up Miss Universe Cambodia 2022), MUC08 រតនា សុខាវត្តី ជ័យលាភីលេខ៤ (3rd Runner up Miss Universe Cambodia 2022) និង MUC17 ហ៊ុន ហ្គេចឡាង ជ័យលាភីលេខ៥ (4th Runner up Miss Universe Cambodia 2022)៕ ខៀវទុំ