ភ្នំពេញ៖ព្រាប សុវត្ថិ បានលេចមុខក្នុងកម្មវិធីមង្គលការកូនអ្នកនាងគង់ សុជាតិ កាលពីថ្ងៃទី១៨មិថុនា ហើយតារាGalaxy រូបនេះឡើងច្រៀងទុកជាចំណងដៃឲ្យគូស្នេហ៍ថ្មោងថ្មីតាមរយៈបទមរតកដើម”ទ្រព្យគាប់ចិន្ដា” ដែលធ្វើឲ្យភ្ញៀវទាំងឡាយចាប់អារម្មណ៍និងខ្លះយកកាមេរ៉ាទូរស័ព្ទព្រោងព្រាតទៅថតលោកនៅលើឆាកព្រោះតែទឹកដមសំនៀងដ៍ក្រអួនក្រអៅរបស់លោកសុវត្ថិ នៅតែធ្វើឲ្យមនុស្សគ្រប់វ័យចូលចិត្តស្ដាប់បទចម្រៀងលោក។អ្វីដែលគូរឲ្យចាប់អារម្មណ៍នោះព្រាប សុវត្ថិ ត្រូវបានពិធីករប្រកាសឈ្មោះលោកថាជាឧកញ៉ាព្រាប សុវត្ថិ ខណៈដែលតារាទាំងចាស់និងវ័យក្មេងកាន់តែគោរពលោកជាងមុនថែមទៀតផង ដោយពួកគេហៅអ្នកចម្រៀងរូបនេះថា”លោកឧកញ៉ាស្នាយៗ”។
លោកព្រាប សុវត្ថិ ធ្លាប់ប្រាប់អ្នកយកព័តមានយើងថាលោកពិតជាស្រលាញ់និងពេញចិត្តច្រៀងCover បទមរតកដើមខ្លាំងណាស់។ដោយឡែកមជ្ឈដ្ឋានមហាជនវិញសង្កេតឃើញថាតាំងពីលោកព្រាប សុវត្ថិ ចេញពីហង្សមាសចូលGalaxy ជិត២ឆ្នាំមកនេះលោកមិនសូវមានបទចេញថ្មីៗមកល្បីខ្លាំងដូចមុនទេ ពោលគឺអ្នកនិយមស្ដាប់ចម្រៀងរបស់លោកច្រើនតែយកបទចាស់ៗរបស់លោកស្នាយ ច្រៀងឡើងវិញ។ប៉ុន្ដែការច្រៀងបទមរតកដើមក្នុងកម្មវិធីមង្គលការនិងជប់លៀងធំៗនោះគ្រប់គ្នាអាចមើលដឹងថាពិបាករកតារាផ្សេងៗទៀតមកប្រៀបផ្ទឹមជាមួយលោកសុវត្ថិ តែម្ដងព្រោះសម្លេងលោកនៅតែក្រអួនក្រអៅទោះជាឆ្នាំនេះលោកឧកញ៉ាសុវត្ថិ មានវ័យឈានចូល៤៧ឆ្នាំទៅហើយក្ដី។
សម្រាប់ទស្សនិកជនដែលគាំទ្រលោកព្រាប សុវត្ថិ ពួកគេរងចាំមើលថាតើនៅចុងឆ្នាំ២០២២ និងដើមឆ្នាំ២០២៣ ខាងមុខនេះលោកសុវត្ថិ នឹងមានការប្រែប្រួលទីផ្សារចម្រៀងបានកម្រិតណាព្រោះថាពេលនេះអតីតអ្នកនិពន្ធនិងដឹកនាំសម្ដែងដល់ទៅ២រូបរបស់ហង្សមាសដែលធ្លាប់រួមការងារជាមួយលោកសុវត្ថិ គឺលោកខាំ ភូរិ និងសុខ ជំនោរ ពួកគេបានចូលទៅGalaxy តាមលោកឧកញ៉ាស្នាយ ដែរដែលមានន័យថាអ្នកទាំង៣នឹងបានរួមការងារជាមួយគ្នាសារជាថ្មីឡើងវិញ បន្ទាប់ពីលោកយឹម តាស្រង់បានដើរចេញ។ដោយឡែកសម្រាប់ចំនួនកុងត្រា របស់លោកសុវត្ថិ នៅទ្រនុំថ្មីនាតំណាក់កាលដំបូងគឺនៅសល់ដល់ឆ្នាំ២០២៥ ឯណ្ណោះហេតុនេះហើយអតីតតារាហង្សមាសដែលត្រូវគេទម្លាយថាមានទ្រព្យសរុបខ្ទង់៣០លានដុល្លារពីការចាប់អាជីពចម្រៀងជាង២០ឆ្នាំរូបនេះនឹងអាចធ្វើឲ្យទីផ្សារចម្រៀងរបស់លោកមានការផ្លាស់ប្ដូរជាមិនខាន។ប៉ុន្ដែអ្វីដែលគូរឲ្យកត់សម្គាល់លោកសុវត្ថិ ហាក់ចាប់ផ្ដើមរយាលៗពីការងារសិល្បៈបន្ដិចម្ដងៗក្រោយក្លាយជាឧកញ៉ាមកហើយលោកបែជាផ្ដោតលើការលក់ដីធ្លីច្រើនជាងច្រៀងរាំទៅវិញ៕
