ភ្នំពេញ៖រយៈពេលជាង១ឆ្នាំមកហើយដែលនាងគង់ ស្រីពេជ្រ ហៅពេជ្រ សូលីកា បានប្ដូរចិត្ត ពន្យាពេលយកកូនទី២ដែលការប្រែប្រួលបែបនេះ របស់អតីតតាRock និងM ដោយសារតែនាងមិនចង់បាត់មុខពីសិល្បៈសារជាថ្មី ខណៈអាជីពចម្រៀងបើទោះជាហាក់ពិបាកទៅមុខមែន តែនាងនៅត្រូវប៉ាន់ស្ពតពាណិជ្ជកម្មខ្លះៗ ប៉ុន្ដែមិនដល់កម្រិតតារារួមក្រុមដូចជាពេជ្រ សោភា,ឱក សុគន្ធកញ្ញា និងរ៉េត ស៊ូហ្សាណា ឡើយ។យ៉ាងណាតារាកូន១រូបនេះហាក់នៅមានចេតនាចង់ប្រជែងទីផ្សារចម្រៀងសារជាថ្មីនៅឡើយតាមរយៈការប្រឹងរក្សារសម្រស់មិនឲ្យធ្លាក់ចុះនោះគឺមិនឲ្យឡើងគីឡូឬបែកសាច់ដូចតារាមួយចំនួនទៀតដែលមានប្ដីនិងកូនដូចនាង។ដោយឡែកអ្នកជំនាញសិល្បៈបានលើកឡើងថាតាំងពីផ្ទុះកូវីដមកតារាចម្រៀងស្រីដែលមានរាសីល្អនៅហង្សមាសគឺមានតែនាងរ៉េត ស៊ូហ្សាណា ម្នាក់ប៉ុណ្ណោះ ខណៈដែលម្ចាស់ពានទាំងឡាយរួមទាំងសូលីកា ផងមិនត្រូវបានគេចាត់ទុកថាមានគីឡូអាចតទល់ជាមួយជើងខ្លាំងរបស់Galaxy គឺនាងតន់ ច័ន្ទសីម៉ា ឡើយ។
ថ្វីត្បិតតែពេជ្រ សូលីកា ពិបាកប្រជែងទីផ្សារចម្រៀងកាន់តែខ្លាំងឬស្ទើតែអាចនិយាយបានថានាងលែងឡើងថែមទៀតក្រោយមានប្ដីនិងកូន១ ប្រសិនបើនៅតែគ្មានបទផ្ទុះក្ដី ប៉ុន្ដែថៅកែហង្សមាសនៅតែទុកចិត្តស្រីស្រស់និងទម្លាក់បទឲ្យច្រៀងយូៗ១បទ ខណៈដែលតំណែងតួឯកក្នុងភាពយន្ដវិញសូលីកា បែជាមានប្រៀបជាងគេនៅហង្សមាស ដែលនេះបញ្ជាក់ថាសូលីកា នៅតែមានទីផ្សារសម្ដែងជាងចម្រៀង។ចំពោះស្រីពេជ្រ ផ្ទាល់វិញត្រូវបានគេកត់សម្គាល់ថានាងក៍មិនពឹងទៅលើអាជីពចម្រៀងទាំងស្រុងទៀតដែរ ព្រោះស្វាមីនាងលោកគឹម ហាន ជាអ្នកជំនួញម្នាក់ដែលបានផ្គាប់ចិត្តនាងគ្រប់បែបយ៉ាងទាំងអស់ក្នុងនោះមានទាំងការទិញផ្ទះវីឡារ ,បន្ទប់ខុនដូ និងរថយន្ដទំនើបៗឲ្យនាងជិះ ហេតុនេះហើយការរាំច្រៀងរបស់ស្រីពេជ្រ នៅពេលនេះមិនមែននាងសំដៅដល់ការរកលុយទាំងស្រុងពីអាជីព១នេះឡើយ។
សូមបញ្ជាក់ថាអ្នកចម្រៀងគង់ ស្រីពេជ្រ ហៅសូលីកា ត្រូវបានគេចាត់ទុកថានាងមានសម្ថភាពសម្លេងមធ្យមតែកន្លងមកគេចាប់អារម្មណ៍ទៅលើទេពកោសល្យសម្ដែងនិងរូបសម្រស់របស់នាងច្រើនជាង។សូលីកា មិនធ្លាប់ត្រូវបានគេដៅថានាងអាចធ្វើព្យុះភ្លៀងឬឈានទៅជំនួសតំណែងតារាស្រីលំដាប់ជូរមុខរបស់ហង្សមាសនាពេលអនាគតបានឡើយ តែការមានឱកាសឈានចូលហង្សមាសជាលើកទី២បញ្ជាក់ថាថៅកែហង្សមាសនៅតែចាត់ទុកនាងជាតារាមានសម្ថភាពមិនអាចមើលរំលងបានព្រោះក្រៅពីសុគន្ធ និសា និងសូលីកា មិនមានតារាផ្សេងណាទៀតដែលចេញពីហង្សមាសហើយអាចចូលមកវិលវិញបាននោះទេ។ប៉ុន្ដែសូលីកា អាចធ្វើបានហេតុនេះគេជឿរថាបើនាងមិនសូវមានយ៊ីអ៊ុនល្អ ឬច្រៀងលែងឡើងនោះច្បាស់ជាថៅកែធំហង្សមាសរុញនាងឲ្យទៅគ្រងតំណែងជាតួឯកក្នុងភាពយន្ដទាំងស្រុងជាមិនខាន។
ពេជ្រ សូលីកា បានកប់ចោលស្រមោលស្នេហ៍ដ៍ខ្មៅងងិតក្រោយពីនាងភ្ជាប់ពាក្យជាមួយអ្នកឌីហ្សាញម៉ូដសម្លៀកបំពាក់មកពីអូស្រ្ដាលីលោកគឹម ហាន កាលពីថ្ងៃទី២៥ខែតុលាឆ្នាំ២០១៩ និងសម្រាលបានកូនប្រុសថ្ងៃទី១៦ឧសភាឆ្នាំ២០២០។ចំណងស្នេហាជាង២ឆ្នាំនេះសូលីកា ចង់ដឹកដៃប្ដីរៀបការតាំងពីឆ្នាំ២០២១ មកម្លេះតែផែនការណ៍នេះត្រូវបានលុបចោលវិញដោយសារតែពេលនោះកូវីដផ្ទុះខ្លាំងពេក ហើយរហូតមកដល់ពេលនេះក្រៅពីស្ងាត់រឿងយកកូនថែមនោះរឿងនាងរៀបការក៍គ្មានដំណឹងដែរ បន្ទាប់ពីម្ដាយនាងអ្នកស្រីស៊ិន ស្រីនាង ត្រូវតុលាការចេញសាលក្រមកាត់ទោសដាក់ព័ន្ធនាគាររយៈពេល១២ឆ្នាំ ពាក់ព័ន្ធករណីសម្លាប់គូស្នេហ៍ភេទដូចគ្នាទៅលើអ្នកស្រីងិន សុខលី កាលពីថ្ងៃទី១១ខែមករាឆ្នាំ២០២០។តាមព័តមានថាសូលីកា ហាក់រារែកចិត្តព្រោះមិនចង់រៀបការដោយគ្មានម្ដាយចូលរួម និងម្យាងទៀតនាងអាចនឹងទៅរៀបការនៅអូស្រា្ដលីវិញនាពេលខាងមុខនេះ។
ក្រៅពីពេជ្រ សូលីកា តារាដែលយកប្ដីអាណិកជនខ្មែរនៅអូស្រា្ដលីមានដូចជាអ្នកនាងដាញ់ ម៉ូនីកា,អឿន ដាលីស,គឹម លីហ្សា និងសុខ ច័ន្ទណានូ ជាដើម៕