ភ្នំពេញ៖អតីតារាចម្រៀងRock ម៉ូលីកា បានបង្ហាញអារម្មណ៍សែនរំភើបចិត្តក្រៃលែងក្រោយបានធ្វើខួបកំណើតឲ្យកូនស្រីសំណព្វចិត្តរបស់នាងនុណ ច័ន្ទម៉ូនីតា គម្រប់២ឆ្នាំនិងឡើងផ្ទះថ្មីកាលពីថ្ងៃទី៧ខែកក្កដាឆ្នាំ២០២២ នោះមានវត្តមានដ៍ខ្ពង់ខ្ពស់ពីសំណាក់លោកជំទាវហ៊ុន ស៊ីណាត ដែលជាប្អូនរបស់លោកនាយករដ្ឋមន្រ្ដីហ៊ុន សែន ចំណាយពេលវេលាអញ្ជើញចូលរួមហើយលោកជំទាវថែមទាំងចងដៃលើកទឹកចិត្តដល់នាងទៀតផង។ម៉ូលីកា ដែលត្រូវបានគេចាត់ទុកថាជាកំពូលអ្នកលក់Online ម្នាក់នោះចាត់ទុកលោកជំទាវហ៊ុន ស៊ីណាត ថាជា ”ម៉ែ”បានចេញសារនៅថ្ងៃទី៩ខែកក្កដាឆ្នាំ២០២២ ថា”លោកជំទាវម៉ែគាត់មកចូលរួមកម្មវិធីខ្ញុំ គាត់ចងដៃខ្ញុំទៀត ខ្ញុំពិតជាមានសំណាងណាស់។តើខ្ញុំធ្វើបុណ្យអីខ្លះពីមុនមក បានថ្ងៃពិសេសរបស់ខ្ញុំ,ខ្ញុំមានសំណាងបានជំទាវ ម៉ែហ៊ុន ស៊ីណាត មកចូលរួមនិងជូនពរក្នុងថ្ងៃពិសេសនេះ!កូនសូមអរគុណ និងជូនពរជំទាវម៉ែ ឲ្យមានសុខ ភាព ល្អ និងជាម្លប់ដល់កូនចៅ”។
ក្រៅពីមានមោទនភាពនិងអារម្មណ៍រីករាយដែលធ្វើកម្មវិធីធំមានប្អូនលោកនាយករដ្ឋមន្រ្ដីចូលរួមឲ្យពរជ័យនោះម៉ូលីកា និងស្វាមីនាងលោកហុង មានុណ ក៍បានលើកម្រាមដៃដប់ថ្លែងអំណរគុណដល់មិត្តរួមអាជីព និងបណ្ដារ ដៃគូអ្នករកស៊ីOnline ជាមួយគ្នា រួមទាំងភ្ញៀវកិត្តិយសទាំងអស់ដែលបានអញ្ជើញចូលរួម កម្មវិធីរបស់អ្នកទាំង ពីរផង ដែរ។ម៉ូលីកា ចាត់ទុកការមកលើកទឹកចិត្តនាងនៅថ្ងៃឡើងផ្ទះនិងខួបកូន នោះជាសក្ខីភាព មួយបញ្ជាក់ ថាទោះជាមានមុខរបររកស៊ីដូចគ្នាមែន តែមិត្តភក្ដិនិងបងប្អូន ទាំងអស់សហការណ៍និងរាប់អានគ្នាខ្លាំងណាស់ហើយពួកគេរីករាយនៅពេលដែលឃើញនាងមានការវិវត្តន៍កម្រិតជីវភាពឆ្លងផុតពីការរស់នៅផ្ទះជួលមក សម្រេចបាននូវផ្ទះក្នុងក្ដីស្រម៉ៃដូចពេលនេះ។
គូរបញ្ជាក់ថាអតីតតារាRock ម៉ូលីកា បានរៀបការជាមួយតារាសម្ដែងរូបសង្ហារលោកហុង មានុណ ហៅឆានុណ កាលពីថ្ងៃទី១៨ខែមករាឆ្នាំ២០២០ ហើយនាងបានសម្រាលកូនស្រីថ្ងៃទី៥ខែកក្កដាឆ្នាំ២០២០ ។ក្រោយគូស្នេហ៍ តារា១គូនេះចាប់ដៃគ្នាបានជាង២ឆ្នាំនេះអ្នកទាំងពីរបានប្រឹងប្រែងរកស៊ីរួមគ្នារហូតធ្វើឲ្យមាន ជីវភាពធូធារទិញ បានរថយន្ដទំនើបៗជិះដូចជាម៉ាកRange Rover, Ford Raptor ,Alphard និងJaguar រួមទាំងការឡើងផ្ទះថ្មីតម្លៃ ជាង៣០ម៉ឺនដុល្លារនៅបុរីវារីណា សង្កាត់ក្រាំងធ្នង់ ខណ្ឌសែនសុខរាជធានីភ្នំពេញ។គេកត់សម្គាល់ថាមុនម៉ូលីកា បង្ហាញអារម្មណ៍រីករាយគ្មានអ្វីប្រៀបផ្ទឹមបានដោយសារតែកម្មវិធីរបស់នាងត្រូវបានលោកជំទាវហ៊ុន ស៊ីណាត ផ្ដល់កិត្តិយសចូលរួមនោះកន្លងមកគេឃើញនាងនិងស្វាមីក៍តែងតែទៅលេងនិងសួរសុខទុក្ខប្អូនលោកនាយក រដ្ឋមន្រ្ដីដល់ផ្ទះជាច្រើនលើកច្រើនសារមកហើយ៕
