ភ្នំពេញ៖តារាស្រអែមស្រស់ឌុច លីដា បានវាចាថាជាគោលការណ៍ផ្ទាល់ខ្លួននាងតែងតែប្រើបេះដូងតាមដានប្ដីដើម្បីឲ្យដឹងថាបេះដូងស្វាមីនៅជាមួយនាងឬអត់?នាងថាមិនត្រូវការតាមដានប្ដីដោយប្រើGPS នោះទេព្រោះគេអាចយកឡានទៅទុកនៅកន្លែងផ្សេង យើងនៅតែមិនដឹងដដែល។ការលើកឡើងរបស់តារាកូន១ឌុច លីដា បែបនេះក្រោយពីនាងមិនដែលបណ្ដើរស្វាមីទៅចូលរួមកម្មវិធីរបស់តារារួមអាជីពឡើយ ទើបធ្វើឲ្យមិត្តភក្ដិនាងខ្លះបានសួរតារាស្រអែមស្រស់រូបនេះថាបើទុកប្ដីឲ្យនៅម្នាក់ឯងហើយអត់ចេះតាមដានយ៉ាងនេះទិចលោប្ដីលួចមានស្រីញីនៅខាងក្រៅទៅ?ប៉ុន្ដែភ្លាមៗនោះលីដា បានពន្យល់ទៅពួកគេថានាងតាមដានប្ដីរាល់តែថ្ងៃហ្នឹងគ្រាន់តែយកបេះដូងទៅតាមដានល្អជាងការប្រើមធ្យោបាយផ្សេងៗ។
សូមបញ្ជាក់ថាឌុច លីដា បានភ្ជាប់ស្នេហ៍ជាមួយបុរសចំណាស់ម្នាក់ដែលនាងអះអាងថាជាមន្រ្ដីរាជការតែមិនដែលប្រាប់តួនាទីប្ដីថាកាន់តំណែងអ្វីឡើយ បើទោះជាអ្នកកាសែតព្យាយាមសួរនាំយ៉ាងណាក្ដី ។លីដា បានសម្រាលកូនប្រុសកាលពីដើមឆ្នាំ២០២០ និងបានរៀបការបែបលាក់លៀមកាលពីថ្ងៃទី១៩ខែវិច្ឆិការឆ្នាំ២០២០ ។លីដា ធ្លាប់ទទួលស្គាល់ថានាងនិងស្វាមីពិតជាបានធ្វើពិធីបែបសែនព្រែនតាមប្រពៃណីខ្មែរដើម្បីគម្រប់កិច្ចមែន ព្រោះពេលនោះកូវីដផ្ទុះខ្លាំងពេកមិនអាចធ្វើធំដុំបាន។យ៉ាងណានាងថានៅពេលដែលកូនប្រុសរបស់នាងឈ្មោះកិត្យាមណី មានអាយុ៥ឆ្នាំនាងនឹងរៀបការជាចំហដូចគេ ដែលពេលនោះកូននាងនឹងធ្វើជាកូនអណ្ដើកឲ្យនាងតែម្ដង។សម្រាប់មជ្ឈដ្ឋានទាំងក្នុងនិងក្រៅសិល្បៈជាច្រើនបានសរសើរថាលីដា នាងមានចិត្តនឹងន ល្អណាស់ព្រោះនៅលើបណ្ដាញសង្គមនិងតារាមួយចំនួនខ្សឹបខ្សៀវថាលីដា មិនគូណាយកប្ដីវ័យចំណាស់ស្មើឪពុករបស់នាងបែបនេះសោះ ព្រោះនាងជាតារាល្បីម្នាក់ដែរ។ប៉ុន្ដែលីដា មិនក្វល់នោះទេហើយនាងប្រាប់ថាជីវិតនាងមានការប្រែប្រួលច្រើនក្រោយមានប្ដីនិងកូន១នេះព្រោះថាពីមុនទៅណាមកណាតែខ្លួន១អត់បញ្ហា តែឥឡូវគិតគូដល់ប្ដីនិងកូនហើយនាងចង់បំពេញតួនាទីជាស្រ្ដីមេផ្ទះម្នាក់ដ៍ល្អ ហេតុនេះហើយនៅពេលដែលកូននៅតូចបែបនេះនាងមិនទាន់ហ៊ានទទួលការថតសម្ដែងភាពយន្ដដែលប្រើពេលយូថ្ងៃនៅតាមខេត្តនោះទេ គឺទទួលតែការងារសិល្បៈណាដែលប្រើពេលតិចថ្ងៃសិន ដូចជាថតរឿងខ្លីៗ និងស្ពតជាដើម។
ក្រៅពីឌុច លីដា តារាដែលមានស្វាមីវ័យចំណាស់មានដូចជាអ្នកនាងចាន់ សុធារ័ត្ន,នៅ សុនិតា ,គឹម លក្ខិណា និងដាញ់ ម៉ូនីកា ជាដើម៕
