ភ្នំពេញ៖សុគន្ធ និសា បានបាត់មុខពីការកាន់តំណែងធំជាគ្រូបង្វឹក(Coach)The Voice Kids Cambodia រដូវកាលទី២ដែលកៅអីនោះត្រូវធ្លាក់ក្នុងកណ្ដាប់ដៃនាងសួស វីសា ។ប៉ុន្ដែសម្រាប់រដូវកាលទី៣នេះហង្សមាសបានប្រកាសពីគណៈកម្មាការរបស់ពួកគេពីកម្មវិធីប្រលងចម្រៀងមួយនេះ ដោយអះអាងថាCoach ទាំង៣រូបនៅរដូវកាលថ្មីនេះនេះមានសុគន្ធ និសា វិលមកកាន់តំណែងរបស់នាងសារជាថ្មីឡើងវិញមែន ខណៈដែលCoach ប្រុសមួយរូបទៀតដែលចូលទៅជំនួសលោកព្រាប សុវត្ថិ បានចាកចេញនោះគឺតារាចម្រៀងលោកកែ សុវណ្ណារ៉េត ហៅហ្សូណូ ស្របពេលដែលCoach ១រូបផ្សេងទៀតហង្សមាសនៅរក្សារតំណែងដដែលនោះគឺរបស់ឱក សុគន្ធកញ្ញា ។ប៉ុន្ដែអ្វីដែលកំពុងតែធ្វើឲ្យគេមានភាពមិនច្បាស់លាស់នោះថាតើនៅពេលដែលសុគន្ធ និសា វិលវិញបែបនេះនាងសួស វីសា នឹងត្រូវដកចេញឬយ៉ាងណា?
អ្នកដឹកនាំប្រគុំតន្រ្ដីម្នាក់នៅហង្សមាសបានប្រាប់ដោយសុំមិនឲ្យដាក់ឈ្មោះកាលពីថ្ងៃទី១៦កក្កដា ថាសុគន្ធ និសា ពិតជាត្រូវបានថៅកែឲ្យវិលមកធ្វើជាគូបង្វិកក្នុងកម្មវិធីThe Voice Kids Cambodia រដូវកាលទី៣នោះមែន ស្របពេលដែលលោកហ្សូណូ ជំនួសព្រាប សុវត្ថិ ។ប៉ុន្ដែលោកថាចំពោះរឿងសួស វីសា នឹងទៅជាយ៉ាងណានោះលោកមិនទាន់ដឹងរឿងនេះនៅឡើយទេ។
សុគន្ធ និសា ធ្លាប់និយាយប្រាប់អ្នកយកព័តមានយើងថាការបាត់ខ្លួនរបស់នាងពីតួនាទីជាCoach របស់The Voice Kids រដូវកាលទី២នោះមិនមែនថ្នាក់ដឹកនាំដកនាងចេញនោះទេ តែមកពីនាងសុំឈប់ដោយខ្លួនឯង ហើយមូលហេតុមកពីគ្មានពេលវេលាគ្រប់គ្រាន់ តែនាងគ្មានបំណងវិលវិញឡើយ។ប៉ុន្ដែមហាជនមើលឃើញថាការចាកចេញរបស់និសា ពីកៅអីធំនោះគឺព្រោះតែនាងពិបាកប្រឈមបញ្ហារិះគន់ព្រោះពេលនោះមានការលើកឡើងថានាងបានទម្លាក់បេក្ខភាពកុមារីដែលច្រៀងមិនសូវល្អឲ្យទៅវគ្គបន្ដ ខណៈដែលម្នាក់ទៀតដែលទស្សនិកជនមើលឃើញថាច្រៀងមិនសូវពិរោះនោះបែជានាងឲ្យជាប់ទៅវិញ។
សុគន្ធ និសា ធ្លាប់សារភាពថាការបាត់មុខនាងពីកម្មវិធីខាងលើនេះអាចធ្វើឲ្យប៉ៈពាល់ដល់រូបនាងខ្លះៗដែរព្រោះអ្នកខ្លះគិតថានាងធ្វើមិនកើតបានឈប់។ប៉ុន្ដែការលេចមុខសារជាថ្មីរបស់និសា ពេលនេះត្រូវបានមជ្ឈដ្ឋានមហាជនយល់ថានោះដោយសារតែថៅកែចង់ប៉ៈប៉ូវកិត្តិយសមកឲ្យនាងវិញ ម្យាងទៀតការផ្ដល់តំណែងធំនោះដើម្បីកុំឲ្យនិសា ដើរចេញពីហង្សមាសជាលើកទី២ផងដែរ ព្រោះតាមព័តមានថាមានផលិតកម្ម១បានចេញចិត្តនិងចង់បាននិសា ទៅរួមទ្រនុំរបស់គេផងដែរ។ដោយឡែកចំពោះលោកហ្សូណូ ដែលជាអតីតស្វាមីអ្នកនាងចាន់ សុផានី វិញភាពលេចធ្លោរបស់លោកនៅហង្សមាសត្រឹមមធ្យមប៉ុណ្ណោះ ហេតុនេះហើយការរ៉ាប់រងតួនាទីនេះជំនួសលោកឧកញ៉ាព្រាប សុវត្ថិ នឹងធ្វើឲ្យអតីតតារាKH និងM រូបនេះមានក្រេឌីតមួយក្រឺតទៀតមិនខាន។
គូរបញ្ជាក់ថាក្រោយព្រាប សុវត្ថិ ដើរចេញពីហង្សមាសកាលពីខែសីហាឆ្នាំ២០២០ នោះលោកឧកញ៉ាស្នាយ បានបន្សល់តំណែងធំ៣ដែលលោកធ្លាប់រ៉ាប់រងឲ្យនៅទំនេរក្នុងតួនាទីជាគ្រូបង្វឹកនិងគណៈកម្មាការក្នុងនោះគឺCambodian Idol ,The Voice Kids Cambodia និងCambodian Idol Junior ។ប៉ុន្ដែពេលនេះថៅកែហង្សមាសបានរកឃើញតារា២ដួងហើយដែលទៅជំនួសតំណែងព្រាប សុវត្ថិ នោះគឺនាងសុខ សីឡាលីន ចូលទៅធ្វើជាគណៈកម្មាការCambodian Idol រដូវកាលទី៤ និងលោកហ្សូណូ ជាគ្រូង្វឹកThe Voice Kids Cambodia រដូវកាលទី៣។យ៉ាងណានៅសល់តំណែងព្រាប សុវត្ថិ ១ទៀតដែលមិនទាន់មានអ្នករ៉ាប់រងនោះគឺCambodian Idol Junior ហើយតាមព័តមានថាថៅកែកំពុងតែសម្លឹងឃើញលោកខែម ប៊ុនថៃ និងពេជ្រ សោភា មានអតិភាពខ្ពស់ជាងគេ។ប្រភពបានឲ្យដឹងថារៀងរាល់Coach និងJudge ទាំងឡាយពួកគេនឹងទទួលបានកញ្ចប់ថវិការក្នុងម្នាក់ៗចំនួន៦០០០ដុល្លារក្នុង១រដូវកាល៕