ភ្នំពេញ៖ព្រាប សុវត្ថិ ចាប់ផ្ដើមមានការតុបតែងខ្លួននិងធ្វើតំណើរឲ្យសាកសមទៅនិងគោរម្យងាររបស់លោកជា”ឧកញ៉ា”បន្ទាប់ពីអតីតតារាហង្សមាសរូបនេះឡើងជាឧកញ៉ាជិត៣ខែមកនោះគឺទៅណាមកណាមានរថយន្ដដល់ទៅ៤គ្រឿងចេញព្រមគ្នាតែម្ដងគឺRolls Royce, Alphard, Bmw និងIzusu ហើយមានអង្គរក្សបើកប៉ូតូអម។សកម្មភាពបែបនេះរបស់លោកឧកញ៉ាស្នាយ ធ្វើឲ្យអ្នកគាំទ្រលោកលើកឡើងថាតារាវ័យ៤៧ឆ្នាំរូបនេះកាន់តែកាចទៅៗហើយពោលគឺឥទ្ធិពលរបស់លោកមិនចាញ់ឧកញ៉ាផ្សេងៗទៀតនោះទេ។តែព្រាប សុវត្ថិ មិនទាន់លេងស្ទីលជិះឧត្ថម្ភាគចក្រទៅលក់ដីឡូតិ៍ដូចតារាមួយចំនួនទេ បើទោះជាពេលនេះតារាGalaxy បានបន្ថយអាជីពច្រៀងរាំដោយផ្ដោតទៅលើការកស៊ីអចលនញទ្រព្យជាចម្បងក្ដី។
គូរកត់សម្គាល់ថាអំឡុងពេលដែលព្រាប សុវត្ថិ កាន់តែឡើងកាលីពក្នុងវ័យចំណាស់បន្ដិចមានទ្រព្យកាន់តែច្រើននេះដែរគេនៅតែចាប់អារម្មណ៍ថាកូនប្រុសទាំង៣របស់លោកដែលមានរូបសង្ហារកាត់ទៅតាមឪពុកនោះមិនមានទីផ្សារចម្រៀងស្ទុះឡើងទេនារយៈពេលចុងក្រោយនេះពោលគឺហាក់នៅទ្រឹងព្រមគ្នា បើទោះជាកូនទី១សុវត្ថិ មុនីវណ្ណ និងកូនទី២សុវតិ្ថ មុនីនាគ កំពុងតែបន្ដច្រៀងឲ្យហង្សមាស ខណៈកូនទី៣សុវត្ថិ សិរីវុឌ្ឍ ចេញមកធ្វើបទចម្រៀងខ្លួនឯងក្ដី ប៉ុន្ដែពួកគេទាំង៣នៅមិនទាន់មានម្នាក់ណាទៅចូលរួមជាមួយលោកឧកញ៉សុវត្ថិ នៅGalaxy ឡើយតែជាញឹកញាប់គេឃើញកូនៗរបស់លោកសុវត្ថិ ងាកទៅរកស៊ីលក់ដីឡូតិ៍ជាមួយឪពុករបស់គេទៅវិញ។
តាមរយៈការបន្ធូដៃពីអាជីពចម្រៀងព្រមគ្នាទាំងលោកឧកញ៉ាស្នាយ និងកូនកំលោះបែបនេះធ្វើឲ្យកាន់តែមានភាពស្រពិចស្រពិលពីអាជីពចម្រៀងរបស់កូនទាំង២របស់លោកនៅហង្សមាសថាអាចនឹងមិនមានភាពយូអង្វែងបើទោះជាមុននេះអ្នកជំនាញសិល្បៈបានលើកឡើងថាហង្សមាសនឹងមិនបណ្ដោយឲ្យគេយកបានទាំងឪពុកនិងកូនចេញពីទ្រនុំរបស់ខ្លួនទាំងអស់ពោលគឺ”អ្ហែងយកបានឪ អញយកបានកូន”ក្ដី ប៉ុន្ដែពេលនេះហង្សមាសមានតារាកាន់តែច្រើនគជើងគ្នា ហេតុនេះហើយផ្លូវហាក់កាន់តែចង្អៀតនិងរួមតូច ប្រសិនបើកូនព្រាប សុវត្ថិ មិនរកច្រកចេញដូចឪពុកនោះទេព្រោះមហាជនគ្រប់គ្នាបានមើលឃើញច្បាស់ថាសូម្បីតែម្ចាស់ពានទាំងឡាយនៅហង្សមាសពេលនេះក៍ស្ងាត់ដូចគ្នាដែរ ចុះទម្រាំកូនៗព្រាប សុវត្ថិ ដែលអត់ឪនៅក្បែ?ទស្សនិកជន គេសង្កេតឃើញថាកូនៗលោកសុវត្ថិ ពួកគេលែងសូវលេចធ្លោដូចមុនតាំងពីលែងច្រៀងសម្ដែងជាមួយឪពុករបស់គេម្លេះ ហេតុនេះហើយការប្រជែងទីផ្សារចម្រៀងនៅហង្សមាសក្នុងការដណ្ដើមតំណែងជាតារាជូរមុខនោះរឹតតែមិនមែនជារឿងងាយស្រួលនោះទេ ថ្វីត្បិតតែពេលនេះលោកខែម ប៊ុនថៃ បានបន្ធូរការរាំច្រៀងដោយផ្ដោតតែលើការរកស៊ីលក់ដីឡូតិ៍ក្ដី។
សូមបញ្ជាក់ថាព្រាប សុវត្ថិ បានឈជើងនៅGalaxy ជិត២ឆ្នាំតែFan របស់លោកនិយមស្ដាប់និងច្រៀងបទលោកឧកញ៉ាស្នាយ នៅហង្សមាសច្រើនជាងផលិតកម្មថ្មី។អ្នកដឹកនាំកម្មវិធីប្រគុំតន្រ្ដីនៅCTN លោកស៊ិន សិលា បានបញ្ចេញទស្សនៈកាលពីពេលថ្មីៗនេះថាតារាដែលឡើងជាឧកញ៉ាហើយ គូតែឈប់ពីសិល្បៈឲ្យដាច់តែម្ដងទៅដើម្បីកុំឲ្យមានភាពច្របូកច្របល់ ច្រៀងផងធ្វើឧកញ៉ាផង អីចឹងមិនដឹងថាឡើងអក្សរយ៉ាងម៉េចព្រោះខ្លាចខុសគោរម្យងារ។ប៉ុន្ដែលោកសុវត្ថិ មិនទាន់ចេញមុខបញ្ជាក់ថាលោកចង់បោះបង់អាជីពចម្រៀងម្ដងណាឡើយ ពោលគឺពេលនេះនៅតែឆ្លៀតចេញ១បទៗនៅGalaxy ទើបធ្វើឲ្យFan របស់លោកមានការសោកស្ដាយព្រោះថាទៅដល់ផលិតកម្មថ្មីនេះលោកសុវត្ថិ មិនទាន់បានបញ្ចេញសម្ថភាពអស់ដូចអំឡុងលោកនៅហង្សមាសឡើយ។
មហាជនរងចាំមើលថាបើសិនលោកព្រាប សុវត្ថិ បាយបាយពីអាជីពចម្រៀងក្រោយក្លាយជាឧកញ៉ានេះមែន តើកូនប្រុសរបស់លោកម្នាក់ណានឹងអាចឡើងស្នងតំណែងជំនួសឪពុកបាន?