ភ្នំពេញ៖តារាចម្រៀងរូបសម្រស់សោភាកញ្ញាជុំ រចនាពេជ្រ ហៅបេប៊ី ដែលបាត់មុខពីឆាកតន្រ្ដីតាំងពីផ្ទុះកូវីដនោះ ពេលនេះលេចមុខគ្រងឈុតកូនក្រមុំយ៉ាងស្រស់ស្អាតទើបធ្វើឲ្យមានការសង្ស័យថាអ្នកចម្រៀងថោន រូបនេះកំពុងតែត្រៀមធ្វើជាកូនក្រមុំមែនទែនហើយមើលទៅបានជាស្ងាត់ៗចេញគ្រងឈុតអាពាហ៍ពិពាហ៍បែបនេះ។ប៉ុន្ដែក្នុងជំនួបតាមទូរស័ព្ទអ្នកស្រីប៊ុន ណារី ម្ដាយបេប៊ី បានអះអាងកាលពីថ្ងៃទី២០សីហា ថាកូនស្រីសំណព្វចិត្តរបស់គាត់ថតសម្អាងការឲ្យគេទើបបានជាត្រូវតែងខ្លួនជាកូនក្រមុំបែបនេះ។
ម្ដាយបេប៊ី ប្រាប់ថាទោះជាកូនស្រីផ្អាកសកម្មភាពសិល្បៈជាច្រើនខែក្ដីតែនាងនៅតែទទួលថតស្ពតជាធម្មតាឲ្យតែមានគេទាក់ទង។ប៉ុន្ដែចំពោះការឡើងឆាកវិញអ្នកស្រីណារី ថាមិនទាន់កំណត់ពេលវេលាច្បាស់លាស់នោះទេ ព្រោះថាពេលនេះបេប៊ី កំពុងតែរៀបចំបើកសាខាថ្មីហាងកាហ្វេមួយទៀត ខណៈដែលបច្ចុប្បន្នរចនាពេជ្រ មានហាងកាហ្វេដល់ទៅ៤ផ្សេងគ្នាទៅហើយកំពុងតំណើរការ។អ្នកស្រីណារី ក៍បានប្រាប់ពីមូលហេតុដែលបេប៊ី បានពន្យាពេលឡើងច្រៀងសម្ដែងជាច្រើនខែមកហើយនោះថាក្រៅពីមមាញឹករឿងលក់ដូរនៅហាងកាហ្វេ ពេលនេះកូនស្រីក៍ឡើងគីឡូជ្រុលបន្ដិចដែរហើយមូលហេតុនៃការឡើងទម្ងន់នោះគឺដោយសារតែនាងញាំអាហារពេលយប់ និងផឹកភេជ្ជៈនៅហាងជាប្រចាំព្រោះចូលចិត្តភ្លក្សរសជាតិអីចឹង១ថ្ងៃភ្លក្សតែ៤កែវក៍ត្រូវតែឡើងគីឡូស្រឺតៗដែរ។យ៉ាងណាអ្នកស្រីណារី ថាក្រោយបេប៊ី ថតសម្អាងការនោះមានFan របស់នាងខ្លះថារចនាពេជ្រ ធាត់បន្ដិចអីចឹងគឺស្អាតប្លែកជាង មុន តែសាមីខ្លួននឹងព្យាយាមសម្រកឲ្យបានថយគីឡូជាងនេះបន្ដិចទើបឡើងឆាកវិញ។
គូរបញ្ជាក់ថាបេប៊ី បានផ្អាកអាជីពសម្ដែងនិងធ្វើMC នៅCTN ក្រោយនាងបានក្លាយទៅជាតារាចម្រៀងថោន ដែលបទចម្រៀងរបស់នាងបានចេញបុកមួយប្រាវជាមួយក្បាច់រាំប្លែកៗទើបធ្វើឲ្យនាងស្ថិតក្នុងនាមជាតារាជូរមុខផ្នែកយុវវ័យរបស់ផលិតកម្មមួយនេះ។ប៉ុន្ដែតាំងពីផ្ទុះកូវីដ បេប៊ី បានងាកទៅធ្វើមុខជំនួញផ្ទាល់ខ្លួនដោយគ្រប់គ្រងហាងកាហ្វេដល់ទៅ៤ទីតាំងផ្សេងគ្នាទើបធ្វើឲ្យនាងពិបាករើរខ្លួនវិលមករកអាជីពចាស់។បេប៊ី ធ្លាប់ប្រាប់អ្នកយកព័តមានយើងថាអំឡុងពេលដែលនាងបាត់ខ្លួនពីការរាំច្រៀងយូខែបែបនេះនាងគិតថាមានតែវិលមកវិញត្រូវតែមានអ្វីដែលថ្មីបំផុតទេ ទើបអាចស្ដារមុខមាត់ឡើងវិញបាន។ដោយឡែកទាក់ទងរឿងអ្នកខ្លះសង្ស័យថាបេប៊ី ត្រូវគូស្នេហ៍លែងឲ្យលេងសិល្បៈនោះនាងថានោះជារឿងមិនពិតព្រោះពេលនេះនាងមិនទាន់មានម្ចាស់ចិត្តហើយក៍គ្មានរងសម្ពាធពីអ្នកណាម្នាក់ដែរ៕
