សុគន្ធ និសា បានប្រាប់”នគរធំ”កាលពីថ្ងៃទី២៦សីហា ថាពេលនេះនាងនិងស្វាមីចាប់ផ្ដើមគិតគូរឿងកូនសារជាថ្មីនៅឆ្នាំ២០២២ នេះហើយតែលទ្ធផលយ៉ាងណានោះគឺមិនទាន់ដឹង។និសា វាចាថា”ខ្ញុំនិងស្វាមីចង់បានកូននៅឆ្នាំហ្នឹង។ប៉ុន្ដែដោយសារតែខ្ញុំនិងគាត់មានអាយុច្រើនដែរហើយអីចឹងមិនដឹងថាអាចយកបានតាមធម្មជាតិ ឬយ៉ាងណានោះទេ ។ក្នុងករណីដែលមិនអាចមានកូនបានគឺមានតែទៅពិគ្រោះជាមួយក្រុមគ្រូពេទ្យជំនាញ”។
ក្រៅពីតាំងចិត្តថានឹងយកកូនទី១មុនដំណាច់ឆ្នាំ២០២២ នេះសុគន្ធ និសា ក៍ប្រាប់ពីមូលហេតុដែលនាងរៀបការជាង៤ឆ្នាំតែអត់កូននោះដែរថាមកពីនាងនិងស្វាមីបានឯកភាពគ្នាថាមិនទាន់ចង់បានកូនទើបពន្យាពេលរហូតមកដល់ពេលនេះ។នាងថារឿងដែលសំខាន់ក្នុងការអត់ទាន់បានកូននោះគឺមកពីនាងជាប់មមាញឹការងារសិល្បៈច្រើន ហេតុនេះហើយមិនទាន់អាចដកឃ្លាបាន។ប៉ុន្ដែសម្រាប់ឆ្នាំ២០២២ នេះក៍នៅតែមានភាពរវល់ដដែលគ្រាន់តែថានាងនិងស្វាមីបានព្រមព្រៀងគ្នាយកកូននៅឆ្នាំហ្នឹង តែបានឬមិនបានអត់ទាន់ដឹង។
គូររំលឹកថាសុគន្ធ និសា ក៍ធ្លាប់ប្រាប់អ្នកយកព័តមានយើងកាលពីឆ្នាំ២០២១ ថានាងត្រូវយកកូននៅឆ្នាំនោះដែរ តែចៃដន្យអីនៅដើមខែមីនាឆ្នាំ២០២១ នាងកើតកូវីដធ្វើឲ្យខូចផែនការណ៍ពពោះកូនទី១។សម្រាប់ឆ្នាំនេះវិញនិសា ក៍បានវិលមកចាប់តំណែងជាគ្រូបង្វឹកThe Voice Kids Cambodia រដូវកាលទី៣ ដែលធ្វើឲ្យនាងមានការមមាញឹកច្រើនថែមទៀត ប៉ុន្ដែនាងនៅតែមានគម្រោងយកកូនដដែល។និសា ក៍បានបំភ្លឺដែរថាការមិនទាន់យកកូនរបស់នាងអស់ជិត៥ឆ្នាំកន្លងមកនេះមិនមែននាងចង់ផ្ដល់កំណើតឲ្យកូនទី១នៅលើទឹកដីអាមេរិកតាមរយៈការកើតភ្លាមបានសញ្ជាតិអាមេរិកកាំងភ្លែតនោះទេ តែរឿងមកពីនាងរវល់ពេកដកឃ្លាមិនបាន។ ដោយឡែកសម្រាប់ការចេញមុខមកវិញក្នុងការធ្វើជាCoach កម្មវិធីThe Voice Kids Cambodia រដូវកាលទី៣នោះនិសា ថានាងបានត្រៀមចិត្តកាយរួចជាស្រេចទៅហើយ ប្រសិនបើមានការិះគន់មួយណាមកលើកំហុសដោយអចេតនាណា១មកលើនាងនោះ តែនាងថារាល់គ្រូបង្វឹកនីមួយៗមានគោលការណ៍ខុសៗគ្នាហេតុនេះហើយការជ្រើសយកកូនក្រុមក៍មិនដូចគ្នាដែរ។
សុគន្ធ និសា បានរៀបការកាលពីថ្ងៃ១ខែធ្នូឆ្នាំ២០១៧ ជាមួយអាណិកជនខ្មែរមកពីរដ្ឋBoston សហរដ្ឋអាមេរិក ហើយនាងថានាពេលអនាគតប្រសិនបើនាងមានកូនអាចឲ្យកូនទៅរៀននៅទីនោះ តែរូបនាងនៅតែចេញចូលជាធម្មតា មិនទាន់មានគម្រោងទៅរស់នៅស្រុកគេនោះទេព្រោះចិត្តនៅតែស្រលាញ់សិល្បៈ។នាងថាគិតមកដល់ឆ្នាំ២០២២ នេះនាងមានអាជីវកម្មផ្ទាល់ខ្លួនក្រៅពីសល្បៈដូចជាលក់សម្លៀកបំពាក់តាមOnline និងNisa Store ជាដើម។ដោយឡែកសម្រាប់អាជីពចម្រៀងវិញនិសា ថាទោះជាខែនេះជារដូវធ្លាក់ភ្លៀងមែនតែការងារសិល្បៈនាងនៅតែរវល់ ខណៈដែលពីមុននាងបានច្រៀងបទមរតកដើមជាមួយលោកព្រាប សុវត្ថិ ជាច្រើនបទតែក្រោយពីលោកសុវត្ថិ ចាកចេញពីហង្សមាសនោះពេលនេះនាងច្រៀងជាមួយតារាផ្សេងៗទៀតតាមផលិតកម្មតម្រូវ ព្រោះនាងជាតារាមិនប្រកាន់ដៃគូឡើយ។
មហាជនរងចាំមើលថានៅឆ្នាំ២០២២ នេះអ្នកនាងប៊ុន សុគន្ធា ហៅសុគន្ធ និសា អាចសម្រេចបំណងធំតាមរយៈការពពោះកូនទី១បានដូចក្ដីប្រាថ្នាដែរឬទេ?