ភ្នំពេញ៖អ្នកមេម៉ាយកូន១នាងពេជ្រ សូលីកា នៅតែបង្ហាញភាពរីករាយតាមរយៈការជិះរថយន្ដថ្លៃៗ ហើយលេងខ្លួនកាន់តែឆើតឆាយ ហាក់ដូចជាគ្មានទុក្ខព្រួយទាល់តែសោះ។ប៉ុន្ដែនៅក្រោយខ្នងវិញអាចខុសពីរូបភាពពីមុខកាមេរ៉ាព្រោះស្រីពេជ្រ ហៅសូលីកា នៅតែមានពេលខ្លះនាងបង្ហូរទឹកនេត្រាតែម្នាក់ឯងដោយតូចចិត្តរឿងធ្លាក់ខ្លួនមេម៉ាយលឿនមិនគូរឲ្យជឿរផង និងម្ដាយជាទីស្រលាញ់របស់នាងអ្នកស្រីស៊ិន ស្រីនាង ជាប់ពន្ធនាគាររយៈពេល១២ឆ្នាំផង។យ៉ាងណានាងធ្លាប់តាំងចិត្តថាត្រូវតែរឹងមាំ ព្រោះខ្លួន១ ត្រូវចិញ្ចឹមកូនផង ប្អូនផង ហេតុនេះសូមឲ្យអ្នករិះគន់នាងគូរតែយល់។
ទោះជាជីវិតពេជ្រ សូលីកា ជួបរឿងរីករាយផងទុក្ខសោកផងព្រមគ្នាក្ដី ប៉ុន្ដែនាងនៅតែមានហាងឆេងសិល្បៈតាមរយៈការចេញច្រៀងសម្ដែងសកម្មជាងមុននារយៈពេលចុងក្រោយនេះហើយបេះដូងនាងក៍មិនទុកឲ្យនៅទំនេរដែរ ព្រោះកាលពីចុងខែធ្នូឆ្នាំ២០២២ មេម៉ាយកូន១ស្រួយដូចដូងដុតរូបនេះបានភ្ជាប់ស្នេហ៍ថ្មីទៀតហើយ ដែលបុរសនោះជាកូនចៅកាត់ចិន មិនមែនជាតារាចម្រៀងថុល សុភិទិ ដូចគេសង្ស័យនោះទេ។រូបភាពមួយចំនួនដែលបង្ហាញថាសូលីកា រកបានបុរសស្អំរបួសបេះដូងនោះគឺស្របគ្នាទៅនិងដៃគូរបស់នាងលោកភិទិ កាន់តែបង្ហាញរូបភាពផ្អែមល្ហែមស្នេហ៍ជាមួយអ្នកមេម៉ាយណារីន ដែលផ្ទុយពីការសន្និដ្ឋានពីមុនពីអ្នកជិតស្និតតារាទាំងពីរថាស្រីពេជ្រ នឹងប្រគល់បេះដូងទៅឲ្យកូនលោកផ្កាយ២នោះតាមពិតនាងក៍មានជម្រើសស្នេហ៍ផ្សេងដែរនោះគឺជាបុរសអ្នកមានទ្រព្យស្ដុកម្នាក់។
តែរហូតមកដល់ពេលនេះសូលីកា នៅមិនទាន់ហ៊ានបង្ហាញភាពផ្អែមល្ហែមស្នេហ៍ជាសាធារណៈជាមួយបុរសវ័យខ្ទង់៣០ស្ដើងនោះទេ ដែលទំនងអាចពួកគេស្ថិតក្នុងតំណាក់កាលស្វែងយល់ចិត្តគ្នានៅឡើយ ហើយមិនទាន់ឈានដល់តំណាក់កាលច្បាស់លាស់ជាមួយគ្នា១០០% ទេ។Fan ខ្លះរបស់សូលីកា ថាអ្នកមេម៉ាយវ័យក្មេងរូបនេះអាចនឹងប្រឈម”ត្រីរ៉ស់ក៍រួច ទន្សាយក៍រួច “ដោយសម្អាងថានាងបានងាកចេញពីស្នេហ៍ភិទិ ហើយទៅពិសោធ៍ស្នេហ៍បុរសកូនចៅកាត់ចិននោះទើបកូនលោកផ្កាយ២ ត្រូវគេឆក់បាត់។តែកន្លងមកសូលីកា ធ្លាប់ចេញមុខបញ្ជាក់ហើយថាទំនាក់ទំនងរវាងរូបនាងនិងភិទិ គ្រាន់តែធម្មតាប៉ុណ្ណោះ ព្រោះនាងជាFan តារាចម្រៀងរូបនេះ។ប៉ុន្ដែការអះអាងរបស់នាងនាពេលនោះគ្មានអ្នកណាជឿរជាក់ឡើយ ទើបតែពេលនេះពួកគេបង្ហាញអ្នកថ្មីរៀងៗខ្លួនទើបធ្វើឲ្យម្នាក់ៗភ្លឺភ្នែក។
គូរកត់សម្គាល់ថាពេជ្រ សូលីកា ជាអ្នកមេម៉ាយដ៍មានមន្ដស្នេហ៍មិនធម្មតាម្នាក់ ក្រោយនាងបានចែកផ្លូវអតីតគូដណ្ដឹងលោកគឹម ហាន កាលពីខែសីហា ឆ្នាំ២០២២ បន្សល់ចំណងដៃកូនប្រុស១អាយុជាង២ឆ្នាំ ហើយគ្រាន់តែដឹងថាសូលីកា ផ្ដាច់ស្នេហ៍ចាស់ភ្លាម មន្រ្ដីធំៗមួយចំនួន រួមទាំងអាណិកជនក្រៅស្រុកខ្លះផងរងចាំត្រងស្នេហានាងតែស្រីពេជ្រ ហាក់មិនចាប់អារម្មណ៍ប្រុសវ័យចំណាស់ដែលចង់ប្រគល់តំណែងជំទាវឲ្យនាងឡើយដោយសុខចិត្តនៅបន្ដរកលុយតាមរយៈការចេញច្រៀងសម្ដែងនៅឆាកតន្រ្ដីទាំងឡាយជាជាងជ្រើសផ្លូវធ្វើជំទាវលាក់មុខដូចមុន។ដោយឡែកសម្រាប់ហង្សមាសវិញនៅតែជឿរជាក់លើនាងនិងផ្ដល់បទថ្មីៗឲ្យច្រៀង រួមទាំងតំណែងតួឯកក្នុងភាពយន្ដជាបន្ដបន្ទាប់ផងដែរ។
ទស្សនិកជនរងចាំមើលថាតើចំណងស្នេហាថ្មីរបស់ពេជ្រ សូលីកា នឹងឈានទៅស្វែងយល់ចិត្តគ្នាបានច្បាស់លាស់ហើយនាងអាចនឹងភ្ជាប់ពាក្យជាលើកទី២ ឬយ៉ាងណា?ដោយឡែកសម្រាប់ទំនាក់ទំនងរបស់ស្រីពេជ្រ និងលោកភិទិ គេជឿរថាប្រាកដជាមិនអាចក្លាយទៅជាគូស្នេហាបានឡើយ បន្ទាប់ពីភាគីទាំងពីរបញ្ចេញដៃគូថ្មីរៀងៗខ្លួនបែបនេះ៕