យោងតាមប្រភពពីសារព័ត៌មានរ៉យទ័រចេញផ្សាយ កាលពីថ្ងៃពុធទី ១ខែមីនា ឆ្នាំ២០២៣បានឲ្យដឹងថាគណៈកម្មាធិការកណ្តាលគណបក្សបានយល់ព្រមលើការតែងតាំងប្រធានាធិបតីថ្មីតែមិនបានបញ្ចេញឈ្មោះបេក្ខជននោះទេ។
ទោះជាយ៉ាងណាក្តីយោងតាមប្រភព២របស់បក្សកុម្មុយនីស្តវៀតណាមបានឲ្យដឹងថាបក្សសម្រចតែងតាំងលោក Vo Van Thuong ជាប្រធានាធិបតីថ្មីរបស់ប្រទេសនេះបន្ទាប់ពីមានការបង្ខំឱ្យលាលែងពីតំណែងភ្លាមៗកាលពីខែមករានៃអ្នកកាន់តំណែងមុនគឺលោកt Nguyen Xuan Phuc ដែលជាផ្នែកមួយនៃយុទ្ធនាការប្រឆាំងអំពើពុករលួយដ៏ខ្លាំងក្លាមួយ។បច្ចុប្បន្នលោកស្រីVo Thi Anh Xuan ដើរតួជាប្រធានាធិបតីស្តីទីឬចាំផ្ទះ។
លោកThuong ដែលមានអាយុ ៥២ ឆ្នាំគឺជាសមាជិកវ័យក្មេងបំផុតនៃការិយាល័យនយោបាយរបស់បក្ស ដែលជាស្ថាប័នធ្វើការសម្រេចចិត្តកំពូលរបស់ប្រទេស ហើយត្រូវបានគេចាត់ទុកថាមានភាពស្និទ្ធស្នាលជាមួយអគ្គលេខាធិកាគឺលោក Nguyen Phu Trong ដែលជាឥស្សរជនដ៏មានឥទ្ធិពលបំផុតរបស់ប្រទេសវៀតណាម។
លោក Trong គឺជាស្ថាបត្យករសំខាន់របស់បក្សក្នុងការបង្រ្កាប លើអំពើពុករលួយ ដែលមន្ត្រីរាប់រយនាក់ត្រូវបានស៊ើបអង្កេត និងជាច្រើនត្រូវបានបង្ខំឱ្យលាឈប់ រួមទាំងអតីតប្រធានាធិបតី Nguyen Xuan Phuc និងឧបនាយករដ្ឋមន្ត្រីពីររូបផងដែរ។
ការជ្រើសរើសលោក Thuong ដោយគណៈកម្មាធិការមជ្ឈិមបក្សរក្សាការសម្រេចមុនរបស់ការិយាល័យនយោបាយ។ ការតែងតាំងរបស់លោកនឹងត្រូវការការអនុម័តពីរដ្ឋសភាដែលនឹងត្រូវបើកសម័យប្រជុំវិសាមញ្ញនៅថ្ងៃព្រហស្បតិ៍ និងការចួលអង្គុយកៅអីប្រធានាធិនតីជាផ្លូវការនៅខែឧសភា។
គួររំឭកថាប្រព័ន្ធគ្រប់គ្រងនៅក្នុងប្រទេសវៀតណាម ប្រធានាធិបតីមានតួនាទីជាប្រមុខរដ្ឋ មិនមែនប្រមុខរដ្ឋាភិបាលនោះឡើយ។ តំណែងនេះគឺជាតំណែងនយោបាយកំពូលៗទាំង៤ ខណៈមុខតំណែង៣ទៀតគឺ អគ្គលេខាធិការបក្សកុម្មុយនិស្ត នាយករដ្ឋមន្រ្តី និងប្រធានសភា៕