ភ្នំពេញ៖មាស សុខសោភា បានថ្លែងប្រាប់អ្នកសារព័តមានកាលពីពេលថ្មីៗនេះថាចាប់ពីពេលនេះតទៅនាងមិនមែនជាតារាចម្រៀងរបស់រាម ទៀតទេ។ការសម្រេចចិត្តរបស់សុខសោភា បែបនេះក្រោយពីកុងត្រាឆ្នាំទី២របស់នាងជាមួយរាម បានផុតកំណត់នៅខែកុម្ភៈឆ្នាំ២០២៣ ហើយមានព័តមានថារាម បានប្រើមធ្យោបាយគ្រប់បែបយ៉ាងទាំងអស់ដើម្បីឲ្យនាងរួមរស់ជាមួយផលិតកម្មនេះតទៅទៀត ប៉ុន្ដែលទ្ធផលចុងក្រោយគឺបរាជ័យ ព្រោះសោភា នៅតែតាំងចិត្តថាមិនបន្ដកុងត្រាថ្មី។
មាស សុខសោភា បានប្រាប់អ្នកកាសែតថាការចេញពីរាម គឺមិនមែននាងមានបញ្ហាជាមួយផលិតកម្មមួយនេះទេ តែមកពីរាម ផ្ដោតលើការផលិតភាពយន្ដ ច្រើនជាងចម្រៀង ហើយនាងមិនសូវមានពេល។សោភា ថានាងមានអារម្មណ៍ថាហត់ ហេតុនេះចង់ដកឃ្លាធ្វើអ្វីថ្មីៗដោយខ្លួនឯងវិញ។សុខសោភា បន្ថែមថានៅឆ្នាំ២០២៣ នេះនាងនឹងមិនទៅច្រៀងនៅផលិតកម្មណានោះទេ ព្រោះមិនទាន់សម្លឹងឃើញផលិតកម្មផ្សេងឡើយ ទោះជាមានផលិតកម្មធំៗខ្លះបានចាប់អារម្មណ៍ចង់បាននាងក្ដី តែចិត្តនាងចង់ផ្ដោតលើការធ្វើជំនួញឲ្យរឹងមាំជាងនេះ ។សោភា ថាក្រោយលែងជាតារារាម នេះនាងត្រៀមចេញAlbum ផ្ទាល់ខ្លួននៅផលិតកម្មដែលដឹកនាំដោយស្វាមីនាងលោកអ៊ឹត រ៉ាដា គឺCamtrax ។
អ្នកយកព័តមានយើងបានទាក់ទងទៅបុគ្គលិកម្នាក់ដែលឡើងលេខទូរស័ព្ទនៅលើផេករាម តែត្រូវបានអ្នកលើកទូរស័ព្ទជានារីបានអះអាងថាជុំវិញរឿងរ៉ាវមាស សុខសោភា នោះនាងមិនអាចនិយាយបានទេ គឺទាល់តែសុំយោបល់ពីថ្នាក់លើរបស់រាម ជាមុនសិន។
យ៉ាងណាអ្នកជំនាញសិល្បៈបានលើកឡើងថាការទៅដល់រាម របស់មាស សុខសោភា រយៈពេល២ឆ្នាំគត់ និងចាកចេញនៅឆ្នាំ២០២៣ នេះមានកត្តាសំខាន់៤យ៉ាងដែលនាងបានជួបប្រទះគឺ៖
១៖មាស សុខសោភា ៖ចុះកុងត្រាម្ដងតែ១ឆ្នាំ
ការចុះកុងត្រារបស់មាស សុខសោភា នៅរាម ធ្វើម្ដងៗតែរយៈពេល១ឆ្នាំប៉ុណ្ណោះ ពោលគឺពីខែកុម្ភៈឆ្នាំ២០២១ -កុម្ភៈឆ្នាំ២០២៣ បានធ្វើ២ដងនោះមានន័យថាសោភា នោះជាការសាកល្បង និងមើលទៅលើស្ថានការណ៍ពោលគឺបើអាជីពចម្រៀងរបស់នាងនៅទ្រឹងមិនទៅមុខ នោះនាងអាចនឹងពិចារណាចាកចេញទៅផលិតកម្មថ្មី មិនចុះកុងត្រាបន្ដទៀត ខណៈដែលតារាផ្សេងៗទៀតចូលផលិតកម្ម១ច្រើនតែមានកុងត្រារយៈពេល៥ឆ្នាំម្ដង។
២៖ផែនការណ៍ឆ្នាំ២០២២ ត្រូវបានជាប់គាំង
កាលពីខែមករាឆ្នាំ២០២២ មាស សុខសោភា ធ្លាប់ប្រកាសថានឹងធ្វើឲ្យទីផ្សារចម្រៀងរបស់នាងប្លែកជាងពេលណាៗទាំងអស់ក្នុងអាជីព ព្រោះនាងនឹងបញ្ចេញរបស់អ្វីដែលថ្មីបំផុតមិនធ្លាប់មានពីមុនឡើយ។ប៉ុន្ដែគម្រោងការណ៍នេះបែជានៅជាប់ទ្រឹងមិនអាចចេញជារូបរាងទៅវិញ ហើយទីបំផុតសោភា នៅតែមិនអាចធ្វើឲ្យទីផ្សារចម្រៀងផ្ទុះបានទេ។
៣៖ចេញពីរាម ដើម្បីដំណើរការCamtrax ឡើងវិញ
មាស សុខសោភា បានផ្អាកផលិតកម្មផ្ទាល់ខ្លួនCamtrax Music ដែលគ្រប់គ្រងដោយស្វាមីនាងលោកអ៊ឹត រ៉ាដា និងបងប្រុសនាងលោកមាស សុខរតនៈ អស់រយៈពេល២ឆ្នាំមកហើយ ដើម្បីផ្ដោតតែលើការពង្រឹងចម្រៀងនៅរាម តែជាលទ្ធផលនាងមិនសូវមានបទល្បីៗខ្លាំងដូចមុននោះទេ ទើបធ្វើឲ្យសោភា ខកចិត្តខ្លះៗ នឹងចាប់ផ្ដើមធ្វើបទចម្រៀងដោយខ្លួនឯងទៅតាមចិត្តចង់បានវិញ។
៤៖ផលិតកម្ម៣ ចាំស្វាគមន៍សុខសោភា
ក្រោយមាស សុខសោភា លែងជាតារារាម នេះមានព័តមានថានាងត្រូវបានផលិតកម្ម៣ដាក់គោលដៅចង់បាននាងធ្វើជាសមាជិករបស់ខ្លួននោះគឺថោន ,ហង្សមាស និងGalaxy ហើយអ្នកជំនាញសិល្បៈបានមើលឃើញថាក្នុងចំណោមផលិតកម្មខាងលើនេះមានតែផលិតកម្ម១ប៉ុណ្ណោះដែលធ្វើឲ្យតារាស្រីលំដាប់ជូរមុខទាំងអស់មានការបារម្ភនោះគឺGalaxy ព្រោះថាបើសោភា ទៅចូលរួមជាមួយផលិតកម្មថ្មីចាយលុយធំនេះហើយនាងចាប់ដៃជាមួយលោកព្រាប សុវត្ថិ នោះប្រាកដណាស់ថាគ្មានតារាស្រីរូបណាអាចទប់ទល់ឬមានដៃគូសាកសមបំផុតដូចនាងឡើយ។ មហាជនរងចាំមើលថាក្រោយមាស សុខសោភា ចេញពីរាម ធ្វើបទចម្រៀងដោយខ្លួនឯងនាងល្បីថែមទៀតឬយ៉ាងណា?
