ក្រុងទីក្រុងគៀវបាននិយាយថា ខ្លួនកំពុងបញ្ឈប់ការវាយប្រហារពីកងកម្លាំងរុស្ស៊ីដែលនៅតែព្យាយាមឡោមព័ទ្ធទីក្រុង Bakhmut ភាគខាងកើតអ៊ុយក្រែនដែលជិតត្រូវបានបំផ្លាញដោយទីក្រុងម៉ូស្គូដែលបានព្យាយាមដណ្តើមយកអស់រយៈពេលជាច្រើនខែ។
អ៊ុយក្រែនបានសន្យាការពារទីក្រុងBakhmutប៉ុន្តែបានប្រឈមមុខនឹងកងទ័ពរុស្ស៊ីដែលបានប្តេជ្ញាចិត្តដណ្តើមយកទីក្រុងដែលបានក្លាយជារង្វាន់នយោបាយ ធ្វើអោយសមរភូមិអូសបន្លាយ។
យោធាអ៊ុយក្រែនបានបាននិយាយថា ការវាយប្រហាររបស់សត្រូវច្រើនជាង ១៣០ដងត្រូវបានវាយបកត្រឡប់ទៅវិញក្នុងរយៈពេលមួយថ្ងៃកន្លងមក រួមទាំងនៅតំបន់ Kupiansk, Lyman, Bakhmut និង Avdiivka ផងដែរ។
ទាហានស៊ីឈ្នួលរុស្ស៊ី៖ខ្សែត្រៀមជួរមុខនឹងដួលរលំបើទីក្រុងម៉ូស្គូមិនផ្តល់អាវុធឲ្យ
ប្រធានក្រុមទាហានស៊ីឈ្នួលឯកជនបានព្រមានថា ទីតាំងយោធារុស្ស៊ីនៅជុំវិញទីក្រុង Bakhmut ភាគខាងកើតអ៊ុយក្រែនកំពុងស្ថិតក្នុងគ្រោះថ្នាក់ ប្រសិនបើទាហានស៊ីឈ្នួលមកពីក្រុម Wagner Group មិនទទួលបានគ្រាប់រំសេវជាបន្ទាន់។
លោក Yevgeny Prigozhin បាននិយាយថា ទាហានជួរមុខរបស់រុស្ស៊ី នៅជិត Bakhmut អាចដួលរលំ ប្រសិនបើកងកម្លាំងរបស់លោក មិនទទួលបានគ្រាប់ផ្លោង និងកាំភ្លើងធំ ដែលបានសន្យាដោយទីក្រុងម៉ូស្គូ កាលពីចុងខែកុម្ភៈដែលជាសញ្ញាចុងក្រោយនៃភាពតានតឹងរវាងវិមានក្រឹមឡាំង និងប្រធានកងជីវពល។
លោក Prigozhin ដែលសំដៅទៅលើអវត្តមាននៃគ្រាប់រំសេវ បាននិយាយនៅលើបណ្តាញសារព័ត៌មាន Telegram របស់គាត់កាលពីថ្ងៃអាទិត្យថា សម្រាប់ពេលនេះ យើងកំពុងព្យាយាមរកមូលហេតុតើវាគ្រាន់តែជាការិយាធិបតេយ្យធម្មតា ឬជាការក្បត់។លោកPrigozhin តែងតែរិះគន់ប្រមុខការពារជាតិរុស្ស៊ីនិងឧត្តមសេនីយ៍កំពូលៗ។ កាលពីខែមុនលោកបានចោទប្រកាន់រដ្ឋមន្ត្រីក្រសួងការពារជាតិលោក Sergey Shoigu និងអ្នកផ្សេងទៀតពីបទ ក្បត់ជាតិចំពោះការដកហូតអាវុធដល់ក្រុមរបស់គាត់។លោកPrigozhin បាននិយាយថាប្រសិនបើ Wagner ដកថយពី Bakhmut ឥឡូវនេះ ផ្នែកខាងមុខទាំងមូលនឹងដួលរលំ ។
ទីក្រុងគៀវប្រើប្រាស់ទ្រព្យសម្បត្តិរុស្ស៊ី កសាងប្រទេស
នាយករដ្ឋមន្ត្រីអ៊ុយក្រែនលោក Denys Shmyhal បាននិយាយនៅក្នុងសន្និសីទមួយនៅទីក្រុង Lviv កាលពីថ្ងៃសៅរ៍ថាប្រទេសអ៊ុយក្រែនគ្រោងនឹងប្រើប្រាស់ទ្រព្យសម្បត្តិជាង ៤៦០លានដុល្លារដែលរឹបអូសពីធនាគាររុស្ស៊ី ដើម្បីកសាងប្រទេសឡើងវិញនិងផ្តល់សំណងដល់ប្រជាជនអ៊ុយក្រែន។
នាយករដ្ឋមន្ត្រីក៏បាននិយាយដែរថាអ៊ុយក្រែនកំពុងប្រើប្រាស់ជំនួយរាប់ពាន់លានដុល្លារពីសហរដ្ឋអាមេរិក និងសហភាពអឺរ៉ុប ដើម្បីស្ដារឡើងវិញយ៉ាងឆាប់រហ័សនូវហេដ្ឋារចនាសម្ព័ន្ធថាមពលដែលខូចរបស់ប្រទេស៕