ភ្នំពេញ៖នៅឆ្នាំ២០២៣ នេះតារាស្រីលំដាប់ជូរមុខទាំងឡាយមានដូចជាមាស សុខសោភា,ពេជ្រ សោភា ,សុគន្ធ និសា និងសួស វីសា ជាដើមនៅតែមិនទាន់អាចរកដៃគូដ៍សាកសមបំផុតនោះទេ ព្រោះអ្នកចម្រៀងស្រីខ្លះអាយុច្រើនឆ្នាំពេកជាងអ្នកចម្រៀងប្រុសពិបាកចាប់ដៃគ្នា ដែលខុសពីតារាប្រុសទោះជាមានវ័យច្រើនបន្ដិចតែងាយស្រួលចាប់ដៃតួស្រីក្មេងជាងខ្លួន។ប៉ុន្ដែអំឡុងពេលតារាស្រីល្បីៗបាត់បង់ដៃគូស្ទើតែអស់នោះ នាងតន់ ច័ន្ទសីម៉ា បែជាគ្រប់ទឹកនៅឆ្នាំ២០២៣ នេះទៅវិញព្រោះនាងត្រូវថៅកែផលិតកម្មទុកចិត្តផ្ដល់ឱកាសឲ្យនាងច្រៀងសម្ដែងជាមួយតារាប្រុសលំដាប់ជូរមុខដល់ទៅ៣ដួងក្នុងពេលតែមួយនោះគឺលោកព្រាប សុវត្ថិ ,ខេមរៈ សិរីមន្ដ និងលោកប៉ុន សុណារិន ហៅខេម ។
ការមានដៃគូដល់ទៅ៣នាក់នៅអមខ្លួនបែបនេះមានន័យថានាងតន់ ច័ន្ទសីម៉ា អាចនឹងធ្វើឲ្យដៃគូប្រជែងរបស់ខ្លួនមិនអាចទប់នាងជាប់ឡើយប្រសិនបើGalaxy ធ្វើបទឲ្យនាងត្រូវ បើទោះជាគេសង្កេតឃើញថាទាំងលោកព្រាប សុវត្ថិ និងខែម ប៊ុនថៃ តាំងពីឡើងជាឧកញ៉ាដូចគ្នាមកបទចម្រៀងមានការប្រែប្រួលពេលខ្លះមិនសូវមានការគាំទ្រខ្លាំងដូចមុនក្ដី។ ចំពោះនាងច័ន្ទសីម៉ា វិញនៅចុងឆ្នាំ២០២២ នាងក៍ហាក់ស្ងប់ស្ងាត់ជាងមុនបន្ដិចដែរ បើប្រៀបធៀបពីមុន ហេតុនេះគេចាំមើលថាការមកដល់របស់លោកប៊ុនថៃ នាងនឹងទទួលបានជំនួយប៉ុនណានៅពេលដែលពួកគេចាប់ដៃគ្នានោះ។
គូរបញ្ជាក់ថាក្រៅពីនាងតន់ ច័ន្ទសីម៉ា តារាស្រីម្នាក់ទៀតរបស់Galaxy គឺនាងហ៊ិន លីដា ដែលមានសម្ថភាពមិនក្រោមនាងនោះនៅមិនទាន់មានឱកាសក្នុងការច្រៀងសម្ដែងជាមួយតារាប្រុសទាំង៣ដួងខាងលើនេះទេ ហេតុនេះហើយបានជាមជ្ឈដ្ឋានមហាជនមើលឃើញថានៅឆ្នាំ២០២៣ នេះគ្មានអ្នកចម្រៀងស្រីរូបណាម្នាក់ដែលមានដៃគូខ្លាំងជាងនាងសីម៉ា ឡើយ។អ្វីដែលគូរឲ្យកត់សម្គាល់នោះស្រីស្រស់ច័ន្ទសីម៉ា ថែមទាំងមានឱកាសច្រៀងបទថ្នាក់ជាតិរៀបរាប់ពីព្រឹត្តិការណ៍ស៊ីហ្គេមលើកស្ទួយពីកម្ពុជាធ្វើជាម្ចាស់ផ្ទះជាមួយលោកព្រាប សុវត្ថិ+ខែម ប៊ុនថៃ + ខេម និង+ ទាំងឱក សុគន្ធកញ្ញា ទៀតផង ខណៈដែលអ្នកចម្រៀងល្បីល្បាញជាច្រើនឆ្នាំមកហើយខ្លះបែជាឆក់ឱកាសនោះមិនបានដូចនាងទៅវិញ។តាមរយៈការចាប់ដៃជាមួយតារាល្បីៗខាងលើនេះច្បាស់ណាស់ថានាងច័ន្ទសីម៉ា មិនត្រឹមតែថៅកែទេដែលពេញចិត្តនាងខ្លាំង តែមជ្ឈដ្ឋានខាងក្រៅក៍ទទួលស្គាល់នូវសម្ថភាពនាងដែរ បើទោះជាទស្សនិកជនភាគច្រើននិយាយថាសីម៉ា មានស្ទីលច្រៀងស្ទើច្រឡំគ្នាទៅនិងអ្នកនាងខាត់ សុឃីម ក្ដី។
សូមរំលឹកថានាងតន់ ច័ន្ទសីម៉ា បានបរាជ័យក្នុងការលើកពានThe Voice Cambodia រដូវកាលទី២ តែពេលនេះនាងក្លាយទៅជាអ្នកចម្រៀងដែលលេចធ្លោនិងមានតម្លៃខ្លួនខ្ពស់ជាងម្ចាស់ពានមួយចំនួនទៀតផង។កាលពីឆ្នាំ២០២០ Galaxy ធ្លាប់ទម្លាយថាអតីតអ្នកស្មូតជាប់លេខ១ ប្រចាំខេត្តតាកែវរូបនេះច្រៀងConcerts ធំមានតម្លៃដល់ទៅ៥ពាន់ដុល្លារក្នុង១កម្មវិធី ដែលគ្រាន់តែចេញថ្លៃខ្លួននាងមកភ្លាមធ្វើឲ្យអ្នកដឹកនាំកម្មវិធីសិល្បៈជាច្រើនបានថ្ងូរដូចព្រាប ព្រោះពួកគេខ្លះគ្មានលទ្ធភាពជួលនាងឡើយ។យ៉ាងណាសម្រាប់ការចេញមុខច្រៀងសម្ដែងរបស់សីម៉ា នាពេលនេះត្រូវបានគេមើលឃើញថានាងបង្ហាញខ្លួនភាគច្រើនតែការប្រគុំតន្រ្ដីរបស់ថៅកែផលិតកម្មនាងច្រើនជាងពីខាងក្រៅ ព្រោះតែតម្លៃខ្លួននាងខ្ពស់ជាងគេនោះឯង ស្របពេលដែលតារាមួយចំនួនដែលយល់ថាខ្លួនល្បីជាងសីម៉ា នោះក៍បានឡើងតម្លៃ១ជា២តែម្ដង ដោយសារតែខ្លាចគេថាស៊ីថ្លៃនៅក្រោមតារាវ័យ២៥ឆ្នាំរូបនេះ។
តន់ ច័ន្ទសីម៉ា មិនទាន់មានព័តមានថានាងមានគម្រោងកែសម្រស់ផ្នែកណា១ផ្សេងឡើយ ក្រោយពីនាងបានកែច្រមុះ,ចាក់ចង្កា និងពត់ធ្មេញ។ស្រីស្រស់តូចតន់ដែលល្បីឈ្មោះយ៉ាងរហ័សត្រឹមរយៈពេលជាង២ឆ្នាំចុងក្រោយនេះក៍បិតម្ចាស់បេះដូងជិតឈឹងផងដែរ ក្រោយនាងធ្លាប់លេចឭថាមានលោកឧកញ៉ាម្នាក់តាមប្រម៉ាញ់ស្នេហ៍ តែនាងអត់ចាប់អារម្មណ៍ទើបធ្វើឲ្យបុរសនោះដកថយ៕
