ភ្នំពេញ៖អតីតតារាចម្រៀងហង្សមាសលោកខែម ប៊ុនថៃ ហៅខេមរៈ សិរីមន្ដ បានជ្រកនៅGalaxy រយៈពេល២ខែហើយ ដែលទ្រនុំទី៤របស់អ្នកចម្រៀងវ័យ៣៨ឆ្នាំរូបនេះគេមើលឃើញថាសិរីមន្ដ ព្យាយាមធ្វើឲ្យទីផ្សារចម្រៀងរបស់ខ្លួនមានការប្រែប្រួលឡើងវិញ បន្ទាប់ពីស្ងប់ស្ងាត់អស់១ឆ្នាំក្រោយឡើងជាឧកញ៉ា។យ៉ាងណាការជ្រកនៅផលិតកម្មថ្មីនេះទើបរយៈពេលខ្លី ហេតុនេះហើយគេមិនទាន់ដឹងថាលោកប៊ុនថៃ នឹងអាចធ្វើឲ្យទីផ្សារចម្រៀងខ្លាំងដូចមុនឬទៅលែងរួចនោះទេ ព្រោះការចេញបើកឆាកនាពេលនេះគឺសិរីមន្ដ មានតែការប្ដូរម៉ូសក់ពីខ្លី មកជាសក់រួញវិញម្ដង ដែលពីមុនអតីតតារាU2 ,សាន់ដេ និងហង្សមាសរូបនេះ មិនធ្លាប់ប្រើនប្រាស់ម៉ូដសក់មួយនេះឡើយ។ចំណែកបទចម្រៀងរបស់សិរីមន្ដ នៅGalaxy ដែលចេញជាបន្ដបន្ទាប់នោះគឺមានបទ”ទយៗ”ហាក់មានការចាប់អារម្មណ៍គ្រាន់បើប្រៀបធៀបទផ្សេងៗទៀត ហើយលោកក៍ត្រៀមចេញបទចម្រៀងរៀបរាប់ពីព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះដោយចាប់ដៃជាមួយលោកព្រាប សុវត្ថិ ,ខេម និងតន់ ច័ន្ទសីម៉ា ផងដែរ។
ខេមរៈ សិរីមន្ដ បានចាប់អាជីពចម្រៀងជាង១៩ឆ្នាំមកហើយ ដែលការឈជើងក្នុងសិល្បៈបានរឹងមាំបែបនេះដោយសារតែលោកប៊ុនថៃ មានទីប្រឹក្សាពិសេសគឺលោកខេមរៈ ភិរុណ ជាបងប្រុស ជាអ្នកនិពន្ធបទចម្រៀងឲ្យច្រៀងតាំងពីឆ្នាំ២០០៤ ម្លេះ ហើយពេលទៅដល់Galaxy ក៍មន្រ្ដីពាក់ផ្កាយ១រូបនេះនៅតែតាមជួយប្អូនលោកដដែល។អ្នកជំនាញសិល្បៈបានលើកឡើងថាអំឡុងពេលដែលលោកព្រាប សុវត្ថិ ដើរចេញពីហង្សមាសចូលGalaxy កាលពីខែសីហា ឆ្នាំ២០២០ នោះសិរីមន្ដ បានក្លាយទៅជាតារាឈានមុខគេក្នុងចំណោមតារាប្រុសនៅហង្សមាស ប៉ុន្ដែពេលនេះពួកគេបានប៉ៈគ្នានៅផលិតកម្មតែមួយជាលើកទី២ ហេតុនេះហើយនៅឆ្នាំ២០២៣ នេះគេនឹងអាចមើលឃើញច្បាស់ជាមិនខានថាអ្នកណាដែលក្លាយជាតួឯក ហើយចាំមើលថាអ្នកក្លាយជាតួរងនឹងសុខចិត្តដែរឬអត់?
ការលើកឡើងបែបនេះដោយសារតែមុនតារាទាំងពីរឡើងជាឧកញ៉ានោះលោកសិរីមន្ដ និងសុវត្ថិ មានការប្រជែងនិងកាច់កុងគ្នាខ្លាំង រហូតពេលខ្លះពិបាកបែងចែកឲ្យដឹងថា១ណាឈ្នះ ឬចាញ់ទៀតផង។ប៉ុន្ដែតាំងពីអ្នកចម្រៀងលំដាប់ជូរមុខទាំងពីរឡើងជាឧកញ៉ាជាង១ឆ្នាំមកនេះការចេញបទចម្រៀងទប់ទល់គ្នាក្ដៅគគុកដូចមុននោះត្រូវបានកាត់បន្ថយ ហើយម្នាក់ៗងាកទៅរកស៊ីលក់ដីឡូតិ៍រៀងៗខ្លួនទើបធ្វើឲ្យទីផ្សារចម្រៀងពួកគេជាង១ឆ្នាំមកនេះ ទស្សនិកជនមិនសូវចាប់អារម្មណ៍ដូចមុនឡើយ។
មជ្ឈដ្ឋានមហាជនមើលឃើញថាប្រសិនបើខេមរៈ សិរីមន្ដ ប្រឡូកសិល្បៈពេញទំហ៊ឹងដូចមុនហើយបងប្រុសលោកនៅតែជាអ្នកនិពន្ធបទចម្រៀងឲ្យច្រៀងទៀតនោះច្បាស់ជាមិនងាយមានតារាណាផ្ដួលបានឡើយ ប៉ុន្ដែបើរយាលៗដូចឆ្នាំ២០២២ នោះលោកប៊ុនថៃ ច្បាស់ជាប្រឈមចុះខ្សោយជាមិនខាន ដែលពេលនោះ”រលកក្រោយ នឹងច្រានរលកមុន”។ដោយឡែកសម្រាប់អ្នកជំនាញសិល្បៈលោកស៊ិន សិលា ដែលដឹកនាំកម្មវិធីប្រគុំតន្រ្ដីរបស់ប៉ុស្ដិ៍CTN ធ្លាប់លើកឡើងនឹងសំណូមពរថាតារាទាំងឡាយ ដែលឡើងជាឧកញ៉ា ហើយគូតែឈប់ពីសិល្បៈឲ្យដាច់ស្រឡះ កុំឲ្យច្របូកច្របល់ ច្រៀងផង ធ្វើជាឧកញ៉ាផង នោះពេលនេះឃើញថាការស្នើរឡើងនេះគ្មានប្រសិទ្ធភាពនោះទេ ព្រោះលោកសិរីមន្ដ នៅបន្ដអាជីពចាស់នេះដដែលគឺដូចលោកសុវត្ថិ ដែរ បើទោះជាលោកទុំ សារុត ហៅឧកញ៉ាឃ្លោគ និងលាន អាហ្រ្វីលគីនីន បានផ្ដាច់ខ្លួនពីសិល្បៈដូចគ្នាតាំងពីអ្នកទាំងពីរក្លាយជាឧកញ៉ាភ្លាមៗក៍ដោយ។
គូរកត់សម្គាល់ថាក្រោយលោកខែម ប៊ុនថៃ ឡើងជាឧកញ៉ានេះលោកធ្លាប់ចេញវីដេអូថាច្រៀង៦បទ បាន១ម៉ឺនដុល្លារ ដែលតម្លៃនេះធ្វើឲ្យអ្នករៀបចំកម្មវិធីតូចតាមថ្ងូរដូចព្រាប ថាមិនហ៊ានជួលលោកឧកញ៉ាច្រៀងទេ ព្រោះហៅម្នាក់ស្មើតារាល្បីល្មមៗ២០នាក់ឯណ្ណោះ ហេតុនេះហើយបានជាគេមិនសូវឃើញលោកប៊ុនថៃ ចេញច្រៀងច្រើនកម្មវិធីដូចមុននោះទេ គឺភាគច្រើនបង្ហាញខ្លួនតែការប្រគុំតន្រ្ដីដែលរៀបចំដោយGalaxy ច្រើនជាងខាងក្រៅ។ប៉ុន្ដែលោកប៊ុនថៃ ពេលនេះត្រូវបានគេចាត់ទុកថាជាអ្នកមានទ្រព្យស្ដុកទៅហើយ បើទោះជាលោកមិនដែលទម្លាយទ្រព្យសរុបថាទំហ៊ុំទឹកប្រាក់ចំនួនប៉ុន្មានដូចលោកព្រាប សុវត្ថិ ដែលត្រូវមនុស្សជំនិតប្រាប់អ្នកកាសែតកាលពីខែកញ្ញាឆ្នាំ២០២០ ថាលោកស្នាយ មានទឹកលុយសរុបខ្ទង់៣០លានដុល្លារក្ដី ក៍លោកប៊ុនថៃ អាចមានខ្ទង់ចូលលានដុល្លារដែរ ហើយទោះមិនឡើងឆាកក៍លុយលោកចាយមិនចេះអស់ឡើយ៕