ភ្នំពេញ៖អ្នកនាងយុគ ចិន្ដា បានខកចិត្តម្ដងរួចទៅហើយកាលពីឆ្នាំ២០២២ តាមរយៈការរំសាយមង្គលការនៅខែមីនាឆ្នាំនោះ ហើយត្រូវជំនួយការរបស់នាងគឺលោកជីមមី បានលើកហេតុផលថាដោយសារតែពេលនោះកូវីដមិនទាន់ស្ងាត់ទាំងស្រុងកុំអីពិធីការនីវ័យជិត៥០ឆ្នាំរូបនេះបានគ្រងឈុតកូនក្រមុំបានដូចបំណងទៅហើយ។ប៉ុន្ដែបុរសស្និតអ្នកនាងចិន្ដា រូបនេះអះអាងថាមេ(អ្នកនាងចិន្ដា)របស់លោកនឹងមានភាគរយខ្ពស់រៀបការនៅឆ្នាំ២០២៣ ព្រោះពេលនោះស្ថានភាពកូវីដនឹងស្ងប់ស្ងាត់ ហេតុនេះពិធីពិសេសនោះអាចនឹងលេចចេញជារូបរាងបានតាមផែនការណ៍ ។តែថ្មីៗនេះនៅពេលអ្នកយកព័តមានយើងបានសាកសួរបុគ្គលិកជំនិតអ្នកនាងចិន្ដា ជាច្រើនផ្នែកនៅទូរទស្សន៍CTN នោះពួកគេបានអះអាងស្ទើស្របគ្នាថានៅដើមឆ្នាំ២០២៣ នេះគ្មានដំណឹងមង្គលការរបស់អ្នកនាងចិន្ដា ជាថ្មីឡើយ។ការអះអាងបែបនេះបញ្ជាក់ថាពិធីការិនីជើងចាស់អ្នកនាងចិន្ដា មិនទាន់ប្រាកដរឿងមង្គលការរបស់ខ្លួនដដែល ហើយបើនៅតែបែបនេះទៀតច្បាស់ជាតារាដែលរងចាំញាំការអ្នកនាងត្រូវខកចិត្តម្ដងទៀតជាមិនខានឡើយ។
លោកជីមមី បានប្រាប់អ្នកយកព័តមានយើងកាលពីថ្ងៃទី២២ មីនា ថាមង្គលការអ្នកនាងចិន្ដា មិនអាចធ្វើទៅបានទេនៅឆ្នាំ២០២៣ ពោលគឺអាចរៀបចំនៅឆ្នាំ២០២៤ ខាងមុខវិញ។ចំពោះមូលហេតុវិញត្រូវបានលោកជីមមី អះអាងថាដោយសារតែពិធីការិនីរូបនេះនៅតែកាន់ទុក្ខជូនម្ដាយនាងដែលទទួលមរណភាពកាលពីឆ្នាំ២០២២ នៅឡើយ ហេតុនេះហើយមិនទាន់អាចធ្វើពិធីសប្បាយៗអំឡុងពេលនេះបានទេ។
យ៉ាងណាជំនួយការអ្នកនាងយុគ ចិន្ដា រូបនេះនៅតែមិនហ៊ានអះអាងថាមេរបស់លោកដែលនឹងអាចរៀបការនៅឆ្នាំ២០២៤ ខាងមុខនេះនឹងធ្វើពិធីនោះនៅថ្ងៃខែណាឲ្យប្រាកដឡើយ ដោយគ្រាន់តែលោកយល់ថានៅឆ្នាំក្រោយនេះអ្នកនាងចិន្ដា អាចរំសាយទុក្ខសោកពីកាន់ទុក្ខម្ដាយបានខ្លះៗ ហេតុនេះកម្មវិធីពិសេសនោះអាចនឹងរៀបចំឡើងបាន។
គូរបញ្ជាក់ថាអ្នកនាងយុគ ចិន្ដា បានបរាជ័យរឿងស្នេហាម្ដងជាពីរដង តែនៅទីបំផុតនាងបានស្វែងរកបុរសម្នាក់ដែលធ្វើឲ្យបេះដូងមានមានកំដៅពិតប្រាកដបានតាមរយៈការភ្ជាប់ស្នេហ៍ជាមួយអ្នកជំនួញវ័យចំណាស់ម្នាក់ដែលមានចឬកស្លូតបូតហើយសាកសមជាមួយនាង។ក្រុមតារាសិល្បករដែលស្និតអ្នកនាងចិន្ដា ពួកគេជម្រុញឲ្យនាងរៀបការ ព្រោះខ្លាចទុកយូនាំជូរផ្អូម ធ្វើឲ្យចំណងស្នេហាមានការប្រែប្រួល តែក៍មានតារាខ្លះបានបង្អាប់នាងថាជ្រើសគូស្នេហ៍មិនសាកសមនាងទៅវិញ ព្រោះសម្អាងថាបុរសនោះមានវ័យចំណាស់នាងនាងជាដើម។ប៉ុន្ដែអ្នកនាងចិន្ដា មិនស្ដាប់យោបល់អ្នកណាទាំងអស់ ហើយតាមការអះអាងរបស់ជំនួយការនាងថាបើសិនជាពិធីការិនីរូបនេះមិនបាត់បង់ម្ដាយកាលពីឆ្នាំ២០២២ នោះទេ ម្លេះនៅឆ្នាំ២០២៣ នេះពិធីរៀបអាពាហ៍ ពិពាហ៍ របស់នាងនឹងចេញជារូបរាងពិតប្រាកដទៅហើយ។
យុគ ចិន្ដា បានបង្ហាញភាពស្រងូតស្រងាត់ខ្លាំងជិត១ឆ្នាំមកហើយក្រោយម្ដាយនាងអ្នកស្រីខឹម ផល្លី បានទទួលមរណភាពកាលពីថ្ងៃទី១០ ខែកក្កដា ឆ្នាំ២០២២ ហើយអំឡុងពេលលែងបានជួបមុខម្ដាយជារៀងរហូតនេះគេឃើញនាងច្រើនតែទៅវត្តយកចង្ហាន់ប្រគេនព្រះសង្ឃឧទ្ទិសមគ្គផលជូនម្ដាយនាង ខណៈដែលការងារសិល្បៈមួយចំនួននាងក៍រយាលៗមិនសម្រុកខ្លាំងដូចមុនឡើយ ហើយគេឃើញនាងក៍ងាកទៅរកស៊ីផ្នែកអចលនទ្រព្យផងដែរ។ចំណែករឿងមង្គលការវិញទោះជាមិនកំណត់ ពេលវេលាច្បាស់លាស់ក្ដី ប៉ុន្ដែពេលនេះនាងនិងគូស្នេហ៍យល់ចិត្តគ្នាច្បាស់ ហើយអ្នកទាំងពីររស់នៅយ៉ាងសុខសាន្ដនៅបុរីអង្គរភ្នំពេញ (គម្រោងទី២) សង្កាត់ឃ្មួញ ខ័ណ្ឌសែនសុខ រាជធានីភ្នំពេញ។អ្នកនាងចិន្ដា ធ្លាប់ប្រាប់ថានៅថ្ងៃរៀបការរបស់នាងគឺកូនក្រមុំនាងឈ្មោះយុគ ដាពេជ្រ ហៅស្រីអម នឹងធ្វើជាអ្នកកំដ នាងតែម្ដងព្រោះថាឆ្នាំនាងការជាពេលដែលកូនស្រីនាងពេញវ័យក្រមុំតែម្ដង៕
