ភ្នំពេញ៖នៅឆ្នាំ២០២៣ នេះបទចម្រៀងប្រពៃណីខ្មែររបស់មាស សុខសោភា សម្រាប់ពិធីបុណ្យចូលឆ្នាំខ្មែរកាលពីពេលថ្មីៗនេះមិនសូវឭមានគេចាក់លាន់រំពងតាមទីវត្តអារ៉ាមដូចតារាវ័យក្មេងមួយចំនួនទៀតឡើយ តែបទនាងបែជាមានសភាពស្ងប់ស្ងាត់ខុសប្លែកពីឆ្នាំមុនៗទៅវិញ។ប៉ុន្ដែគេកត់សម្គាល់ថាបញ្ហាទាំងនោះគឺដោយសារតែសោភា ទើបតែចាកចេញពីរាម ថ្មីៗពេកហេតុនេះហើយការចាប់ផ្ដើមធ្វើបទចម្រៀងថ្មីៗនៅផលិតកម្មផ្ទាល់ខ្លួនCamtrax ហាក់ដូចជាយឺតយ៉ាវបន្ដិចទើបចេញវាយលុកទីផ្សារមិនទាន់ពេលវេលា។តែអ្វីដែលគូរឲ្យកត់សម្គាល់សុខសោភា នៅតែបន្ដចេញឃោសនាមុខជំនួញរបស់ថៅកែរាម ដូចមុនដដែល គឺហាក់គ្មានបញ្ហាវិវាទណាមួយជាមួយផលិតកម្មនេះដូចគេសង្ស័យទេបើទោះជាក្រោយរាម បាត់បង់នាងធ្វើឲ្យផលិតកម្មនេះលែងសូវមានទម្ងន់ដូចមុនទៀតក្ដី។ដោយឡែកសម្រាប់Fan របស់សុខសោភា វិញពួកគេនៅតែមានការជឿរជាក់លើនាងថាអ្នកចម្រៀងសំនៀងផ្អែមរូបនេះទោះជាទៅដល់ផលិតកម្មណាក៍នៅតែល្បី ព្រោះតែសម្ថភាពរបស់នាង ខណៈដែលសោភា ផ្ទាល់ធ្លាប់ប្រាប់អ្នកយកព័តមានយើងថាសម័យនេះទៅហើយទោះជាច្រៀងដោយគ្មានផលិតកម្មក៍នៅតែល្បីបានដែរ។
គូរកត់សម្គាល់ថាក្រៅពីមាស សុខសោភា តារាស្រីលំដាប់ជូរមុខដែលមិនសូវមានបទចម្រៀងលេចធ្លោនារដូវចូលឆ្នាំខ្មែរនេះមានដូចជាឱក សុគន្ធកញ្ញា ,សុគន្ធ និសា,សួស វីសា និងពេជ្រ សោភា ជាដើម ខណៈដែលមជ្ឈដ្ឋានទូទៅមើលឃើញថាតារាថ្មីៗចាប់ផ្ដើមចេញមុខកាន់តែច្រើនទើបធ្វើឲ្យរៀមច្បង ហាក់ពិបាកទប់លំនឹងនាពេលខ្លះ តែសុខសោភា ដែលមានស្វាមីនាងលោកអ៊ឹត រ៉ាដា និងបងប្រុសនាងលោកមាស សុខរតនៈ គ្រប់គ្រងCamtrax នោះច្បាស់ជាមិនបណ្ដោយឲ្យនាងបន្ដចុះខ្សោយរហូតដល់ធ្លាក់កូដនោះទេ ព្រោះការចាកចេញពីរាម នៅឆ្នាំ២០២៣ មិនបន្ដច្រៀងនៅឆ្នាំទី៣ នេះមានន័យថាសោភា ព្យាយាមធ្វើឲ្យទីផ្សារចម្រៀងរបស់នាងមានការប្រែប្រួលឡើងវិញ ខណៈដែលការច្រៀងនៅរាម ២ឆ្នាំនាងមិនសូវលេចធ្លោខ្លាំងឬមានបទផ្ទុះដូចមុនឡើយ ពោលគឺនៅទ្រឹងហើយការផ្លាស់ប្ដូរទាំងស្រុងរបស់នាងគឺការស្លៀកពាក់ប្លែកៗនិងពេលខ្លះស៊ិចស៊ី ហ៊ានបញ្ចេញសាច់ជាងតារាផ្នែកយុវវ័យទៀតផង។ប៉ុន្ដែអ្នកជំនាញធ្វើភ្លេង(Composer)ម្នាក់នៅហង្សមាសបានព្រមានសុខសោភា ថាការធ្វើផលិតកម្មខ្លួនឯងមិនមែនងាយស្រួយទេ ព្រោះការងារនេះត្រូវការធនធានមនុស្ស និងរចនាសម្ព័ន្ធច្បាស់លាស់ តែបើសោភា មានតែប្ដីនិងបងប្រុសអន្ដរាគមន៍លើនាងនោះមិនប្រាកដថាជោគជ័យឡើយ ម្យាងបើធ្វើផលិតកម្មបានគ្រប់គ្នាមិនមែនម្លេះលោកឧកញ៉ាព្រាប សុវត្ថិ ដែលមានទ្រព្យស្ដុកស្ដមនោះនៅតែច្រៀងឲ្យផលិតកម្មគេធ្វើអី?
សូមបញ្ជាក់ថាទោះជាមាស សុខសោភា បានប្រកាសនៅឆ្នាំ២០២៣ នេះថានាងមិនទៅចូលច្រៀងនៅផលិតកម្មណាក្រៅពីCamtrax មែន តែអ្នកជំនាញសិល្បៈបានលើកឡើងថាសាររបស់សុខសោភា បែបនេះគឺគ្រាន់តែជាសញ្ញាមួយផ្ដល់ឲ្យផលិតកម្មផ្សេងទៀតចូលចែចូវប៉ុណ្ណោះ ហើយបើត្រូវតាមល័ក្ខខណ្ឌនាងចង់បាននោះសោភា នឹងផ្លាស់ប្ដូរចិត្តជាមិនខាន។ប្រភពបានឲ្យដឹងថាមានផលិតកម្ម៣ដែលរងចាំត្រងយកសុខសោភា ក្រោយនាងលែងជាតារារាម នោះគឺថោន,ហង្សមាស និងGalaxy តែក្នុងចំណោមផលិតកម្មខាងលើនេះគឺមានតែGalaxy ទេដែលមានប្រៀបជាងគេព្រោះផលិតកម្មនេះបានទាញយកតារាប្រុសល្បីៗទៅសឹងអស់ ទើបខ្វះតារាស្រីចាប់ដៃគូហេតុនេះបើសោភា ពិតជាចង់ប្រជែងទីផ្សារចម្រៀងឲ្យខ្លាំងក្លាឡើងវិញមែនគេជឿរថាការងាកទៅច្រៀងដៃគូជាមួយលោកព្រាប សុវត្ថិ និងខេមរៈសិរីមន្ដ រួមទាំងលោកខេម ប្រាកដជាធ្វើឲ្យទស្សនិកជនចាប់អារម្មណ៍ជាមិនខាន។តែសោភា ធ្លាប់ប្រាប់ថាGalaxy មិនដែលទាក់ទងនាងម្ដងណាឡើយ។
ក្រៅពីមាស សុខសោភា តារាដែលមានផលិតកម្មផ្ទាល់ខ្លួននាពេលនេះមានដូចជាអ្នកនាងព្រំ រដ្ឋា ,លោកខាន់ ជេមស៍ និងសាវិន ហ្វីលីព ជាដើម។សម្រាប់សុខសោភា វិញបច្ចុប្បន្នមិនត្រឹមតែមិនទាន់ច្បាស់លាស់រឿងទៅជ្រកទ្រនុំថ្មីនោះទេ ប៉ុន្ដែដំណឹងនាងរៀបអាពាហ៍ ពិពាហ៍ ជាមួយលោកអ៊ឹត រ៉ាដា ជាលើកទី៣ ដែលគេរំពឹងថានឹងធ្វើជាចំហនោះក៍ស្ងាត់ដូចចោលួចសេះតែម្ដង ក្រោយពួកគេចាប់ដៃគ្នា១៦ឆ្នាំ និងធ្លាប់រៀបការលួចលាក់២លើកមកហើយនោះ៕