ភ្នំពេញ៖តារាចម្រៀងលោកកែ សុវណ្ណារ៉េត ហៅហ្សូណូ ដែលជាអតីតប្ដីអ្នកនាងចាន់ សុផានី នោះបានអះអាងថាលោកនឹងតទល់ជាមួយភរិយាចាស់របស់ខ្លួនតាមផ្លូវច្បាប់នៅនាទីចុងក្រោយ ប៉ុន្ដែមិនបញ្ជាក់ច្បាស់ថាតើនឹងប្ដឹងទៅម្ដាយកូនស្រីរបស់លោកឬយ៉ាងណានោះទេ។
លោកហ្សូណូ ប្រតិកម្មតបទៅអ្នកនាងចាន់ សុផានី ថាសូមកុំឲ្យអ្នកនាងសុផានីមុសា ពេក ព្រោះលោកថាថ្ងៃក្រោយបើគេដឹងរឿងនោះអ្នកដែលខុសនិងហើយត្រូវគេស្អប់គឺយើង។លោកសុវណ្ណារ៉េត ថាបានព្យាយាមរក្សារភាពស្ងៀមស្ងាត់ ព្រោះតែលោកអាណិត ខ្លាចប៉ៈពាល់ដល់សតិអារម្មណ៍ដល់កូនស្រីរបស់លោកដែលនៅក្មេង អត់ចង់ឲ្យមានរឿងកើតឡើងនោះទេ។ ប៉ុន្ដែលោកថាអត់យល់ព្រោះរឿងនេះនៅតែកើតឡើងមកទៀត អីចឹងលោកសួរថាតើមូលហេតុអ្វីទៅ?លោកហ្សូណូ ថាមិនចង់តតបទៅអតីតភរិយានោះទេ តែលោកនឹងតតបទៅតាមផ្លូវច្បាប់ដែលលោកនឹងធ្វើឲ្យចប់ ឬសង្រ្គប់តែម្ដង។លោកថាការធ្វើទៅតាមផ្លូវច្បាប់នោះទោះជាលោកមិនធ្វើក៍ឪពុកម្ដាយបងប្អូនលោកមិនសុខចិត្តដែរ ព្រោះជាង១០ឆ្នាំមកហើយតែងតែដដែលៗ ឲ្យប៉ុន្មានក៍មិនគ្រប់ គិតយ៉ាងម៉េច?លោកថាផ្លូវច្បាប់មាន គឺនឹងដោះស្រាយគ្នាតាមនោះ។ចំណែកនៅយប់ថ្ងៃទី១៩ ឧសភា លោកហ្សូណូ ក៍បានបង្ហោះជាសាធារណៈនូវចំណាត់ការរបស់មេធាវីលោកនិងចំនួនទឹកប្រាក់ជាច្រើនដែលលោកបានបាញ់ទៅអ្នកនាងសុផានី តាមកុងធនាគារAba ផងដែរ គិតត្រឹមរយៈពេល២ឆ្នាំចុងក្រោយនេះ។
ក្រោយឃើញលោកហ្សូណូ និយាយយ៉ាងខែងរ៉ែងថានឹងដោះសា្រយរឿងនេះជាមួយប្រពន្ធទៅតាមច្បាប់ឲ្យជ្រះស្រឡះនិងចប់ដាច់ស្រេចនោះអ្នកនាងចាន់ សុផានី ថារងចាំតែឱកាសនោះមកដល់ព្រោះនាងនឹងបានតទល់គ្នាជាមួយហ្សូណូ ដោយសារតែកន្លងមកនាងមិនងាយបានជួបឬនិយាយជាមួយអតីតប្ដីឡើយ។អ្នកនាងសុផានី ថានាងចង់ទុកឱកាសឲ្យហ្សូណូ មិនមែនភ័យខ្លាចបុរសម្នាក់នេះឡើយ ទោះជាលោកចង់ប្ដឹង និងគម្រាមដាក់កូននាងដើម្បីឲ្យកូននាងខ្លាចក្ដី។ប៉ុន្ដែអ្នកនាងថាមានតែបន់ឲ្យមានរឿងហ្សូណូ ប្ដឹងនាងនេះកើតឡើង ព្រោះនាងអត់ឱកាសនិយាយជាមួយហ្សូណូ ទេ បើមានរឿងបែបនេះកើតឡើងគឺនាងអរខ្លាំងណាស់ ហើយនាងចង់រៀបចំពាក្យបណ្ដឹងតបទៅហ្សូណូ វិញដែរតែនាងថាគ្មានលទ្ធភាពជួលមេធាវី ឡើយ ព្រោះរកតែលុយបង់ថ្លៃផ្ទះជួលអត់បានផង ។អ្នកនាងសុផានី ថាហ្សូណូ ចុចបិតទូរស័ព្ទរបស់កូន ខ្លាចនាងសុំលុយ ដោយសារតែកូនត្រូវទៅប្រលងនៅបរទេសតែនាងគ្មានលទ្ធភាពទិញសំបុត្រយន្ដហោះ និងផ្គត់ផ្គងកូន។អ្នកនាងសុផានី ថាអតីតប្ដីរូបនេះចង់ឲ្យគេដឹងថានាងក្ររហាម ចង់ឲ្យនាងអាម៉ាស ហើយនាងសួរហ្សូណូ ថាទាល់តែចង់ឲ្យនាងមកហែកហួរបែបនេះមែនបានឪពុកកូនស្រីរបស់នាងម្នាក់នេះសុខចិត្ត?អ្នកនាងសុផានី ថាលោកហ្សូណូ នេះហើយដែលដុតបង្ខំឲ្យនាងចេញមុខមកលាតត្រដាងរឿងមួយនេះពេលនេះ។តែអ្នកនាងសុផានី មិនទាន់ឆ្លើយតបឬប្រតិកម្មចំពោះហ្សូណូ បង្ហោះលើហ្វេសបុកនូវចំនួនលុយដែលលោកបាញ់ឲ្យអ្នកនាងជាបន្ដបន្ទាប់ និងភ្ជាប់មកជាមួយនូវសេចក្ដីប្រកាសរបស់មេធាវីលោកនោះទេ ខណៈដែលមុននេះនាងបញ្ជាក់ប្រាប់អ្នកកាសែតថាហ្សូណូ មិនដែលផ្ញើរលុយឲ្យកូនដោយចិត្តគេទេ គឺទាល់តែកូនសុំបានឲ្យខ្លះទៅ។
គូរបញ្ជាក់ថារឿងរ៉ាវស្នេហារវាងតារាចម្រៀងលោកកែ សុវណ្ណារ៉េត ហៅហ្សូណូ និងអ្នកនាងចាន់ សុផានី បានស្ងប់ស្ងាត់មួយរយៈ ហើយពេលនេះតំណក់ឈាមរួមគ្នាអ្នកទាំងពីរជាកូនស្រីមានអាយុជាង១០ឆ្នាំទៅហើយ។ការផ្ទុះរឿងនេះសារជាថ្មីនៅពេលដែលថ្មីៗនេះអ្នកនាងសុផានី បានចេញមកសុំអន្ដរាគមន៍ពីអតីតប្ដីឲ្យជួយចិញ្ចឹមនិងទំនុកបម្រុងដល់កូនស្រីនាងឲ្យបានរៀនសូត្របន្ដផង ព្រោះនាងគ្មានលទ្ធភាពទេ ។ប៉ុន្ដែហ្សូណូ បែជាថារឿងនោះដដែលៗជាង១០ឆ្នាំទៅហើយ នឹងចុងក្រោយនេះលោកត្រៀមចាត់ការទៅតាមផ្លូវច្បាប់ដើម្បីឲ្យចប់គ្នាតែម្ដង។
អ្នកនាងចាន់ សុផានី ថាហ្សូណូ មិនដែលផ្ដល់លុយកាក់ដល់កូនស្រីនាងនោះទេ តែមានម្ដងនោះនាងបានជួបអតីតប្ដី ដោយចៃដន្យនៅថ្ងៃឆ្លងឆ្នាំ នៅខេត្តសៀមរាប ដែលពេលនោះហើយលោកបានទំនាក់ទំនងមកកូននិងបានផ្ដល់ថវិការខ្លះដល់កូនតែនាងថាមិនច្រើននោះទេ។សុផានី ថាទាំងរូបនាងនិងកូនប្រៀបបានដូចអ្នកសុំទាន ព្រោះការជួយរបស់ហ្សូណូ មកលើនាងដូចគេធ្វើគុណមកលើនាងខ្លាំងណាស់។អ្នកនាងសុផានី និយាយទាំងទឹកភ្នែកថាពេលនាងឆែកឆាតសារទាក់ទងរបស់កូនស្រីទាក់ទងទៅហ្សូណូ ទើបនាងសែនឈឺចាប់ ព្រោះលុយដែលគេផ្ដល់តិចតួចមកកូននោះមិនមែនជាទឹកចិត្តរបស់អតីតប្ដីឡើយ តែកូននាងជាអ្នកសុំដោយសារតែនាងដឹងថាម្ដាយពិបាក។អ្នកនាងសុផានី ថានាងមានតែប្រាប់ដល់កូនថាកុំសុំលុយប៉ាអី ព្រោះគ្នាក៍ខ្វះខាតដែរ ប្រឹងធ្វើការណាស់។
មជ្ឈដ្ឋានមហាជនរងចាំមើលថាតើហ្សូណូ នឹងធ្វើទៅតាមផ្លូវច្បាប់ចំពោះអ្នកនាងសុផានី នោះតាមរបៀបណាទៅ?ប្ដឹងឡើងតុលាការ?តែអ្នកនាងសុផានី បញ្ជាក់ច្បាស់ៗហើយថាបើហ្សូណូ ប្ដឹងនាងគឺនាងសប្បាយចិត្តបំផុត ព្រោះជាពេលវេលាដែលនាងនិងអតីតប្ដីមានឱកាសបានជួបតទល់គ្នាដោយផ្ទាល់ ដោយសារខានបានឆ្លងឆ្លើយជាមួយអ្នកចម្រៀងហង្សមាសរូបនេះជាយូមកហើយ។យ៉ាងណាគេនៅចាំសម្ដីអតីតអ្នកចាត់ការទូទៅរបស់ហង្សមាសលោកអ៊ិន ទីតូ ធ្លាប់ប្រាប់នគរធំថាហ្សូណូ ឡើងទៅមុខមិនរួចព្រោះតែរឿងជាមួយអ្នកនាងចាន់ សុផានី នេះតែម្ដង៕
